مەریوان حەكیم جەباری: شیعر بۆ خاك و دایك و ژیان دەنووسم

مەریوان حەكیم جەباری: شیعر بۆ خاك و دایك و ژیان دەنووسم

رەمەزان هەرنی – زاری كرمانجی : نووسەر و شاعیر مەریوان حەكیم ئەمین لە دایكبووی شاری كەركووك و دانیشتووی شاری هەولێرە، زیاتر لە 18 ساڵە دەستی بە شیعر نووسین كردووە، لە دیمانەیەكی زاری كرمانجی باس لە ئەزموون و بەرهەمەكانی دەكات.
مەریوان ناسراوە بە مەریوان حەكیم جەباری بۆ زاری كرمانجی دەڵێ‌"لە سەرەتاكانی دوو هەزار دەستم بە شیعر نووسین كردووەو بە چەند تێكستێكی سادەو خەیاڵی هەرزەكارانە، رۆژانە چەند شیعرێكم دەشنووسی، وام دەزانی تەواو باوشم بە پێدەشتی شیعردا كردوە، تا وردە وردە تێگەشتم كە شیعر ئەو گۆماوە گەورەییە كە هەریەكەو لەلایەكەوە بەردێكی تێ فڕێدەدات و بەجۆرێك گۆێ لە شڵپەی ئاوەكە دەبێ، بەڵام دەركەوتنم لە دوونیای شیعردا لە كۆڕوسمینارەكاندا نزیكەی پێنج ساڵێك دەبێت، دیارە هۆكاری درەنگ دەركەوتم بۆ رەوشی كوردستان دەگەڕێتەوە، ئەو كات وەك ئێستا ژیان یارمەتیدەر نەبوو بۆ دەركەوتنی بەهەرەمەندان، بەڵام چەند ساڵێكە كەشێكی باش رەخساوە تا بتوانی لە ڕێگا جیاوازەكانەوە ئەوەی هەیە بە كۆمەڵگای بگەیەنی" .
جەباری ئەوەش دەڵێ‌"بە گشتی ئەو شیعر و تێكستانەی نوسیوومە، باس لە ئازارەكانی رابردووی خۆم و گەلەكەم دەكەن، واتا ئازارەكانی خودی خۆم و نیشتمان لەرێگەی تێكستەوە دەدەم بە گۆێ خوێنەراندا، لەلایەكی تریشەوە گەڕانەوە بۆ منداڵی یان بۆ رابردوو، خەریكە دەبێتە خەونی گەورەی هەموو تاكێكی ئەم كۆمەڵگایە، چونكە ئێمە گەلێكی بێ دەوڵەتین و خاوەنی سیادەی خۆمان نین، هەر بۆیە هەمیشە لەژێر هەڕەشەی دوژمنان دەژین، بۆیە لەگەڵ هەڵكشانی تەمەن ئازارەكانیشمان گەورەتر دەبن، بێگومان لەتێكستەكانی خۆمدا باسی رۆژگاری منداڵی و خۆزگەی گەڕانەوەی تەمەنی تێدایە، هەر چەندە خۆزگەكان دارێكی بێبەرن لەگەڵ گەورەبون و هەڵكشانی تەمەنمدا فرمێسكەكانم لەسەر روومەتم گلۆر دەبنەوە تا دەگەن بە مناڵیم".
ئەوەشی خستەڕوو"شیعر بۆ خاك و دایك و ژیان و ئەو كەسانە دەنووسم، كە لە ناوەڕۆكی تێكستێكمدا خۆیان دەبیننەوە، هەربۆیە ئێستا كتێبێكم لە بەردەستە پڕ لەگلەی بەناونیشانی (خودایە)"،
بارەی ئافرەتیشەوە جەباری دەڵێ‌"ئافرەت نیوەی كۆمەڵگەیەو دایكی نیوەكەی دیكەیە، بێگومان جوانترین و ناسكترین مرۆڤی سەر ڕووی زەوییە بۆیە لە هەموو بەشەكانی هونەردا پانتایەكی باشی داگیركردوە، هەر بۆیە ئافرەت بەشێكی سەرەكییە لەناو تێكستەكانی مندا" .
جەباری باس لە چەند تێكستێكی خۆی دەكات كە لەلایەن هونەرمەندانەوە كراون بە گۆرانی و داخ بۆ ئەوەش دەخوازێ كە بەرهەمی ئامادەكراوی هەیە، بەڵام لەبەر نەبوونی نەیتوانیووە بەچاپیان بگەینت.

زۆرترین بینراو