موزیكژەن وەفا هیدایەت: دەمەوێت لە رێی ئامێرەكانی موزیك خەونەكانم بێنمە دی

موزیكژەن وەفا هیدایەت: دەمەوێت لە رێی ئامێرەكانی موزیك خەونەكانم بێنمە دی

رەمەزان هەرنی- هەولێر: خانمە هونەرمەندێكی موزیكژەنی شاری هەولێری قەڵاو منارە، كە ماوەی چەندین ساڵە بە ئامێری موزیك خزمەت بە بواری هونەری كوردی دەكات و تا ئێستا بەشداری چەندین كاری هونەری كردەووە، ئامادەكاری دەكات بۆ یەكەم بەرهەمی ڤیدیۆكلیپ تایبەت بە موزیك.
هونەرمەندی موزیكژەن وەفا هیدایەت , بە زاری كرمانجی گووتی" ئەو كاتەی زۆر منداڵ بووم پێش ئەوەی بچمە قوتابخانە هەستم كرد ئەو بەهرەیەم هەیە و زۆر تێكەڵی موزیك و گۆرانی بووم, هەر گۆرانییەك گوێم لێ دەگرت بە دیقەتەوە چێژم لە موزیكەكەشی وەر دەگرت و برا گەوەرەم لە ماڵەوە ئامێری سازی هەبوو، زۆری خۆش دەوێت منیش بەبێ ئاگایی ئەو سازەكەم دەستكاری دەكرد یا دەچوومە جێگایەكی چۆڵ سەرم بەكاسەكەی سازەكە دەكرد و ریشەی تایبەتەكەی سازم بە وەتەرەكاندا دەهێنا هەر چەندە ئەو كاتە هیچم نەدەزانی، بەڵام لای من هەزاران ئاوازی دەردەخست ئێدی لەو كاتەوە هەوڵمدا تا ئێستاش بەردەوامم".
وەفا ئەوەشی گووت " ئامێری ساز لەبەرئەوەی ئامێرێكی كوردییە و شەرقییە هەموو ئاوازێكی كوردی پێ دەردەچێ، منیش بۆیە ئەو ئامێرەم هەڵبژارد و لای من زۆر خۆشەویستە، جگە لە ئامێری ساز ئامێری تارو عودیش دەژنم, تا ئێستا هیچ كلیپم نییە لە ئامێری ساز، بەڵام لەبەرنامەمدا هەیە كاری لەسەر بكەم بەرهەمێكم كلیپ بكەم".
گووتیشی" موزیك بەگشتی فێری خۆشەویستی و ئارامی و بەرگە گرتن و رێزو خزمەتكردنی كردم، هەموو ئەوانەی هەمبوون زۆر زیاتری كردوونە و زۆر بۆشایی بۆ من پركردووتەوە".
لە بارەی بوونی رێژەیەكی كم ئافرەت لە بواری موزیك، وەفا گووتی " هۆكاری كەمی ئافرەتی موزیكژەن زۆرە لە كۆمەڵگا، نەبوونی پشت گیرییەكی تەواو بۆ هاندانی چالاكی، لاوازی رێكخراوەكانی ئافرەت لەگەڵ هەموو ئەوانەشدا باری ماددی، كاتێ ئەوانەی باسم كرد نەبوون و ئافرەتیش بوونی كەم دەبێ لەو بوارە، نەك هونەر ئێمە چەندین ئافرەتی بەهرەمەندمان هەیە ناتوانن پەرە بەكارەكانیان بدەن".
وەفا ئەوەشی روونكردەوە " لە بواری موزیك و هونەردا هاوسەرەكەم و چەند هاورێیەكی نزیكم یارمەتی دەر و پاڵپشتمن، بەداخەوە زۆر هونەرمەندی باشمان هەیە پشت گوێ خراون، زۆر پرۆژەی جوانم هەیە ئەگەر بۆم رەخسا بێ گومان ئەنجامیان دەدەم, لەوانە بەشداریم كردووە لەبەرهەمێكی موزیك بە نیازین بیكەینە كلیپ, دەمەوێت لە رێی ئامێرەكانی موزیك خزمەت بە نەتەوەكەم بگەینم و خەونەكانیشم بێنمە دی".

 

زۆرترین بینراو