لە دەڤەری سۆران رووداوەكانی سووتان لە هڵكشانە

لە دەڤەری سۆران رووداوەكانی سووتان لە هڵكشانە

موڕشید برادۆستی – سیدەكان: ساڵانە لە وەرزی هاوین بەهۆی بەرز بوونەوەی پلەكانی گەرما و ئاگر كەوتنەوە پووش و پاوانێكی زۆری هاووڵاتییانی دەڤەری سۆران دەسووتێ و زەرەر مەندی ماددی دەبن .
لە ماوەی حەوت رۆژی رابردوودا، لە سنووری بەڕێوەبەرایەتی بەرگری شارستانی سۆران، نزیكەی 20 رووداوی سووتانی دەخل و دان و سووتانی ماڵان تۆمار كراوە و بەو هۆیەوە سەدان دۆنم زەوی سووتاوە .
ئەمە لە كاتێكدایە، 58 گوندی دەشتی هێرتی سیدەكانیش بە دەست نەبوونی تیمێكی ئاگر كوژێنەوە دەناڵێنن و تا ئێستا بێبەشن لە تیمێكی بەرگری شارستانی .
عەبدوڵڵا شێخۆ موختاری گوندی نزاریە لە سنووری دەشتی هێرتێی سەر بە ناحیەی سیدەكان بە زاری كرمانجی راگەیاند" تەنها لە سنووری دەشتی هێرتێ 58 گوندی ئاوەدان هەیە، كە گوندەكان چەندین كیلۆمەتر لە شارەدێی سیدەكانەوە دوورن، بۆیە ئەم دەڤەرە زۆر پێویستی بە بنكەیەكی بەرگری شارستانی هەیە، بۆ كۆنتڕۆڵ كردنی هەموو روداوێكی نەخوازراو كە لەو سنوورە رووبدات .
موختاری نزاریە گووتی" لە سنووری دەشتی هێرتێ هەر رووداوێك رووبدات بەتایبەت سووتان، گومان لەوە دانیە تا تیمەكانی بەرگری شارستانی سیدەكان دەگەنە شوێنی مەبەست، ئەوا كار لەكار دەترازێ! هۆكارەكەش دووری رێگایە نەك كەمتەر خەمی بەرگری شارستانی سیدەكان، بۆیە بە پێویستی دەزانین بۆراچاوكردنی بەرژەوەندی گشتی هاووڵاتییان، حكومەت هەر نەبێت تیمێكی تایبەت و ئۆتۆمبێلێكی ئاگركوژێنەوەمان بۆ دابین بكات، ئێمەش وەك هاووڵاتییانی گوندی نزاریە بەهەموو شێوەیەك هاوكارییان دەكەین بە پێدانی خانوو بەتەواوی پێویستیەكانیەوە لە نزیك دام و دەزگاكانی دیكەی حكومەت لە نزاریە، ئامادەشین بۆ هەر هاوكاریەكی لە توانامان دابێت ئەنجامی بدەین، تەنها تیمێكی ئاگركوژێنەوەمان بۆ دابین بكرێت.
لەبارەی دابین كردنی تیمێكی ئاگر كوژێنەو بۆ گوندەكانی دەشتی هێرتێ، عیماد رێكانی بەڕێوەبەری بەرگری شارستانی سۆران بە زاری كرمانجی راگەیاند" لە نزیكەوە ئاگادارین لە گرفتی نەبوونی بنكەیەكی بەرگری شارستانی لە دەشتی هێرتێی سەر بە سیدەكان كە سنوورێكی یەكجار فراوانیان هەیە، لە ئێستەدا توانای كردنەوەی بنكەمان نییە، بەڵام ئەگەر بێتوو میلاكات لە پۆلیس لە سیدەكان دابین بكرێت، ئەوا ئێمە دەتوانین وەكو بەڕێوەبەرایەتی سۆران تانكەری ئاو و گازوایل و پێداویستیە ماددیەكانیان بۆ دابین بكەین، بە مەبەستی كۆنتڕۆڵ كردنی رووداوەكان لە ماوەی رابردوو، بنكەیەكی تری بەرگری شارستانیمان بە تەواوی پێداویستیەكانەوە لە دەڤەری باڵەكایەتی كردۆتەوە و ئەوان هاریكارن لە كۆنتڕۆڵ كردنی رووداوەكانی سووتان، خنكان ، رزگار كردنی هاووڵاتییان .
زیاتر گووتی " رۆژ بە رۆژ رووداوەكانی سووتان روو لە بەرز بوونەوە دەكات ئەمەش بۆ چەند هۆكارێك دەگەڕێتەوە لەوانە، بەهۆی پاشماوەی ئاگر هەڵكرتن، یا فڕێ دانی جگارە و چەند هۆكارێكی تر وادەكات پوش و پاوان و دەخل و دانی هاووڵاتییان بسووتێت و زەرەر مەندی ماددی ببن .
گووتیشی" تیمەكانمان بەردەوام لە حاڵەتی ئامادە باشیدانە و لە ماوەی یەك هەفتەدا توانیوایانە كۆنتڕۆڵی زیاتر لە 20 رووداو ئاگر و سووتا بكەن .

 

بیروڕا

زۆرترین بینراو