لەنێوان حەزو رق لێبوونەوە و بەخیلیدا

لەنێوان حەزو رق لێبوونەوە و بەخیلیدا

مەهدی محەممەد – سۆران : رۆژ بە رۆژ یەكتر شكاندن لە نێو تاكەكانی كۆمەڵگەی كوردی و بەتایبەتیش لە تۆڕە كۆمەڵایەتیەكان زیاتر دەبێ، لە نێوان گەنجان، سیاسیەكان، بازرگانان، پیاوانی ئاینی، چالاكوانە مەدەنییەكان، پزیشكان، مامۆستایان و وەرزشوانان و رۆشنبیران و خەڵكی ئاسایی، گەنجێك دەڵێ‌"گەر بەو شێوەیە یەكترشكاندن بەردەوام بێ، كورد ژمارەی پێوانەیی تۆمار دەكات"، پسپۆرێكی دەروونیش دەڵێ"یەكترشكاندن هێما و ئاماژەیە بۆ مەترسییەكی گەورە و شاراوە, ئەم مەترسییەش رۆژانە بە گیانی تاكەكانی كۆمەڵگادا دەتەقێتەوە".
سەهەند سۆفی تەمەن 26 ساڵ، پارت و لایەنە سیاسیەكانی كورد بە هۆكاری ئەو یەكترشكاندنە دەزانێ و پێی وایە ئەوان خەڵكیان فێری ئەوە كردووە یەكتر قبوول نەكەن و یەكتربشكێنن"ئەوە حیزبە كوردییە دژ بە یەكەكانن، خەڵكیان وا پەروەردە كردووە، یەكتر قبوول نەكەن و یەكتر بشكێنن، كاتێ ئەوان لە دەزگاكانی راگەیاندن و كۆڕ و كوبوونەوەكانی خۆیان، ناحەز و نەیارەكانی خۆیان دەشكێننەوەو هەزار و یەك ناو و ناتۆرە بۆ یەكتر هەڵدەبەستن، ئەی دەبێ میللەتی قوڕبەسەر چی بكات ؟ بە دڵنیایەوە ئەویش بەهەمان ئەو رێگەدا دەڕوات كە سیاسیەكانیان پێدا دەڕۆن"،
سەهەند بە نیگەرانیەوە ئەوەش دەڵێ‌"گللەیی لە ئێمەی گەنجان مەكەن كە لەو نیشتمانە بێ ناز و چارە رەشەدا، تەنها ماوین و خۆمان ونكردووە، لێرە هیچ شتێك دڵخۆشمان ناكات، كاتێ گەنجانی بەرپرسەكانیش دەبینین لەو پەڕەی ژیانێكی خۆش و شاهانە دەژن و جیاوازی ژیانی ئێمە و ئەوان بەقەد دووری نێوان زەوی و ئاسمانە، توڕەمان دەكات، بۆیە ركمان لەوانە دەبێتەوە كە هەموو جوانییەكانی ژیانیان لە ئێمە ساندووەو بۆ خۆیانیان بردووە".
مەحموود حەسەن ی تەمەن 25 ساڵ دەڵێ‌"گەر تا ئێستا كورد، ژمارەیی پێوانەیی لە هەڵپەڕەكی و گەندەڵی و قوربانیدان و شۆرش تۆمار نەكردبێ، بە دڵنیایەوە لە یەكترشكاندن و یەكترقبوول نەكردن تۆماری دەكات"، مەحموود گەرچی نیگەرانە بەرامبەر بەو بارودۆخە، بەڵام هیوا بۆ چاكبوونی دەخوازێ و داواكارە لە گەنجان هۆشیارانەتر هەڵسوكەوت لەگەڵ یەكتر و كۆمەڵگەكەیان بكەن"پێویستە گەنجان خۆیان زیاتر رۆشنبیر بكەن و هۆشیارانەتر هەڵسوكەوت لەگەڵ یەكتر و كۆمەڵگەو گۆڕانكارییەكان بكەن، چونكە تەنها ئەو شتانەیە سوود بە گەنجان دەگەینێ و ئەوەی ئێستا دەگوزەرێ، زیانی بۆ هەمووان هەیە و زەرەرمەندی یەكەمیش گەنجانن"،
مەحموود هۆكاری یەكترشكاندن بۆ رك لێبوونەوەی یەكتر دەگەڕێنێتەوەو دەڵێ‌"كاتێ یەكترمان خۆش نەویست و ركمان لە یەكتر بووە، ئەو كات یەكتر دەشكێنن و قسە لەسەر هەموو شتێكی یەكتر دەكەین و یەكتر سووك دەكەین، بەڵام گەر یەكترمان خۆشویست، ئەوە بە شێوەیەكی جوان و مرۆڤانە رەفتار لەگەڵ یەكتر دەكەین و یەكتر لە باوەش دەگرێن و رێزی یەكتر دەگرین".
پسپۆرێكی دەروونییش هۆشداری لە بوونی مەترسییەكی گەورەو شاراوە دەدا، لە ئەنجامی بەردەوامبوونی یەكترشكاندن و قبوولنەكردنی یەكتر، كە رووبەرووی كۆمەڵگەی كوردی و گەنجان ببێتەوەو دەڵێ‌"پێویستە بەخۆمان دابچینەوە"،
