لە رواندز گۆڕی شەهیدێكی داستانی هەندرێن هەڵدەدرێتەوە و پۆلیسی ناوچەكە بێ ئاگایە لە رووداوەكە

لە رواندز گۆڕی شەهیدێكی داستانی هەندرێن هەڵدەدرێتەوە و پۆلیسی ناوچەكە بێ ئاگایە لە رووداوەكە

موڕشید برادۆستی– رواندز: لە گوندێكی سنووری قەزای رواندز گۆڕی شەهیدێكی داستانی هندرێن هەڵدەدرێتەوە و كەس و كارەكەی نیگەرانی دەردەبڕن و پۆلیسی ناوچەكەش دەڵێت" لەسەر ئەو رووداوە هیچ زانیاریمان نییە و كەس سكاڵای تۆمار نەكردووە.
دەڤەری سۆران كە هەر چوار قەزای سۆران، مێرگەسۆر، رواندز، چۆمان دەگرێتەوە دەوڵەمەندە بە ناوچەی شوێنەواری و ئەو دەڤەرەش یەكێك لە گرنگترین ناوچە لە رووی شوێنەواریەوە بەگشتی 900 ناوچەی شوێنەواری لە دەڤەری سۆران بە فەرمی تۆمار كراوە و دەیان ناوچەی شوێنەواریش دەكەونە سنووری سیدەكان و شوێنەواری زیاتریش هەیە هێشتا تۆمار نەكراون .
ماوەیەك بەر لە ئێستاش لە ناحیەی سیدەكانی سەر بە قەزای سۆران، گۆڕی چەند گۆڕستانێكی ناوچەكە لە ڵایەن كەسانی نەناسراو هەڵدرایەوە و بەپێی زانیاریەكانی دەست زاری كرمانجی كەوتوون، مەبەست لە هەڵدانەوەی گۆڕستانەكان، گەڕان بووە بەدووای دۆزینەوەی پارچە شوێنەوار و دۆزینەوەی زێڕ و شتی گرانبەها بوون .
كارۆخ تاهر هاووڵاتییەكی دانیشتووی گوندی دەرگەلەیە لە سنووری رواندز بە زاری كرمانجی گووت" بەداخەوە لە ڵایەن كەسانێكی نەناسراو بۆ مەبەستی تایبەتی خۆیان گۆڕی مامم شەهید " خدر عەوڵا بەگ " لە گۆڕستانی " مام شێخ هەمزە لە گوندی دەرگەڵە گۆڕەكەی هەڵدراوەتەوە و ڵایەنە پەیوەندی دارەكانیش ئاگاداری ئەو رووداوەن .
زیاتر دەڵێ" شەهید عەوڵا بەگ بەر لە 53 ساڵ وەك یەكەم شەهیدی داستانی هندرێن لە شۆڕشی ئەیلوول و لەسەر شۆڕشی كوردایەتی گیانی خۆی پێشكەش بە پاراستنی خاك و خەلكی كوردستان و ئازادی وڵات كردووە .
گووتیشی " ماوەیەكە لە گۆڕستانی گوندی دەرگەڵە دەكۆڵنەوە و خەریكە هەڵدانەوەی گۆڕەكان لە دەڤەرەكەمان دەبێتە دیاردە، ڵایەنە پەویەندی دارەكانیش تا ئێستا هیچ كەسیان لەسەر هەڵدانەوەی گۆڕ دەستگیر نەكردووە، لە كاتێكدا بەم جۆرە كارانە ئێمەی كەس و كاری شەهیدان و ئەو تەرمانەی لە گۆڕستانەكان هەڵدەدرێنەوە نیگەرانین و وا هەست دەكەین تازە مام و كەس و كارەكانمان شەهید بوونە، داواشی كرد، بە زووترین كات ئەم كەسانە بدۆزنەوە و بە ڕێكاری یاسایی توندترین سزایان بدرێت، بەداخەوە بتوانیت بچیت گۆڕی كەسێك هەڵبدەیتەوە كە خوێنی خۆی بەتۆ بەخشیبێت و تۆ ئێستا لە سایەی ئەو ئەم ئازادیەی ئێستات هەبێت...بەداخەوە مرۆڤایەتی لە وڵاتی ئێمەدا لە قەیراندایە
لەوبارەیەوە، شەماڵ دێواری گووتەبێژی بەڕێوەبەرایەتی پۆلیسی سۆران بە زاری كرمانجی راگەیاند" تا ئێستا لەسەر هەڵدانەوەی گۆڕی شەهید و هاووڵاتییان، لە سنووری رواندز ئێمەی ئاگادار نەكراوینەتەوە و هیچ سكاڵایەكی لەو جۆرەمان بە دەست نەگەیشتووە، هەركاتێكیش سكاڵامان بە دەست بگات بێگومان بە دوواداچوون دەكەین و تۆمەتباران رووبەڕووی دادگا دەكەینەوە، بە مەبەستی وەرگرتنی سزای پێویست .
لە شەوی 2 لەسەر 3ی مانگی 5ی ساڵی 1966 سوپای عێراق بەهێزێكی زۆری زەمینی و ئاسمانی بەئامانجی دامركاندنەوەی شۆڕشی ئەیلوول بە رابەرایەتی مەڵا مستەفای بارزانی، لە رواندزەوە هێرشی كردە سەر هێزی پێشمەرگەی كوردستان كە چیای هەندرێن جێگیر بوون، دووای 10 رۆژ لە ئێوارەی رۆژی 12 – 5 – 1966 پێشمەرگە بە سەركردایەتی راستەوخۆی ئیدریس بارزانی هێرشیان كردە سەر ئەو هێزەی سوپای عێراق توانیان بە كەمترین زیان زۆرترین دەستكەوت و سەركەوتنی گەورە بەدەست بێنن، لە شۆڕشەكەدا هێزی پێشمەرگە سێ شەهیدی بەخشی یەكێك لەوان شەهید خدر عەوڵا بەگ بوو .

زۆرترین بینراو