لە خەونێكی بچووكەوە بۆ گەورەترین بڕاند

لە خەونێكی بچووكەوە بۆ گەورەترین بڕاند

دیمانە: هۆژین شەوكەت- ئەڵمانیا
بوونی ئافرەت لە كارە سەختەكانی وەك دانانی بڕاندێكی تایبەت بە خۆی كمە، بەڵام بەشێكی ئافرەتان هەوڵیان داوە گەر بە كارێكی بچووكیش بێت بڕاند و كاری تایبەت بە خۆیان هەبێت، وەك ژیا كەمال كە لە خەونێكی بچووكی خۆیەوە گەیشت بە گەورەترین بڕاندی بۆنی كوردی، ئەو ئێستا بە هەموو هەوڵ و توانای خۆی كاردەكات بۆ ناساندن و بەرەو پێشبردنی كارەكانی و ناساندنی ئەم بڕاندەی.
ژیا كەمال لە سلێمانی لەدایكبووە ئێستا دانیشتووی وڵاتی ئەڵمانیایە، ئەو بۆ زاری كرمانجی باسی لە هەوڵ و ماندووبوونەكانی كرد بۆ گەیشتنی بەم رۆژە و گووتی" لەبەر چەند هۆكارێك پێم نەكرا لە كوردستان درێژە بە خوێندنەكەم بدەم، ماوەی ١٧ ساڵە لە وڵاتی ئەڵمانیا دەژیم بەڵام لەوێ درێژەم بە خوێندنەكەم دا لە بواری بزنس خوێندنم تەواوكرد، ماوەی ٧ ساڵە لە وڵاتی ئەڵمانیا لەگەڵ كۆمپانیایەكی بەرهەمهێنانی بۆن كاردەكەم و ماوەی ٣ ساڵ بەشێوەیەكی ئەكادیمی لەم بوارەدا خوێندوومە، دوای بەردەوام بوونم لەسەر كارەكەم كە رۆژانە ئەم كارەم دەكرد هەستم كرد دەتوانم زیاتر پەرە بدەم بە خۆم و دەتوانم بیكەم بە پیشەی خۆم، چونكە ماوەی چەند ساڵێكە لەم بوارەدا كاردەكەم و زانیم دەتوانم بە شێوەیەكی باش بەرهەمی باشم هەبێت و بڕیارم دا وەك ئافرەتێكی كورد ئەم كارە بكەم و وەك هەموو ئافرەتێكی تری جیهان توانای ئەوەم هەیە، بیرم كردەوە بۆچی هەڵنەستم بە دروستكردنی بۆن بە ناوێكی كوردی بۆ وڵاتی خۆم، سەرەتا نەمویست بە ناوی ژیا بێت، بیرم لێنەكردبۆیەوە بەڵام دوای ئەوەی پرسیارێكی زۆرم كرد لە هاورێ و كەسە نزیكەكانم هەموو ئاماژەیان بەوەدا ناوێكی كورت و خۆشە و خۆت ئەم كارە دەكەیت و بەرهەمی خۆت دەبێت بۆچی بە ناوی تۆە نەبێت منیش بڕیارم دا بەم ناوە بڕاندەكەم بناسێنم، جگە لە خوا هیچ كەسێك و لایەنێك پاڵپشتم نەبووە تەنانەت كەسە نزیكەكانیشم هاوكارم نەبوون، بە پشت بەستن بە خۆم و تواناكانم جگە لە خۆم كە هەستاوم بە دروستكردنی ئەم براندە تەنها ئەو كۆمپانیایەی كارم تێیدا دەكرد رێگەیان پێدام بەرهەمەكانم لەوێ دروست بكەم، جگە لەم كارە هیچ كارێكی تر ناكەم هەمیشە ویستوومە لەم بوارەدا كاربكەم و ببمە خاوەن بەرهەمی تایبەت بەخۆم، سەرەتای دەستپێكردنیشم بە كار هەر ئەم بوارە بووە و خۆشەویستییەكی زۆرم بۆ كارەكەم هەیە ئەمەش وایكردووە ئێستا ببم بە خاوەنی بڕاندی تایبەت بە خۆم".
