مرۆڤی باڵا....

شەوكەت برادۆستی

میراتی راستەقینەی مرۆڤ كردەوەكانییەتی، قورسایی دەیان كۆشك و تەلاری بەرز ناگات بە قورسایی گوفتار و رەفتارێكی جوان، دەمێكە ئەمە پەیامی زەردەشتییەكانە ( بیری چاك، رەفتاری چاك، كردەوەی چاك) لەنێوان مرۆڤەكان سنوور بەندی فیزیكی هەیە، بەڵام ماهییەت یەكسانە و هەموو مرۆڤێك بە رێساو رێكارێكی بایلۆژی هاوبەش لە دایك دەبێت، بەشێك پێیان وایە ئەمە یاسای سروشتە هەمیشە لاواز نێچیری بە هێزە؟ بەڵام بەشێكی تر پێیانوایە كلتوور و ژینگەی كۆمەڵگە بگرە خێزانیش هۆكاری دروستی بوونی ئەم جیاوازی و جیاكاریانەیە، ئەدكاری مرۆڤ پەیوەستە بە ئاستی بیركردنەوە بە تێرمانێكی مرۆڤانە بۆ سروشت بۆ یاسا بۆ نیشتمان بۆ خۆشەویستی بۆ هاورێیەتی و پەیوەندییە كۆمەڵاتییەكان، بۆ هەموو ئەو كایە و سێكتەرانەی ژیان پێوەی پەیوستە. بۆیە هەموو ئەو سنوورانەی مرۆڤ كێشاویەتی بۆ جیاكاری رەگەزی و ئاین و پلەبەندی كۆمەڵایەتی هەڵگری پێناسەی راستەقینە نین، كێ‌ لە ئێمە دەتوانێ‌ باڵا بێت؟، ئایە مرۆڤ لە كوێی باڵا بووندایە؟ تا ئێستا ئەم پرسیارە بە وەڵام نەگەیشتووە لە هیچ كۆمەڵگەیەك مرۆڤایەتی نەیتوانیوە بە ترۆپكی باڵا بوون بگات، ئەوەی كە هەیە یاخود دەبێندرێت تەنها جیاوازی رێژەیە لە شوێنێك بۆ شوێنێكی تر، تا ئێستاش مرۆڤ لەسەر پێناسەی رەنگ، ئاین و بیر و باوەری جیاواز لە ناو دەبردرێت و هەتك دەكرێت، بۆیە بێماناترین وشە ئەوەیە كە دەڵێن سەردەمی كۆیڵایەتی مرۆڤ بەسەرچووە، ئایا جیهانێكی پرۆلالیزمی هەمە رەنگ و یەكسانی ماف و ئازادییەكان بەرهەم هاتووە؟ لەوەتەی مرۆڤ دروست بووە جیاكاری رەگەزی وململانێ‌ی دەسڵات و هەیمەنەی هێزیش دروست بووە، تەنانەت ئایینە ئاسمانییەكانیش كە لەپانتای جوگرافیا و پەیامێكی خواییەوە نەشونمایان كردووە نەیانتوانیوە رێگری یا كۆتایی بە پلەبەندی مرۆڤ بێنن، بەڵكو بە پێچەوانەوە بەشێكیان رەوایەتیان پێداوە و كۆت و بەندی توندتریان بۆ دیاری كردوون.
لە ئاینی جولەكە ژن بێنرخترین رەگەزی مرۆڤە، چونكە بە پێی ئوستوورەكانی ئەم ئاینە ژن سەرچاوەی ئازار و مەینەتییەكانی مرۆڤە و بەر نەفرەتی خوا كەوتووە، بۆیە هەمیشە دەبێت بە چاوی گومان و بوونەوەرێكی بێ‌ رێز و نزمتر تەماشا بكرێت!!!، لە ئاینی ئیسلامیش كۆیلایەتی رەوایەتی هەیە مرۆڤە خوا پێدراوەكان مرۆڤە باڵاكان بۆیان هەیە هەزاران كۆیلە و كەنیزەكی خزمەتكاریان هەبێت و بۆ مەبەستی سێكس و لە هەمانكات دەتوانێ‌ كرین و فرۆشتنیان پێوە بكات وەك هەر كالایەكی تر!!!, ئەمە جگە لەوەی هەزاران ساڵ بەر لە زاینیش لە شارستانییەتە كۆنەكانی بابل و میسر و یۆنان یاسای كۆیلە و كۆیلە داری هەبووە، بەشێك لە مرۆڤەكان لەو شارستانییەتانە بوونەوەری جیاواز و لاواز و بی دەسڵات بوون، تەنانەت شوێنی مانەوە خەوتن و حەسانەوەیان ئاخۆری ئاژەڵ و كەلاوەی سارد و سڕبوون!!!، گومانم لەو پەیام و مانشێتە قەبانەی ئەمڕۆ هەیە كە چەندین هێز و كەس و بەشێك لە بزووتنەوە چاكسازیخوازەكانی مافی مرۆڤی ئەم سەردەمە بەرزیان كردۆتەوە بۆ نەهیشتنی جیاكاری و جیاوازی و پلەبەندی نێوان مرۆڤەكان و سڕكردنی ئەو كۆتانەی میراتی مێژوین، پێم وایە هەمیشە ئاراستەكان لە بەرژەوەندی ئەو هێز و چینە فیوداڵە ئەرستۆكراتە جیهانییە دایە كە دەتوانن بە دیوێكی تر و بەشێوە و لە ژێر ناوێكی تر درێژە بە هەیمەنەو مانەوەی هێزو دەسڵاتی خۆیان بدەن، بگرە زۆرێك لەو كەس و رێكخراو بزووتنەوانەش بخەنە ژێر ركێفی خۆیان و ببنە بەشێك لە ئارستەكانی ئەوان. رەنگبێ‌ نموونەی ئەمانەمان زۆر بێت كە دەیان بزووتنەوە بە ناوی داكۆكی كردن لە ماف و ئازادییەكانی مرۆڤ و نەهێشتنی پلە بەندی كۆمەڵایەتی و ئایینی خەبات و شۆڕشیان كردووە، بەڵام كاتێ‌ گەیشتن بە دەسڵات هەموو ئەو دروشمانە بوون بە بڵقی سەر ئاو هیچ جیاوزییەكیان لەگەڵ ئەو هێز و دەسڵاتانەی بەر لە خۆیان نەبوو. عەلی وەردی، هەزاران رەحمەت لە گۆڕی بێت دەڵێت: مرۆڤ داوای داد پەروەری و یەكسانی دەكات، كاتێ‌ خۆی نەی بێت بەڵام كاتێ‌ پێیگەیشت بۆ كەسانی تر بە رەوای نازانێت.

 

زۆرترین بینراو