لە سنووری سلێمانی ڕقهەڵگرتن لە پارتی بە بەرنامە كراوە

لە سنووری سلێمانی ڕقهەڵگرتن لە پارتی بە بەرنامە كراوە

زاری كرمانجی: فارس نەوڕۆڵی، وتەبێژی ئەنجوومەنی سەركردایەتی پارێزگای سلێمانی-هەڵەبجەی پارتی دیموكراتی كوردستان لە دیمانەیەكی زاری كرمانجیدا تیشك دەخاتە سەر ئەو بیركردنەوە چەقبەستووەی هەندێك لە بەناو رۆشنبیر و مێدیاكانی سنووری پارێزگای سلێمانی بەرانبەر بە حكوومەت و پارتی دیموكراتی كوردستان و دەڵێت: ئەمە بووەتە مۆدێلێك لە رق، ئێستاش لە سەردەمی ماس مێدیادا ئەم رقهەڵگرتنە لە پارتی گەیشتووەتە لووتكە".
نەورۆڵی پێشی وایە" ئەم جۆر و شێوازە لە بیركردنەوەیە كورد بەرەو كارەسات دەبات و دەبێت چارەسەری ئەم كێشە ترسناكە بكەین".
دیمانە: كەریم سمكۆ
*بەردەوام لە سنووری سلێمانی و هەڵەبجە بەناو رۆشنبیر و مێدیاكان، رقێك لە پارتی هەڵدەگرن، كەچی بە نیشتیمان و حكوومەتی هەڵدەرژن، بۆچی؟
- ئەمە ڕەگ و ڕیشەی مێژووی هەیە، ئەم رق و كینەیە پەیوەندی بەو شەڕە فەرهەنگییەوە هەیە كە لە ڕێگایەوە دوژمنانی كورد دەسكاری كۆدی پەروەردەی كوردیان كردووە، ئیتر وایان لێكردووین كە ئێمە ڕقمان لەیەكتری بێت، بەداخەوە كە لە مێژووی نوێ دا لە شەستەكانی سەدەی رابردووەوە بەفیتی دوژمن ترازان، كە بەناو شۆڕشی كورددا لە باشوور رودەدا ئیتر ئەم ترازانە نابێتە جیاوازی، بەڵكو دەبێتە مۆدێلێك لە ڕق، ئێستاش لە سەردەمی ماس میدیادا ئەم ڕقە لە پارتی دەگاتە لوتكە و كێشەی سەرەكی دەبێتە ڕق بوون لە پارتی نەك داگیركەران، بەهەرحاڵ ئەمە نامانگەیەنێتە ئامانج دەبێ چارەسەری ئەم ڕق بوونەوەی یەكدی بكەین.
*دروستكردنی ئەم هزرە دوژمنكارانە بەرانبەر بە هەستی كوردایەتی و نیشتیمانپەروەری تاچەند مەترسییە بۆ داهاتووی كوردستان و بۆ بونیادنانی تاكێكی نیشتیمانپەروەر؟
- ئیدی ئەمە كێشە سەرەكییەكەیە، ئەمجۆرە لەبیركردنەوەیە كورد بەرەو سەرەولێژبوونەوەی كارەساتبار دەبات، گەنج وا رادەهێندرێت رقی لە نیشتمان بێت بۆ مەرامی حزبی.
*دەكرێ لە پاڵ ململانێی حزبایەتی، گەنجان رابهێندرێن رقیان لە خاك و كولتوور و دروشم و ئاڵا بێت؟ دەبێت چۆن سەرەدەری لەگەڵ ئەم بابەتە بكەین؟ چۆن راستی بكەینەوە و گەنجان لێی تێبگەن؟
