موزیك بەشێكی گرنگی ژیانمە

موزیك بەشێكی گرنگی ژیانمە

دیمانە: هۆژین شەوكەت دری-رواندز
هەورین دارا محەمەد قۆتابی قۆناخی چوارەمی پەیمانگای هونەرە جوانەكانی رواندزە بەشی موزیك، دانیشتووی شاری رواندزە، ژەنیاری ئامێری ڤیۆلایە، ئامێرێكە لە كەمانجە گەورەترە و لە چەلۆش بچووكترە، لە سەر شان دادەنرێت.
هەورین دارا بە زاری كرمانجی گووت:" لە سەرەتای ژیانی منداڵیم خولیای موزیك و گۆرانی وتن هەبووە، ساڵی ٢٠١٦ دەستم كرد بە كاری هونەری و تاكو ئێستاش بەردەوامم لەسەری، هەڵبژاردنی موزیك بۆمن زۆر چێژبەخشە چونكە ئەو ئاواتە جوانەی منداڵیمە هەمیشە هەستم كردووە لەگەڵ حەزەكانم دەگونجێت، سەرسامی كردووم بە ناسینی چەندین موزیك ژەن و مامۆستای گەورەی موزیك، چەندین هاوڕێی باشی پێبەخشیوم، تا ئێستا هیچ شتێكی لێنەسەندووم تاكوو بیر لە وازهێنانی بكەمەوە و دەستبەرداری ببم، خێزانەكەم هەمیشە پاڵپشتیم دەكەن و یارمەتیدەری سەرەكی منن بۆ بەردەوام بوونم لە موزیك، مامۆستاكانیشم پاڵپشتێكی تری گەورەی منن بۆ كاری هونەری و بەردەوام بوونم".
هەورین لە درێژەی قسەكانیدا گووتی:" گەورەترین ئاواتم موزیك بوو، بەشێكی گرنگی ژیانی منە، سەرسامم بە دەنگی هونەرمەندی خوالێخوشبوو مەرزیە فەریقی و هونەرمەندی گەورە عەدنان كەریم، ژەنیاری شارەكەم چەتۆ نەورۆز و شێرزاد حەیدەری، جیاواز لە خەونی منداڵیم و هەڵبژاردنی موزیك حەزەكەم ببم بە میلازم و خزمەتی شارەكەم بكەم، لەهەمان كاتتدا ببم بە ژەنیارێكی باشی موزیك و بڕوانامەیەكی بەناوبانگ بەدەست بهێنم، بتوانم بگەم بەو خەونەی لە منداڵی هەمبووە، هەمیشە هەوڵ دەدەم زانیاری زیاتر كۆبكەمەوە و هەوڵی زیاتر بدەم بۆ باشتر فێربوون و شارەزابوون لە موزیك، تا بتوانم ئەو كەلێنە بچووكەی لە بواری هونەریدا هەیە لەناوی ببەم و بۆشاییەكی بچوك لە موزیكی شارەكەم پڕبكەمەوە".

زۆرترین بینراو