لۆگۆ و دید و پەیامەكان چی بۆ قوتابخانەكان دەكەن؟

لۆگۆ و دید و پەیامەكان چی بۆ قوتابخانەكان دەكەن؟

بۆئەمساڵی خوێندن وەزارەتی پەروەردەی حكومەتی هەرێمی كوردستان تەواوی باخچەكانی منداڵان و قوتابخانەكانی كوردستانی كردە خاوەن لۆگۆ و دیدو پەیامی تایبەت بە خۆیان، ئامانج لەم كارەش ئەوەیە قوتابخانەكان ئەم دیدو پەیمانە بكەنە كردار لە چوار چێوەی بەرنامە و پلانی پەرەپێدانی قوتابخانەكەیان، زۆرێك لەو درووشمانەی بەكار هاتوون لە لۆگۆ و دیدەكان بریتین لە ( پەروەردە، فێركردن، ژینگە دۆستی ، زانست ، متمانە ، لێبوردەیی و چەندین درووشمی تر لە لایەن قوتابخانەكانەوە بەكار هاتوون و نووسراون، پرسیار لێرە ئەوەیە ئاخۆ باخچە و قوتابخانەكان بە كردار دەتوانن دید و پەیامەكان جێ‌ بە جێ‌ بكەن و لە قوتابخانەو باخچەكان ئەم درووشمانە ببیندرێن لەلایەن قوتابییان و مامۆستایان كاریان پێ‌ بكرێت ؟ یان تەنها نووسراوێكی هەڵواسراون و بەدەست هێنانی چەند نمرەیەكە بۆقوتابخانە و باخچەكان؟ لەم راپۆرتەدا زاری كرمانجی بۆچوونی مامۆستایان و شارەزایانی بواری پەروەردەی وەرگرتووە لەسەر هەبوونی دیدو پەیام.
راپۆرت: محەممەد مەحموود
هەبوونی دید و پەیام پرۆسەی خوێندن پێش دەخات لە قوتابخانەكان ئەمە سەرەتای قسەكانی مامۆستا شەهید سەباحە،ئەو بۆخۆی لە قوتابخانەێكی دواناوەندی وانە دەڵێتەوەو كە لێمان پرسی لۆگۆ و دیدو پەیامەكان دەتوانن پرۆسەی خوێندن لە قوتابخانەكان پێش بخەن؟ ناوبراوو گووتی" من وەك قوتابخانەكەی خۆمان قسە لەسەر ئەم بابەتە دەكەم و دەڵێم بەڵێ، هەبوونی دیدو پەیام پڕۆسەی خوێندن لە قوتابخانەكەمان پێش دەخات، چونكە ئێمە دید و پەیاممان كردۆتە كردار و كاریگەری ئەرێنی هەبووە لە سەر پێشكەوتنی ئاستی قوتابییانمان، هەروەها قوتابخانەكەمان ژینگەیەكی تەندروستی دابین كردوە بۆ قوتابییان و وامان كردوە قوتابی و مامۆستا و دەستەی كارگێڕیی هەمووان بەیەكەوە كاردەكەین بۆ پێشخستنی ئاستی زانستی لە قوتابخانەكەمان.
مامۆستا رەسوڵ كەمال وەك بەرێوەبەرێك بەكورتی گووتی " بۆ هەبوونی دیدو پەیام و پێشخستی پرۆسەی پەروەردەو فێركردن لە ناوەندەكانی خوێندن، بەش بە حاڵی خۆم دەڵێم ئەگەر ئەم دیدو پەیامانە بە باوەڕەوە بێت وكاری جدی و هەماهەنگی لە سەر بكرێت بێگومان بەڵێ رۆڵێكی زۆر گرنگی دەبێت بۆ پێشخستنی پرۆسەی خوێندن.
