لە سۆران بە ئۆتۆمبێلی تایبەت كاری گواستنەوەی هاووڵاتییان دەكرێت

لە سۆران بە ئۆتۆمبێلی تایبەت كاری گواستنەوەی هاووڵاتییان دەكرێت

موڕشید برادۆستی – سۆران : لەنێو بازاری قەزای سۆران هاووڵاتییان رۆژانە بە ئۆتۆمبێلی تایبەت هاوشانی تاكسیەكان كاری گواستنەوەی هاووڵاتییان و سەرنشینان دەكەن، ئەمەش بووەتە جێگەی نیگەرانی لای خاوەن تەكسیەكان. بەڕێوەبەری گواستنەوە و گەیاندنی سۆرانیش دەڵێت" راچاوی ژیان و گوزەرانی ئەو هاوولاتییانە دەكەین كە كاری تەكسی دەكەن، ئەگەرنا سەرپێچیە لە یاسا و رێنمایەكانی گواستنەوە .
سۆران لە رووی كارگێڕیەوە سەر بە پارێزگەی هەولێرە، زیاتر لە 200 هەزار كەس لەو قەزایە نیشتەجێیە، بەپێی ئامارێكی نوسینگەی گواستنەوەی سۆران زیاتر لە 400 تاكسی و پەنجا پاس كاری گواستنەوەی هاووڵاتییان بۆ هێلەكانی دەرەوە دەكەن و ناویان تۆمار كراوە، ئەمە لە كاتێكدایە، سۆران و دەورووبەری زیاتر لە 70 هەزار ئۆتۆمبیلی بەگشت جۆرەكانیەوە هەیە .
رەعد سەردار گەنجێكی خێزانداری دانیشتووی گەڕەكی بەختیاری سۆران بە زاری كرمانجی گووت " بەهۆی خراپی باری داراییمان نەمان توانیوە ئۆتۆمبێلەكەم كە جۆری ئۆپل فیكترا مۆدیل " 1993 " بیگۆڕم بۆ ئۆتۆمبێلێكی مۆدێل تازە، بەڵام ئەوەی گرنگە رۆژانە بڕە پارەیەك بە ئیشی تاكسی پەیدا بكەم كە بەشی بژێوی ماڵ و منداڵم دەكات . گووتیشی" تا ئێستا كەس رێگری لە كاركردنی تاكسیم نەكردوە یا داوای گۆڕینی ئۆتۆمبێلیان لێ نەكردووم و لە سبەینێ تا ئێوارە بەردەوامم، ئەو دەڵێ " لە ئێستادا كاری تاكسی باشترە و دەوامی فەرمانبەران ئاسایی بۆتەوە و رۆژانەمان باشە.
سەباح سەلام گەنجێكی دانیشتووی ئازادی سۆران بە زاری كرمانجی گووت" لەگەڵ فراوان بوونی سۆران، چەند ساڵێكیشە ئەو بێسەر و بەریە لە كەرتی گواستنەوە پەیدا بووە، بەداخەوە لە شوێنەكانی تر بەم شێوەیە نییە، پێویستە لایەنە پەیوەندی دارەكان بە تایبەت بەڕێوەبەرایەتی هاتووچۆ و گواستنەوە هەوڵی بنبڕ كردنی ئەو دیاردەیە بدەن و رێگە نەدەن هەموو كەس و بە هەموو جۆرە ئۆتۆمبێلێك كاری تاكسی ئەنجام بدات .
زیاتر گووتی" رۆژانە كاتێك دێیینە نێو بازاڕ نازانین كامە ئۆتۆمبێل تاكسیە و كامە تایبەتییە، چونكە ئەوانەی ئۆتۆمبێلی تاكسی نوێییان پێییە رێژەیەكی زۆر كەمن، ئەوانی تر بە هەر ئۆتۆمبێلێك كە بیانەوێ كاری تاكسی ئەنجام دەدەن، ئەمەش سیمایەكی ناشرینی بە سۆران بەخشیووە و كێشەی زۆریش بۆ هاووڵاتییانی سنوورەكەمان و بە تایبەت بۆ خەلكی شارەكانی دیكە دروست كردووە كە بۆ مەبەستی گەشتیاری یا هەر مەبەستێكی دیكە سەردانی دەڤەرەكەمان دەكەن و پێویستە بەدوواداچوونێك بۆ ئەم دیاردەیە بكرێت و بنبڕ بكرێت".
هاوكات، رزگار عەباس هاووڵاتیەكی خاوەن تاكسیە و رۆژانە كاری گواستنەوە دەكات بە بۆ زاری كرمانجی گووت " ماوەی 6 ساڵە كاری تاكسی لە سۆران دەكەم لەسەر بڕیار و رێنوێنی نوسینگەی گواستنەوە و گەیاندنی سۆران تاكسیەكی مۆدێل 2011 بە زیاتر لە یەك دەفتەر دۆلار كڕیوە، لە هەمان كات هاووڵاتی هەیە ئۆتۆمبێلی تایبەتی مۆدیل 1990ی بە نرخی 35 وەرەقە هەیە و لەگەڵ من رۆژانە كاری تاكسی دەكات و بەلكو زیاتر لە منیش كار دەكات .
