لەگەڵ گەشەی دیمۆگرافی و نیشتەجێ بوون سۆران خزمەتی زیاتری پێویستە

كەیفی شەمزینی
لەگەڵ بەردەوامبوونی رەوتی ژیان و گەشەی دانیشتووان، بێ گومان خواست و پێویستیەكانی تاك و گۆمەڵگەش لە رووی ژیان و خزمەتگوزاری و كۆمەڵایەتی و ئیداریش؛ روو لە زیادبوون دەكات، حەوزی سۆران بە پێی هەڵكەوتەی جوگرافیی بە بەراورد لەگەڵ چەند ساڵی رابردوو هەم لە رووی دیمۆگرافی و هەمیش لە رووی نیشتەجێ بوون بەرفراوانییەكی زۆر و بەرچاوی بەخۆیەوە بینیوە، بێ شك لەگەڵ ئەم قۆناغە نوێیە خواست و پێویستیەكانی هاووڵاتییانیش بەتایبەتی لە بواری كۆمەڵایەتی و ئیداری بەرەو هەڵكشان چوون، بۆیە لە پێناو كارئاسانی هاووڵاتییان و رایی كردنی مامەڵە یاسایی و ئیدارییەكان، كردنەوەی بەڕێوەبەرایەتییە گشتییەكان و ئەم فەرمانگانەی پەیوەستن بە كاری رۆژانەی هاووڵاتییان زۆر گرینگە لە دەڤەری سۆران بوونیان هەبێت و بكەونە خزمەتی خەڵكەكەوە.
تا رادەیەك گەشبینم كە لە چوارچێوەی سیاسەتی حوكمڕانی كابینەی نوێی حكومەتی هەرێم بەشێك لەو فەرمانگەو بەڕێوبەرایەتییانە لە دەڤەرەكەدا بكرێنەوە، جگە لەوەش بە هۆی پێگەو گرنگی دەڤەرەكە لە رووی مێژوویی و بازرگانی و گەشتیاریی، دەڤەری سۆران شایانی ئاوڕدانەی زیاتر و ئاوەدانی باشترە لە پێناو بەرجەستەكردنی واقعێكی گونجاوتری ژیانی گشتی لەم دەڤەرە ئازیزەدا.
حەزدەكەم لێرەدا ئاماژە بەوەش بكەم ساڵی 1999 دەنگۆی بەپارێزگابوونی سۆران لەتەك چەند قەزایەكی دیكەی كوردستان هەبوو، من ئەو كات لە چوارچێوەی راپۆرتەكانم بۆ كوردستان تی ڤی چەندین جار ناوی سۆرانم وەك پارێزگا هێناوە كە شانازی پێوەدەكەم، چونكە جگە لەوەش خۆم خەڵكی دەڤەرەكەم و بەشێكی زۆری تەمەن و ژیانی تایبەتی و قۆناغی كارەكەشم لەو دەڤەرە بەسەربردووە، ئیتر بەرەو گەشاوەتر وجوانتربوونی دەڤەری سۆرانی ئازیز.

بابەتى پەیوەندیدار بیروڕا

زۆرترین بینراو