ئەكرەم مزووری پسپۆری دەروونی لەبارەی مێژووی یەكترشكاندنەوە قسە دەكات و دەڵێ‌"هەرچەند مەسەلەی یەكترشكاندنەوەو هەراسانكردنی تاك، لە كۆنەوە هەر هەبووەو بە گەڕانەوە بۆ حیكایەت و داستان و شانۆنامە كوردی و بیانییەكان، چەندین وێنەی توندوتیژیمان بەرچاو دەكەوێت، بەڵام شتێكی بەڵگە نەویستە كە ئەم دیاردەیە لە سەردەمی ئێستادا بە تایبەت لە توڕە كۆمەڵایەتییەكاندا، رۆژ بە رۆژ پانتاییەكی فراوانتر داگیر دەكات و بە گشتی دەتوانین بڵێین هێما و ئاماژەیە بۆ مەترسییەكی گەورەو شاراوە, ئەم مەترسییەش رۆژانە بە گیانی تاكەكانی كۆمەڵگادا دەتەقێتەوەو ژمارەی قوربانییەكانی یەكتر شكاندنەوە بەرەو سەرەوە دەبا",
ئەو پسپۆرە دەروونییە هێما بە چەند هۆكارێك دەكات كە پاڵنەرە بۆ ئەوەی تاك روو لەو كارە بكات و دەڵێ‌"سێ هۆكار هەیە كە دەبنە پاڵنەر بۆ ئەوەی تاك روو لەو كارە بكات،
1.شێوازی بە كۆمەڵایەتیكردن: مرۆڤ كاتێك لە دایك دەبێت، هیچ شتێك دەربارەی كۆمەڵگا, بەها, داب و نەریت و زانست نازانێت، بەڵام دوای لەدایكبوون، لەرێگەی دامەزراوە كۆمەڵایەتییەكانەوە (خێزان, قوتابخانە, راگەیاندن ...هتد) هەوڵی بە كۆمەڵایەتیكردنی دەدرێت و لە بوونەوەرێكی بایۆلۆژییەوە بۆ بوونەوەرێكی كۆمەڵایەتی دەگوڕدرێت و فیری زمان, بەها, زانست, داب و نەریت و رۆشنبیری كۆمەڵگایەكەی دەبێت و كەسایەتی تایبەت بە خۆی بۆ دروست دەكرێت.
بۆیە ئەگەر لە پرۆسەی بەكۆمەڵایەتیكردندا شێوازی توندوتیژی, هەڕەشە, چاوسووركردنەوە, تۆقاندن بەكار هات، بێ گومان زیانی گەورە بە كەسایەتی و باری دەروونی تاك دەگەنێت و لەدرێژخانەدا مرۆڤێكی توندوتیژ و تۆقێنەر و شكێنەری كەسایەتی لێ دەردەچێت.
2.كەسایەتی سادیسم: دەروونی مرۆڤ زۆر ئالۆزەو حەزو ئارەزووەكانی هەمە چەشنە و بە جۆرەها شێوە گوزارشتی لێ دەكات و یەكێك لەو شێوازانەی كە مرۆڤ گوزارشتی حەز و ئارەزووەكانی پێ دەكات، بریتییە لە خۆشی و چێژ وەرگرتن لە شكاندنەوە و ئازاردانی كەسانی تر, ئیتر ئەم ئازاردانە راستەوخۆ بێت یان ناراستەوخۆ, جەستەیی بێت یان دەروونی، وە یان هەردووكیان پێكەوە, كە دەروونزانان بەو جۆرە كەسایەتیانە دەڵێن كەسایەتی سادیسم, كە بە جۆرێك لە نەخۆشی دەروونی هەژمار دەكرێت و بۆ چارەسەركردنیشی رێكاری تایبەتی لە لایەن پزیشكی دەروونییەوە دەگیرێتە بەر.
3.یەكتر قەبووڵ نەكردن : ئاستی یەكترقەبووڵكردن و پێكەوە ژیانی ئاشتیانەی پێكهاتە جیاجیاكانی هەر جڤاكێك، پەیوەندییەكی راستەوخۆی بە ئاستی رۆشنبیری تاكەكانی هەمان كۆمەڵگاوە هەیە، پێچەوانەكەشی ڕاستە، بۆیە لە جڤاكی پێشكەوتوودا هاوتەریب لەگەڵ بەرزی ئاستی رۆشنبیری تاكەكان, رادەی یەكترقەبوڵكردن و پێكەوەژیانی ئاشتیانەش لە ئاستێكی بەرزدایەو، بە پێچەوانەوە لە جڤاكی دواكەوتوودا بە داخەوە مرۆڤایەتی رۆژ بە رۆژ زیاتر شاهیدی شەڕ و ئاژاوە و توندوتیژی و كۆشتار و شكاندنەوەو چاوسووركردنەوە دەبێت".

زۆرترین بینراو