لە سبەینێوە هەندێک ئاسانکاریی بۆ هاووڵاتیان دەکرێت

لە سبەینێوە هەندێک ئاسانکاریی بۆ هاووڵاتیان دەکرێت

رێبەر ئەحمەد، وەزیری ناوخۆی حکومەتی هەرێمی کوردستان لە دوای کۆبوونەوەی باڵای رووبەڕووبوونەوەی ڤایرۆسی کۆرۆنا لە کۆنفراسێکی رۆژنامەوانییدا رایگەیاند، هیچ نیازێکمان نییە قەدەغەی هاتووچۆ درێژ بکەینەوە، بەڵکو ئاسانکاریی دەکەین بۆ هاووڵاتیان.

راشیگەیاند، لەبەر گوزەرانی خەڵک زۆربەی شوێنەکان کرانەوە، بەڵام نایشارینەوە کە خەڵک پابەند نەبووە.

رێبەر ئەحمەد گووتی، لە ماوەی چەند رۆژی رابردوو ئەوە سەلمێنرا کە ڤایرۆسی کۆرۆنا لە هەرێمی کوردستان هەمان ڤایرۆسی دەرەوەی هەرێمە و زۆربەی حاڵەتە نوێیەکان نیشانەیان هەیە.

دووپاتیکردەوە، هەرکەسێک هانی خەڵک بدات پابەند نەبێت و بڵێت، حکومەت بۆشاردنەوەی هەندێک شت رێکارەکانی راگەیاندووە، ئەوا دووچاری رێکاری یاسایی دەبێتەوە.
وەزیری ناوخۆ رایگەیاند، بڕیارماندا دەسەڵات بدەینە پارێزگاکان ئاسانکاریی بکەن و هەندێک سێکتەر بکەنەوە.

دووپاتیشکردەوە، ئەگەر پابەندیی نەبێت هاوشێوەی عێراقمان لێدێت و دۆخەکە زۆر مەترسیدار دەبێت.

ئەوەشی خستەڕوو، خەڵکی بازرگان کە کەناڵی راگەیاندیان هەیە هەوڵدەدەن خەڵک بێنە سەر شەقام و کەموکورتییەکانیان بشارنەوە.

وەزیری ناوخۆ هاووڵاتیانی دڵنیا کردەوە لەوەی، حکومەتی هەرێمی کوردستان خۆی کردووەتەوە قوربانی تاوەکو ژیانی هاووڵاتیان پارێزراو بێت، ئەو کەسانەی ئێستا رەخنە دەگرن، ئەگەر حکومەت مووچەی لە بەرامبەر ژیانی هاووڵاتیان هەڵبژاردایە، هەمان ئەو کەسانە، رەخنەی تووندیان لە حکومەت دەگرت.

زۆرترین بینراو