لە سۆران هەندێك لە هاووڵاتیان پابەند نین بە رێنماییەكان و روو لە ناوچە گەشتیارییەكان دەكەن

لە سۆران هەندێك لە هاووڵاتیان پابەند نین بە رێنماییەكان و روو لە ناوچە گەشتیارییەكان دەكەن

محەممەد مەحموود-زاری كرمانجی : بەپێی بەدواداچوونێكی زاری كرمانجی گەنجان ناتوانن بە بەردەوامی لەماڵ بمێننەوە و پابەندی بڕیارەكانی حكوومەت بن، لەگەڵ ئەوەی قەدەغەی هاتووچۆیە ژمارەیەك خێزان و گەنجان بۆ بەسەر بردنی كاتەكانیان روویان لەدەرەوەی ماڵ كردبوو.
بەدرێژایی رێگەی گوندەكان، بادلیان، هەسنان، شێخان، سیتكان، خێزان و گەنجان دەبیندران دانیشتبوون و كاتەكانیان بەسەردەبرد، بەشێك لەو گەنجانە ئامادەنەبوون ناویان بنووسرێت بۆ زاری كرمانجی گووتیان:" ژیان لەچوار دیواری ماڵ ناچێتە سەر گەرچی حكوومەت بۆ سەلامەتی و پاراستنی گیانی ئێمە ئەو بڕیارانەی دەركردووە، بەڵام بۆ ئێمەی گەنجان ئاسان نییە لە ئەنجامی نەبوونی كافتریاو بازاڕ ناتوانین بە بەردەوامی لەماڵەوە كاتەكانمان بەرینەسەر، بۆیە هەرنەبێت ئێواران چەند گەنجێك بەیەكەوە دێینە دەرەوە و دوور لەماڵ و قەرەباڵغی دێن لەو شوێنانە كاتەكانی خۆمان بە نێرگلە كێشان و كۆنكان و یاری جۆراوجۆر دەگوزەرێنین، دووردەكەوینەوە لەدەنگوباسەكانی كۆرۆناو ترسیشمان لەو ڤایرۆسە نییە".
ئارام عەلی، كە لەگەڵ خێزانەكەی هاتبووە دەرەوە بۆ زاری كرمانجی دیاركرد:" ئێمە بۆنانی نیوەڕۆ هاتینە ئەم شوێنە بۆ ئەوەی چێژ لەدیمەنەكانی سرووشت ببینین.
ئارام ئەوەشی گوت:" من ناتوانم بەردەوام لەماڵەوە بم لەگەڵ ئەوەی حكوومەت پشووشی راگەیاندووە و قەدەغەی هاتووچۆش هەیە، بەڵام مانەوە لە ماڵ وەك ئەوە وایە كەرەنتینە كرابی، بۆیە ڤایرۆسی كۆرۆناش ناتوانێ لە ماڵ بمان هێڵێتەوە".

زۆرترین بینراو