موسەنا ئەمین: گۆڕینی دەستووری عێراق ئاسان نییە

موسەنا ئەمین: گۆڕینی دەستووری عێراق ئاسان نییە

دیدار – ڕائیب شێروانی: موسەنا ئەمین، ئەندامی فراكسیۆنی یەكگرتوو لە ئەنجوومەنی نوێنەران لە دیدارێكدا لەگەڵ هەفتەنامەی زاری كرمانجی گوتی:" تێكچوونی رەوشی عێراق بۆ گەندەڵی و فەساد و ئەو زوڵمەی كە لە عێراق هەیە دەگەڕێتەوە، هەندێك لایەنی سیاسی سواری شەپۆلی خۆپیشاندانەكان بوونە.دەشڵێ:" ئەو گۆڕانكارییانەی بەغدا بۆ هەرێمی كوردستان مەترسین، دەست بردن بۆ دەستوور مەترسی تێدایە بۆ هەرێم، هەر چەندە دەستووری عێراق گۆڕینی ئاسان نیە، ڤیتۆی سێ پارێزگاری دەبێت لەسەر نەبێت، دەبێت لایەنەكان هەوڵ بدەن عێراق لەو قەیرانە بە كەمترین زەرەر بێتە دەرەوە، ئەگەرنا رەنگە شەڕی ناوخۆ دروست ببێت، سەرۆككۆمار بەبێ دەنگی كار دەكات لەسەر كۆكردنەوەی لایەنە سیاسییەكان، بەڵام هەوڵەكانی تا ئێستا بێ ئاكام بوونە.
ئەو ئەندامەی فراكسیۆنی یەكگرتوو لە ئەنجوومەنی نوێنەران رایگەیاند:" هەر نیزامێكی سیاسی لەسەر بنەمای ناعەداڵەتی و فەساد و گەندەڵی و تەزویر و ئیرادەی خەڵك دروست بێت، دەبێت بەو رۆژە بگات، ئەوە لە ئەنجامی ئەو هەموو گەندەڵی و فەساد و زوڵمەیە كە لە عێراق دەكرێت.
موسەنا ئەمین، دەشڵێ:" ئەو گرژی و ئالۆزیانە پەیوەندی بە ناڕەزای خەڵكەوە هەیە، بۆ چاكسازی، خەڵك لەو نیزامە سیاسییەی كە لە عێراق هەیە ماندووبووە، ئەو نیزامە سیاسییە نەیتوانیوە زۆرینەی خەڵكی عێراق ڕازی بكات، لە كۆتا هەڵبژاردن لە هەندێك پارێزگای عێراق لە 20% تێنەپەڕی بوو، ئەوەش بەڵگەیە كە خەڵك ئیمانی بەو نیزامە سیاسییە نەماوە، ئەو گەندەڵییەی كە لە عێراق دەكرێت، گەندەڵییەكی بێ سنوورە، بۆیە شتێكی سرووشتییە كە خەڵك بچێتە سەر شەقام بۆ خۆپیشاندان، جگە لەوەش ئەجندای سیاسی لەناو حزبەكان هەیە، هەروەها خەڵكێكی زۆر بێ كارە، هەژاری زۆرە، كاتێك هەڵبژاردن تەزویر كرا خەڵك ئۆمێدی بە پەرلەمانیش نەما، كە نوێنەرەكانی بتوانن هیچ بۆ بكەن، بەڵام ئەگەر هەڵبژاردنێكی پاك و بێ گەرد بەڕێوەچوو، خەڵك نوێنەری خۆی هەڵبژاردن نا چێتە سەر شەقام، بەڵكو داوای مافی خۆ لە پەرلەمان دەكات، كە نوێنەری لەو پەرلەماندا هەیە.
موسەنا ئەمین، ئەندامی فراكسیۆنی یەكگرتوو لە ئەنجوومەنی نوێنەران روونیشیكردەوە:" هەموو لایەنێكی سیاسی كاتێك كە خۆپیشاندان روودەدات، هەوڵدەدەن سواری ئەو شەپۆلە ببن، یاخود لە گەڵی بڕۆن، یان دژی نەوەستنەوە، هەر چەندە ئەو شەپۆڵە ناڕەزاییە لە خۆیان ڕازی بكەن، یان لە خۆیان دوور بخەنەوە، پشتگیری لە داخوازییەكانیان بكەن، ئەوە شتێكی چاوەڕوان كراوە.
ئەو ئەندامەی فراكسیۆنی یەكگرتوو لە ئەنجوومەنی نوێنەران جەختی لەوەشكردەوە:" ئەو گۆڕانكاریانەی كە لە بەغدا دەكرێن بۆ هەرێم مەترسیدارە، بێگومان بابەتی دەست بردن بۆ دەستوور مەترسی تێدایە بۆ هەرێم، هەر چەندە دەستووری عێراق گۆڕینی ئاسان نیە، ڤیتۆی سێ پارێزگاری دەبێت لەسەر نەبێت، هەرێمی كوردستان دەتوانێت هەندێك لە گۆڕانكارییەكانی ڤیتۆ بكات، بەڵام ئەو كاتەش كە ڤیتۆی كرد كێشەكە ئەوەیە كە رووی دەمی ئەو خەڵكە لە هەرێمی كوردستان دەبێت، ئەوان دەڵێن، ئەوان ناهێڵن هەرێمی كوردستان چاك بێت، ئەوەش ڕەنگە بكرێتە بیانۆ و كێشەی لێ بكەوێتەوە، رەنگە ئەو رووداوانە كێشە بۆ حكوومەتی عێراق بۆ تێپەڕاندنی بودجە دروست بكەن، ئەوەش بۆ هەرێمی كوردستان جۆرێك لە جۆرەكان هەر زەرەرە.
ئەمین، ئاشكراشی كرد:" فراكسیۆنەكان دەبێت هەوڵ بدەن عێراق لەو قەیرانە بە كەمترین زەرەر بێتە دەرەوە، بە زووترین كات ئەو رەوشە چارەسەر بكرێت، ئەگەرنا رەنگە شەڕی ناوخۆ دروست ببێت، ئەو كاتە رەنگە حكوومەت وەكو پێویست نەمێنێت، ئەو كاتە كێشە بۆ هەموو شتێك دروست دەبێت.
ئەو ئەندامەی فراكسیۆنی یەكگرتوو لە ئەنجوومەنی نوێنەران ئەوەشی دركاند:" سەرۆككۆمار بەبێ دەنگی كار دەكات لەسەر كۆكردنەوەی لایەنە سیاسییەكان، بەڵام تواناكانی ئەویش سنووردارە، هێزە سیاسییە شیعەكان خۆیان ئەو كێشەیان دروست كردووە و خۆشیان دەتوانن چارەسەر بكەن، بۆیە هەوڵی داوە بەڵام هەوڵەكانی تا ئێستا بێ ئاكام بوونە و نازانم لە ئایندەدا دەتوانێت شتی باشتر بكات، یان نا.
لە كۆتاییدا موسەنا ئەمین، ئەندامی فراكسیۆنی یەكگرتوو لە ئەنجوومەنی نوێنەران گووتیشی:" هاوپەیمانی كوردستانی لە بەغدا گرنگە، بەڵام ئەو هاوپەیمانەتیە دەبێت لەسەر چ بنەمایەك دروست بكرێت، لەم ساتە وەختەدا كە عێراق لە قەیراندایە، كورد لە مەترسی دایە، شك لەوەدانیە پێكەوە بوونی كورد دەتوانێت بەشێك لەو كێشانە چارەسەر بكات".

 

زۆرترین بینراو