لە یارییەكدا سەرهەنگ دژی هەولێر دەجەنگێ 

لە یارییەكدا سەرهەنگ دژی هەولێر دەجەنگێ 

زاری كرمانجی: لە درێژەی یارییەكانی دەستپێكی قۆناغی دووەمی خولی یانە نایابەكانی عێراق، یانەی هەولێر لە دهۆك بەرامبەر یانەی ئەمانە بەغدا یاری دەكات و سەرهەنگ موحسینیش رووبەڕووی یانەی پێشووی دەبێتەوە.
یانەی هەولێر بەسەرپەرشتی لوئەی سەڵاحی راهێنەر و گۆڵكاری پێشووی یانەكە ئامادەكارییەكی زۆری كردووەو دەیانەوێ بە بردنەوەی سێ خاڵ دەست بە ركابەرییەكانی قۆناغی دووەم بكەن، لەبەرئەوەی لە قۆناغی یەكەمدا یانەكە ئاستێكی بەرزی پێشكەش نەكرد، بەشێوەیەك 19 خاڵی كۆكردەوەو لە پلەی پازدەیەمی ریزبەندە.
لوئەی سەڵاح، راهێنەری یانەی هەولێر لە لێدوانێكدا گووتی" دڵخۆشم بە گەڕانەوە بۆ یانەی هەولێرو بە یانەی خۆمی دەزانم، گەڕاوەتمەوە ناو خانەوادەو خەڵكی بەڕێزی هەولێر، هاتووم بۆ ئەوەی یانەی هەولێر بگەڕێنمەوە سەر ئەنجامە باشەكان، لەبەرئەوەی لەم رۆژەدا پێویستە هەموومان هەوڵبدەین بۆ هەستانەوەی تیپەكە".
لە یەكەم یاری وەرزی ئەمساڵی خولی نایابی عێراق یانەی هەولێر بەئەنجامی دوو گۆڵی خاوێن لە یانەی ئەمانە بەغدای بردەوە، سەرەڕای ئەوەی لەم یارییەدا هەریەك لە یاریزانان ئەركان ئەمیرو نەوزاد حەمید یاری ناكەن، بەڵام درێس زەردەكان دەیانەوێ سیناریۆی یاری یەكەمیان بەرامبەر ئەمانە بەغدا دووبارە بكەنەوە.
سەڵاح روونیشكردەوە، یارییەكانی خولی عێراق لە وەرزی ئەمساڵ هەمووی قورسە، ناتوانی پێشبینی ئەنجامەكان بكەی، هەموو تیپەكان چاوییان لە ئەنجامی باشەو یاریزانی ئاستبەرز و پیشەگەریان هەیە، ئێمە پێویستمان بەوەیە لە هەموو یارییەكاندا بۆ بردنەوەی سێ خاڵ تێبكۆشین، چونكە شوێنمان لە ریزبەندی خولەكەدا باش نیە.
سەرهەنگ موحسین، گۆڵپارێزی ناسراوی كورد سەركردایەتی یانەی ئەمانە بەغدا دەكات، وەرزی ئەمساڵ ئاستێكی بەرزی پێشكەش كردو رۆڵی هەبووە لە ئەنجامە باشەكانی یانەكە لە خولی عێراق.
ئەم گۆڵپارێزە لەبارەی رووبەڕووبونەوەی یانەی هەولێر كە شوێنی دەركەوتنی بوو گووتی"هەستێكی خۆشم هەیە كە رووبەڕووبوونەوەی ئەم جارەشم لە یاریگەی فرەنسۆ هەریری نیە، چونكە نامەوێ لەو یاریگەیە لە دژی هەولێر بجەنگم كە ماوەی 18 ساڵ لە یانەی هەولێر لەو یاریگیە یادگاری شیرین و پڕ لە شانازیم هەیە، هیوادارم هەمووان لەوە تێبگەن كە ئەمە وەرزشەو تا بتوانم هەوڵ دەدەم پیشەگەرانە پارێزگاری لە گۆڵی تیپەكەم بكەم".
سەرهەنگ زیاتر گووتی" وەك هەر یارییەكی دیكە خۆمان بۆ یارییەكەی بەرامبەر هەولێر ئامادەكردووەو دەمانەوێ سێ خاڵی یارییەكە ببەینەوە".
یاری نێوان هەردوو یانەی هەولێرو ئەمانە بەغدا، كاژێر یەك لە یاریگەی دهۆك ئەنجام دەدرێت، یاریگەكە بە یاریگەی یانەی هەولێر هەژمار دەكرێت، بەهۆی ئەوەی كە یاریگەی فرانسۆ هەریری نۆژەن دەكرێتەوە.
 

بابەتى پەیوەندیدار وەرزشى

زۆرترین بینراو