لە دەڤەری بارزان ئەمساڵ دروستكردنی روبە هەنار زیادیكردووە

لە دەڤەری بارزان ئەمساڵ دروستكردنی روبە هەنار زیادیكردووە

رەمەزان هەرنی – دەڤەری بارزان
روبە هەناری دەڤەری بارزان یەكێكە لە تام و چێژە هەرە تایبەت و لەیادنەكراوەكانی ناوچەكە، بە ئەرك و ماندووبونێكی زۆر لەلایەن خەڵكی دەڤەرەكەوە بەرهەم دەهێنرێت و بەچەندین قۆناخی جیاوازدا تێدەپەرێت تا دەگاتە بازار و سفرەی خوان.
مەلا عەبدوڵا باغەوانێكی دەڤەری بارزانە بە زاری كرمانجی گووت:" دوای ماندووبونێكی زۆر كە چەندین رۆژ دەخایەنێت، سەرەنجام روبە هەنارێكی سروشتی و خۆماڵی بەرهەمدەهێنرێت و دەگاتە سەر سفرە و خوانی خەڵكی، ئەو هەنارەی لە باخە هەنارەكانی دەڤەری بارزان كۆدەكرێتەوە، بە رەنج و ماندوبونێكی زۆر دەچنرێت و دەنكەكەی لە توێكڵەكەی جیادەكرێتەوە، دواتر دەنكە هەنارەكە دەكرێنە گینیەكەوە و لە حەوزێكدا كە بۆ ئەم مەبەستە ئامادەكراوە دادەنرێن و دەشێلدرێن و ئاوەكەی دەردەكرێت، ئاوەكەو هەنارەكە لەیەكتر جیادەكرێنەوە و ئاوەكەی دەپالێورێت بۆ ماوەی پێنچ كاتژمێر دەكۆڵێنرێت، دواتر سارد دەكرێتەوەو دەخرێتە شووشەی تایبەت و دەخرێتە بازاڕەوە".
حاجی ئەحمەد بەرهەمهێنەرێكی تری روبە هەنارە بە زاری كرمانجی گووت:" هەنارە شەقبردووەكان دەهێنینە ماڵەوە، دەنكەكەی لە توێكڵەكەی جیادەكەینەوە، دوای گرتنی ئاوەكەی لە تەشتێكدا و بۆ ماوەی پێنچ كاتژمێر كۆڵاندنی و سارد كردنەوەی كارێكی زۆر سەختە گەر رەنجی ماندووبونەكەی نەبینیت و ئەم ماندوبوونە بەرهەمێكی نەبێت زۆر ناخۆشە، هەمیشە ئێمە و خێزانەكەمان ئامادەكاری دەكەین بۆ زستان، لە ماڵی خۆمان روبە هەنار بەرهەم دەهێنین، بەشێكی بۆ خۆمانەو بەشێكی تریشی بۆ فروشتنەو بەمە بژێوی ژیانمان پەیدا دەكەین، ئەمە بەرهەمێكە لە كونەوە تاكوو ئێستا لە بەرهەمهێنانی بەردەوامین، هەوڵ دەدەین ئەم كارە بەردەوامی پێبدەین و وازی لێنەهێنین بۆ ئەوەی بەرهەمی خۆماڵی لەناونەچێت".

زۆرترین بینراو