لە كوردستان وەك پێویست هاوكاری هونەرمەندان ناكرێت

لە كوردستان وەك پێویست هاوكاری هونەرمەندان ناكرێت

شاتوو عەلی، دەرچووی بەشی بازرگانی زانكۆی ئەمریكییە لە سلێمانی، چەند ساڵێكە دەستی داوەتە هونەری زەخرەفە، وەك خۆی گووتی، هەر لە قۆناغی دواناوەندییەوە حەزی بە وێنەكێشان كردووە, ئەو كاتەش لە پێشانگای قوتابخانە بەشداری كردووە و دواتر لە ناو هەموو هونەرەكانی تردا وەك حەزێك بۆ نەخشكردن و وێنەی زەخرەفە بەهرەی هەبووە، سەرەتا بە خەنە نەخشی سەر دەستی ئەكرد، دواتر حەزی بۆ ئەو هونەرە زیاتر بووە و هەوڵی داوە لەسەر كاغەز بیكێشێت تا سەركەوتنی بەدەست هێناوە. لە دیمانەیەكی زاری كرمانجی وەڵامی پرسیارەكانی داینەوە و باسی كارەكانی كرد.
دیمانە: بەهرۆز محەمەد
‎* بۆ زیاتر فێر بوون و گەشەكردن بەشدار چەند خولت كردووە بۆ كارە هونەرییەكەت ؟
‎- بەشداری هیچ خولێكم نەكردووە، تەنها وەك خولیایەك هاوكات لەگەڵ خوێندنەكەم دەستم بۆ هونەر و وێنەكێشان برد و تا ئێرم هێناوە.
* ئەتوانی باسێكی هونەری زەخرەفەمان بۆ بكەیت؟
‎- هونەری زەخرەفە یا (ماندالا) هونەرێكی كۆنە لە هونەری ئاسیا، كە چەند شێوە و شكڵێكی ئەندازەیی لەخۆ دەگرێت, ئەم هونەرە وەك سیمبۆلێك بەكارهاتووە لە كلتووری بوودی و هیندەكاندا وەك ئامرازێكی بیركردنەوەی قوڵ و زیاتر لە سین، یابان و تیبت بەكار دەهات، لە ناو ئیسلامیشدا شتێكی باوە لە مزگەوت و باڵەخانەكاندا بەكار دێت، وەك ئاماژەم پێدا ئامرازێكی بیركردنەوەیە كە مێدیتەیشن پێ دەڵێن پێویستی بە بیركردنەوەی قوڵ و وردەكاری هەیە كە زۆر لە كەسایەتی خۆمەوە نزیكە بۆیە ئەو جەنجاڵییەی كە مێشك هەندێكجار درووستی دەكات پێم وایە بتواندرێ بكرێتە دەربڕِِِینێك یاخوود شتێكی جوانتر پشان بدرێ.
‎* چەندت كاتت پێویستە بۆ هەر كارێكت ؟
‎- بۆ دروستكردنی كارێك شێواز و قەبارە و ئەو وردەكاریانە دەور ئەبینێ كە ئەمەوێ بۆ وێنەیەك دەریبرم هەندێ جار رۆژێكی بەسە ئەشكرێ بگاتە هەفتەیەك گەر لەسەر دیوار یان شتی تر بێ زیاتریشی دەوێ.
* ماوەی چەند ساڵە ئەو كارە دەكەیت ؟
‎- ماوەی سێ بۆ چوار ساڵە پێوەی خەریكم، ماوەیەك بەهۆی خوێندنەكەمەوە دابرام، بەڵام كۆڵ نادەم لەبەر ئەوەی هونەرێكە حەزی خۆمی تیایە.
* چۆن كارە هونەرییەكانت بە بازاڕ دەكەیت ؟
‎- وێنەكانم لە رێگەی پێشانگە یاخود پەیجی فەرمی خۆم لە ئینستاگرام بازاكردنی بۆ ئەكەم.
‎* كێ هاندەر و پاڵپشتت بووە ؟
- وەك هاندەر خۆم بە دەرەجەی یەك كە كۆڵم نەداوە لە كارەكەم دواتریش خێزانەكەم و هاورێكانم هەمیشە هاوكارم بوون و پشتگیریان كردووم.
‎* بەشداری چەند پیشانگات كردووە؟
‎- مەجالێكی وام نەبووە بەشداری زۆر لە پیشانگادا بكەم، بۆیە پیشانگەیەك خۆم كردمەوە و لە دوو پیشانگاش بەشداریم كردووە، لەگەڵ مامۆستا ئەیوب لە سەنتەری گەنجان كە هاوكارێكی باشم بوو، لە كردنەوەی پیشانگاكەی خۆشم زۆر سوپاسی ئەكەم وە ئەوانی دیكەش لەگەڵ گرووپی باران بەشداریم كرد.
‎* تا ئێستا چەند كاری تەواو كراوت هەیە؟
- كارەكانم زۆرن تائێستا15-20 دانەی تەواو كراوم هەیە.
‎* پرۆژەی داهاتووت چییە ؟
- لەگەل گرووپی باران بەتەمای پیشانگە و كاری زۆر بووین، بەڵام بەهۆی ئەم نەخۆشییەی ئێستاوە هەموو كارەكان راگیراون.
* تا ئێستا هیچ كەس و لایەنێك و كۆمپانیایەك سپۆنسەری كارەكانی كردویت ؟
‎- وەك كۆمپانیا و سپۆنسەر و یارمەتی، ئەمەوێ باسی شتێ بكەم ئەم ساڵی كۆتای خوێندنم توێژینەوەیەكم كرد لەسەر هونەر و لایەنە بازرگانییەكەی توێژینەوەكەم زۆر كەسی بەناوبانگی بواری هونەری تیا بوو و راوێژم بە زۆر شارەزای بواری هونەر كرد لە كوردستان، لە كۆتاییەكەی ئەوەم بۆ دەركەوت كە لە كوردستان هیچ گرنگییەكی ئەوتۆ نەدراوە بە هونەر هەر لە هونەرمەندەكان خۆمانەوە كە نەمانتوانیوە هەتا ئێستا بازاڕی هونەرمان هەبێ و مۆزەخانە یاخوود گەلەری باشمان هەبێ بۆ كۆكردنەوەی كەسانی ناوخۆو بیانی و بۆ ئەوەی هاوكاری یەكتر بكەین، لە رووی هۆشیاری كۆمەڵگەشەوە ئەو ژیانەی كوردستان پێدای تێپەریوە ئەوەی منداڵێك ئەبینی لە ماڵەوە چەكی پێیە یاری پێ دەكا، قەڵەمی رەنگاو رەنگ و وەرەقەی پێنییە وێنە بكات.
لە لایەن حكومەت و دەوڵەمەندەكانیش نەتواندراوە وەك پێویست سەیری هونەر بكرێ كە گرنگترین شتە بۆ ناسینی وڵاتەكەمان و دروستكردنی ژێرخانی ئابووری ئەوەی كە كراوییشە هەتا ئێستا هیچ یارمەتییەكی هونەر و هونەرمەندانی نەداوە، بۆیە تا ئێستا هیچ سپۆنسەرێ نەكراوم تەنها خۆم كارم كردووە و هەموو شتێ لە ئەستۆی خۆم بووە.

زۆرترین بینراو