ژیا باسی لە شێواز و جۆری بۆنەكانی كرد و گووتی" ٢٦ جۆری بۆن بەرهەم دەهێنم، ١٠ جۆریان تایبەتە بە پیاوان و ١٦ی تایبەتە بە ئافرەتان، هەمووی بۆنە و هیچ جۆرێكی تری نییە، هەر لەو كۆمپانیایەی كارم تێیدا كردووە گرێبەستم لەگەڵیان كردووە پێكەوە بڕیارمان دا لەوێ بۆنەكانم دروست بكەم و بیان نێرمەوە بۆ كوردستان، هەموو دیزاین و شێوازەكانی تایبەتە بە خۆم هەر خۆم كاری لەسەر دەكەم بۆنەكەش هەموو ماددەكان خۆم بەدەستی دەهێنم، دوای بەرهەمهێنانی بۆنەكان و تەواو بوونیان دەیان نێرمەوە بۆ كوردستان لە شارەكانی هەولێر، كەركوك و سلێمانی بەر دەستە، لە سلێمانی دووكان و ئۆفیسی تایبەتی خۆم هەیە لە هەولێریش لەگەڵ هاورێیەكم كە دووكانی بۆنی هەیە بۆم دەفرۆشێت، بە رادەیەكی زۆریش خەڵك لە رێگەی ئۆنڵاینەوە داوای دەكات زۆربەیان پێم دەڵێن ناتوانین بێینە دەرەوە شێواز و جۆری بۆنەكەم پێدەڵێن بە پێی حەزی خۆیان من بۆنم بۆیان ناردووە، گەیاندنمان هەیە هەموو ئەوانەی بۆم ناردوون دەستخۆشییان لێكردووم زۆرجار پێم دەڵێن بڕوامان نەدەكرد بۆنەكانت بەم شێوەیە تایبەت بن ئەمەش زیاتر هێزم پێدەدات و واملێدەكات زیاتر كارەكەم پەرە پێبدەم، خەڵك زۆر لە كارەكەم رازی بووە هەمیشە پشتگیریم دەكەن دڵیان بەوە خۆشە كچێكی كورد بەم شێوەیە بۆنێك دروست دەكات، لە چەندین كەناڵی بەناوبانگ چاوپێكەوتنم لەگەڵ كراوە لە لایەن قوباد تاڵەبانییەوە وەك پاڵپشتی خەڵاتم پێبەخشراوە".
گووتیشی" دوو جۆر نرخم داناوە بۆ بەرهەمەكانم، بەڵام ئێستا بە هۆی كەمی مووچە و ئەم باردۆخەی ئێستا لە ئارادایە نرخی جێگیرم لابردووە و بە پێی داهاتی خەڵكەكەم نرخم داناوە و داشكاندنێكی زۆرم كردووە، لەگەڵ ئەوەش یارمەتی زۆر كەسم داوە كە نەیتوانیوە بیكڕێت و حەزی لێبووە بۆنی ژیا بەكاربهێنیت، هەموو شووشەكانم ١٠٠(ملم)ە هەوڵدەدەم لە داهاتوو گۆڕانكاری بەسەر شێوە و قەبارەی بۆنەكانم بێنم".
ئەو نەیویستووە بۆنەكانی جگە لە كوردستان بە هیچ شوێنێكی تر بفرۆشێت سەبارەت بە نەفرۆشتنی بەرهەمەكانی گووتی" بڕاندەكەم لەبەرئەوەی كوردییە و خۆم كوردم حەزم نەكردووە لە هیچ شوێنێكی تر بیفرۆشم جگە لە كوردستان، تا رادەیەكیش بۆ عێراق ناردوومە بەڵام بۆ ئێستا دەمەوێت بۆنی ژیا بە كوردی بمێنێتەوە و لە كوردستان بێت دواتر بە جیهانی بناسێنم، دەمەوێت لە داهاتوو وەك هەموو ئەو ئافرەتانەی خاوەن ماركەی تایبەتی خۆیانن بۆنی ژیا وەك ئەوانی لێبێت، ئاواتمە رۆژێك بتوانم لە كوردستان ئەم بۆنە بەرهەم بهێنم و ئەم كۆمپانیایە بهێنمە كوردستان هەلی كار بۆ چەندین گەنجی تر بڕەخسێنم و لەسەر شووشەی بۆنەكانم بنوسرێت لە سلێمانی دروستكراوە، حەز دەكەم بگەم بەو ئاستەی هەموو دنیا بۆنی ژیا بناسێت بزانن ژیا ئافرەتێكی كوردە و وەك هەموو ئافرەتێكی جیهان توانای هەیە و توانیومە براندێك دروست بكەم، داواكاریشم لە هەموو ئافرەتێكی كوردی لای خۆمان هەستن بە بەرهەمهێنانی كارە ناوخۆیەكانی لای خۆمان، هەركەسێك توانایەكی هەبێت بیكات بە پیشەی خۆی بە بێ ترس و كاریگەری قسەی هیچ كەسێك چاو نەترس و بەهێز بن، دڵنیا بن هەر كاتێك دەستت كرد بە كارەكە خۆت لە ناو كارەكە دەبینییەوە، من لە مەندووبی دەستم پێكرد و ئێستاش خاوەن بڕاندی تایبەت بە خۆمم بۆ داهاتووشم خەونی گەورەم هەیە".

زۆرترین بینراو