- ئەوە فەزای گشتی و ناعەدالەتییە گەنجان وا لێدەكات، چونكە ناعەدالەتی، ناهاڕمۆنی دروست دەكات، بۆیە گەنجان گەیشتوونەتە ئەمجۆرە بیركردنەوەیە، هەرچەندە پێموایە گەنجان كاتێك نیشتمان بگاتە مەئزەق نیشتمان هەڵدەبژێرن، ئیدی نموونەی زۆرمان لەو بابەتە هەیە، شەڕی دژی داعش ئەم ڕاستییەی سەلماند ئەو هەموو گەنجە خۆبەخشە گیان لەسەر دەستانە چوونە مەیدانی شەڕ بۆ بەرگریكردن لە خاكی پیرۆزی كوردستان.
*رەگی ئەم دووبەرەكییە لە كوێ داكوتراوە، كە ئێستاش بەناوی (هەرێمی پارێزگای سلێمانی) پڕۆژە دەنووسرێتەوە بۆ لەتبوونی هەرێمی كوردستان؟ ئایا ئەم پڕۆژەیە بۆ ئەوەیە ئاراستەیەك لە پشتییەوەبێت و خەڵك بێ ئیرادە بكەن؟
- ئەگەر كتێبی شەرەفنامەی شەرەفخانی بەدلیسی بخوێنینەوە تێدەگەین ڕەگەكەی لە كوێدایە.
*بۆچی هەمیشە یەكێتی لە پشت رووداوەكان وەك ئۆپۆزسیۆن دژی حكوومەت و بەتایبەتی كابینەی نۆیەم دەجوڵێتەوە و مامەڵە دەكات، كەچی خۆی لە حكوومەتدایە و شەریكە بەشییەتی؟
- ئەم پرسیارە دەبێ لە تیمی یەكێتی بكرێت لەناوحكومەت، دەبێت ئەوان وەڵامی ئەوەیان پێبێت.
*هەمیشە گلەییی ئەوە لە پارتی دەكرێ، لە نزیكەوە مامەڵەیەكی دروست لەگەڵ دەستەی سەرۆكایەتی یەكێتی ناكات، چارەسەر چییە بۆ ئەوەی یەكێتی و پارتی زیاتر لە جاران لە یەكترەوە نزیك بن بۆ تێپەڕاندنی هەموو ئەو كێشانەی لە نێوانیاندا هەیە، چی بكرێت؟
- پێویستە هەموو لایەك بیركردنەوەی بەقەد گەورەیی كێشەی كورد گەورە بێت، ئەگینا هیچ بەهیچ ناكەین و هەمیشە دەبێت لە ململانێدا بین بۆ ئەوەی یەكتری بشكێنین، یەكدەستی و یەكدەنگی لەسەر پرسە چارەنووسسازەكان دەمانگەیەنێتە ئامانج.
*ئەركی پارتە سیاسییەكانی كوردستان، بەتایبەتی یەكێتی و پارتی چییە بۆ ئەوەی بە بیركردنەوەیەكی گشتگیر بتوانن تاكی كورد پەروەردە بكەنەوە؟ بە واتایەكی تر پارتی و یەكێتی چ ئەركێكیان لەسەر شانە بۆ ئەوەی پێكەوە گیانی یەكتر قبوڵكردن و گیانی قبوڵكردنی را جیاوازەكان لای تاكی كورد بهێننەوە چوارچێوەی ئاساییی خۆی.
- ئەمە جەوهەری چارەسەری كێشەكانە، ئەركی پەروەردە كردن ئەركی هەموو لایەكە لە خێزان، لە قوتابخانە، زانكۆ، پەروەردە تەنها دارا دوو داری دی نییە، بەڵكو پرۆسەی تەمەنە، بەڵام پەروەردە لە كوردستان لەسەرەولێژبوونەوەیەكی ترسناك دایە، دەبێت هەموو لایەك بیری لێبكاتەوە كە چی بكەین، ئەمەش ئەقڵی دەوێ و خەڵكی پسپۆڕی دەوێ. بۆ پارتەكانیش بەهەمان شێوە دەبێت یەكتری قبوڵ بكەن و بگەڕێنەوە سەر مێزی دیالۆگ و گفتوگۆ بۆ چارەسەری هەموو ئەو كێشانەی كەڵەكە بوونە، دەبێت لە ئاست ئەو قوربانیدان و خۆڕاگری و متمانەیە بن كە گەل پێیانی بەخشیون.

زۆرترین بینراو