بە گووتەی ئەو خاوەن تاكسیە، ئیش كردنی تاكسی لە سۆران بە شێوەیەكی جوان و یاسایی رێك نەخراوە و بێ سەر و بەری زۆری پێوەدیارە، لە سۆران هەموو كەسێك دەتوانێت بەهەر جۆرە ئۆتۆمبیلێكی تایبەت كاری تاكسی و گواستنەوە ئەنجام بدات .
شیرین مەحموود لە شاری سلێمانیەوە بۆ خوێندن ساڵی رابردوو لە سۆران بوو ئەو دەڵێ " سەرەتا كە دەچوومە بازاڕ و دەگەڕامەوە داخلی ماوەیەكی زۆر چاوەڕوانی تاكسیم دەكرد و ئۆتۆمبێلی دیكە بۆم رادەوەستان دواتر شارەزا بووم كە ئۆتۆمبێلی تایبەتیش لە سۆران هاوشێوەی تاكسیەكان كاری گواستنەوەی هاووڵاتییان ئەنجام دەدەن، ئەمەش كێشەیەكە و هەروەها دیاردەیەكی ناشرینیشە، پێویستە تاكسیەكان لە ئۆتۆمبیلی تایبەتی بگوازرێنەوە و دیار بن .
لەلای خۆشیەوە، عەلی عەبدوڵڕەحمان بەڕێوەبەری گواستنەوە و گەیاندنی سۆران بە زاری كرمانجی راگەیاند" هەموو هێلەكانی گواستنەوەی هاووڵاتییانمان ئەوانەی لە سۆران بۆ شار و شارۆچكە و شارەدێیەكانی دەرەوەی سۆران رێكخستووە بە ئۆتۆمبێلی مۆدێلی پێشكەوتوو كاری گواستنەوەی هاووڵاتییان دەكەن، بەڵام هێلەكانی ناوخۆی سۆران تا ئێستە نەتوانراوە بەباشی كۆنتڕۆڵ بكرێت و هاووڵاتییان بە ئۆتۆمبێلی تایبەت كاری گواستنەوە ئەنجام دەدەن .
بەڕێوەبەری گواستنەوە و گەیاندنی سۆران نای شارێتەوە كە ئۆتۆمبێلی دیكە بەدەر لە تاكسیەكان كاری گواستنەوە دەكەن و دەڵێ " راچاوی ژیان و گوزەرانی ئەو هاوولاتییانە دەكەین كە كاری تەكسی دەكەن، رەنگە هەموویان ئەو توانایەییان نەبێت ئۆتۆمبێلی تاكسی مۆدێل سەرووی 2010 و بەرز بكڕن، بۆیە بەو ئۆتۆمبێلە بێ كەڵك و مۆدێل كۆنانە كاری گواستنەوەی سەرنشینیان دەكەن هەرچەندە ئەمە سەرپێچیشە لە یاسا و رێنمایەكانی گواستنەوە.
دووپاتی كردەوە، بۆ بنبڕ كردنی ئەو دیاردەیە پێویستیمان بە هەوڵ و هەماهەنگی لایەنە پەیوەندی دارەكانی سۆران هەیە بە تایبەت بەڕێوەبەرایەتی هاتووچۆ .
لای خۆشیەوە، رائید دلاوەر لە تیف گووتەبێژی بەڕێوەبەرایەتی هاتووچۆی سۆران بە زاری كرمانجی راگەیاند" لە رووی رێنمای و یاساكانی هاتووچۆ ئۆتۆمبێلی تایبەت بەهیچ شێوەیەك بۆی نییە كاری گواستنەوەی هاووڵاتییان بكات و تەنها تاكسیەكان دەتوانن ئەو كارە ئەنجام بدەن ئەوانیش لە گواستنەوە و گەیاندن پێویستە ناویان تۆمار بكرێت.
گووتەبێژی هاتووچۆی سۆران نكۆڵی لەوەناكات كە ئۆتۆمبیلی تایبەت لە سۆران هاوشێوەی تاكسیەكان كار دەكەن و دەڵێت" لە زۆربەی شار و شارۆكەكانی كوردستان ئۆتۆمبێلی تایبەت كاری تاكسی و كرێ ئەنجام دەدەن، ئەم حاڵەتە تەنها لە سۆران بوونی نییە، هەرچەندە كارێكی جوان و یاسایش نییە و بە فەرمی قەدەغەمان كردوە .
ئەو بەرپرسەی هاتووچۆ ئاشكراشی دەكات، لیژنەیەكی هاوبەشمان لەگەڵ نوسینگەی گواستنەوە و گەیاندنی سۆران هەیە و چاودێری ئەو حاڵەتەی هاووڵاتییان دەكەین كە بە ئۆتۆمبیلی تایبەت كاری گواستنەوەی سەرنشینان ئەنجام دەدات و چەندین كەسیش سزادراوە، بەڵام هێشتا نەتوانراوە بە تەواوی ئەو حاڵەتە بنبڕ بكەین .

زۆرترین بینراو