مامۆستا كاروان عەبدوڵڵا بەشداربووێكی تری ئەم راپۆرتەیەو پێیوایە هەبوونی دوو دەوامی و قەرەباڵغی پۆلەكان وادەكات ئەم دیدو پەیامانەش ئامانجی خۆیان نەپێكن بۆ وەڵامی پرسیارەكەش گووتی " وەك دەبیندرێت بۆ ئەم سیستەمە گەرم و گورێك هەیە، بەڵام هێشتا وەك ئەوەی لە سیستەمەكە هاتووە ئامانجەكە تەواو ناپێكی، لە بەر هەبوونی دوو دەوامی و جەنجاڵی و زۆری ژمارەی قوتابییان لە قوتابخانەكان، ئەگەرنا دیدو پەیام پێویستە و دەبێت وەك كرداریش كاری پێ‌ بكرێت.
چەند ساڵێكە بەرێوەبەرو گۆرانكاریەكانی ناو ئەو سیستەمشی بینیووە كە وەزارەتی پەروەردە لەرابردووش كردویەتی، مامۆستا هیممەت محەممەدعەلی لەسەر دیدو پەیامەكان رەشبینێكی پێوە دیارە وەك خۆی دەڵێت " ئەگەر ئیرادەێكی بەهێزی كاركردنی لەگەڵ نەبێت كاریگەرێكی ئەو تۆی نابێت نووسینی دیدو پەیامەكان.
مامۆستا هیممەت گووتی" پێموایە دید پەیام یان هەر درووشم و بانگەشەیەكی بریقدار ئەگەر ئیرادەی كاركردنی لە گەڵ نەبێت، هیچ كاریگەریەكی نابێت بگرە دواجار ڕەنگە شەرمەزاریشی لە دواوەبێت، بە تێڕوانینی من كێشەی بنەڕەتی مامۆستایانی ئێمە نەزانین نییە، بە باوەڕەوە دەڵێم كێشەی ئێمە ئەوەندەی لە نەبوونی ئیرادە و داڕمانی وزەو ورە دایە ئەوەندە لە خودی نەزانین دا نییە، زۆرجار گووتومە و لێرەش دەیڵێمەوە لە بری ئەو هەموو خولانەی بە ناوی شیاندن و بەهێزكردن ساڵانە بۆ بەڕێوەبەر و مامۆستایان دەكرێنەوە ئەگەر تایبەت بكرێن بە گەڕاندنەوەی هێز و ئیرادە و چاندنی گیانی خۆشەویستی گەل و وڵات لە ناخی مامۆستادا كاریگەری باشتری دەبێت.
سەرپەرشتیارێكی پەروەردەیی دەڵێت" هەبوونی دیدو پەیام بۆ بەرەو پێش چوونی قوتابخانەیە،سوهێل تاهیر عەبدولڵا، سەرپەرشتیاری پەروەردەیی بنەڕەتی دەربارەی دیدو پەیامی قوتابخانەو باخچەكان گووتی" دیدو پەیامی قوتابخانە و باخچەكان : واتا دانانی پلانێكی تۆكمە، بۆ بەرەو پێشچوونی قوتابخانە و باخچەكانە لە هەموو رووێكەوە لەوانە" پەروەردەیی و زانستی و پەرەپێدانی قوتابخانە " ئەم پلانەش كە دید و پەیامی قوتابخانەیە لە لایەن تەواوی بەشداربووانی پرۆسەی خوێندنی هەر قوتابخانەیەك و باخچەیەك لە، بەرێوەبەر ، یاریدەدەر ، مامۆستا ، رێنمایكار ، قوتابی نەخشەی بۆ دادەڕیژن كە چۆن دید و پەیام بۆ ماوەیەكی دیاریكراوی (ساڵی خوێندن) دیاری بكەن و هەنگاو بنێن لە سەر ئەو خاڵانەی كە قوتابخانە پێویستی پێی هەیە ، ئینجا ئەو خاڵانە چ پەروەردەیی بن یان زانستی یان لە رووی كوالێتی قوتابخانە و پەرەپێدانی.
لە كۆتایی قسەكانیشدا ئەم سەرپەرشتیارە پەروەردەیە گووتی" ئەو پلانە هاوكات دەبێت لە گەڵ پلانی مامۆستا لە وانەكەی و پلانی رێنماییكار بۆ چارەسەركردنی گرفتی قوتابییان و پلانی بەرێوەبەر بۆ بەرزكردنەوەی ئاستی پەروەردەیی و زانستی قوتابییان یەك بگرێتەوە.

زۆرترین بینراو