مەریەم كاكەیی: ئەو شیعرانەی كویلەكان بۆ دەسەڵاتداران دەینووسن وەكو ژەهر وایە لای من

مەریەم كاكەیی: ئەو شیعرانەی كویلەكان بۆ دەسەڵاتداران دەینووسن وەكو ژەهر وایە لای من

محەمەد ئامۆكەیی- زاری كرمانجی: عشق رووداوێكە لە زەمەنێكی دیاردا روو دەدات و مرۆڤ دەكەوێتە ئەو دۆخە پیرۆزە و بە دڵەوە پێشوازی لێدەكات، مرۆڤ لە عاشق بووندا بۆشاییەكی گەورەی كەسێتی خۆی پڕ دەكاتەوە و لەگەڵ هەموو ئەو ئازاری كە عشق دەی بەخشێت دیسانەوەش دڵخوازە، بەڵێ بێگومان مرۆڤی زیندوو بێ عەشق ناژی، ئەمە دەستپێكی قسەكانی خانمە شاعیر مەریەم كاكەییە، ئەو بەر لە 37ساڵ لە كەركوكی دڵی كوردستان لە دایكبووە، لە تەمەنی هەشت ساڵیەوە لەگەڵ خێزانەكەی بەرەو ئێران كۆچ دەكەن و دوای 13 ساڵ لە دوورە وڵاتی، بەیەكجاری دەگەڕێتەوە كەركوك، بەگووتەی خۆی لە تەمەنی 14 بۆ 15 ساڵیەوە،‌ خولیای ئەدەبیات بووە و هەوڵی داوە بە زمانی فارسی شیعر بنووسێت، مەریەم كاكەیی، لە دیدارێكی زاری كرمانجی، باس لە رۆلی شیعر و ساتی دەست پێكردنی شیعرەكان و چەند بابەتێكی تری ئەدەبی دەكات و رایدەگێنێت"بۆ یەكەمین جار لە ساڵی 2006 لە كوردستان یەكەم شیعرم بڵاو كردەوە و پاشان بە تەواوی دەستمكرد بە نووسینی شیعر و چیڕۆك و كاری وەرگێڕان لە فارسیەوە بۆ كوردی و بە پێچەوانەوە، پەیتا پەیتا لە گۆڤار و رۆژنامەكانی ئەو كاتەدا دەستم كرد بە بڵاوكردنەوەی بەرهەمەكانم، لە ساڵی 2014 یەكەم كتێبم بە ناوی( چین چیلا )وە لە چاپخانەی ئارابخای كەركوك چاپكرد، بریتییە لە چەند چیرۆكێكی بیانی لە فارسییەوە وەرمگێڕاوەتە سەر زمانی كوردی، شیعری سپی و كورتە چیڕۆك بە هەردوو زمانەكانی كوردی و فارسی دەنووسم، ئێستا لە وڵاتی ئەڵمانیا دەژیم، سەرقاڵی خۆێندنی زمانی ئەڵمانیم و لە نووسینی شیعر و چیڕۆكیش بەردەوامم."
مەریەم لەبارەی كاریگەرییەكانی شیعرەوە دەڵێ‌"یەكەم شیعر خۆی لە چەند بەش و لقێكی جیاجیا دەبینێتەوە، بۆ نمونە شیعری حەماسی شۆڕش بەرپا دەكات و شیعری سۆز و ئەوینداری (رۆمانسی) زەمینەی عاشق بوون دەخوڵقێنێت و شیعری تەنز ڕەخنە دەگرێت و عەیب و خەوشەكانی كۆمەڵگە دەخاتەڕوو، شیعری هەجۆش بە شێوازێكی بێسانسۆریانە عەیب و كەم و كورتی كەسێك بەرجەستە دەكات، هەندێ شیعریش هەن كە مرۆڤ رادەستی خەوێكی بێكۆتا دەكات، لای من ئەمەیان ژاراویترین جۆری شیعرە بەوەی كە هەمیشە لە خزمەتی دەسەڵاتە كۆیلەكان دەینووسن، كەواتە شیعر دەتوانێت زۆر شت بكات و مەرجیش نییە هەمیشە جوانی فەنتازیا بەرهەم بێنێت و جوانی بەرجەستە بكات، لەلایەكی ترەوە دەشتوانێت بەرەنگاری لە جوانیەكان بكات، بەڵام هەمیشە ناتوانێت ڕووبەڕووی دۆخە سامگینەكانی ژیان ببێتەوە، چونكە هەندێجار زمانێكی زبر و تووند و تیژمان پێویست دەبێت بۆ ئاراستەكردنی رێنوێنی و پێشاندانی ڕێگەی دروست، زۆرجار شیعر تەوسیفی ئازارەكانە و هەندێجاریش چەكی بەرگرییە و هەندێ جاریش زمانحاڵێ دڵێكی ئەوێندار، هەڵبەتە سەرەڕای هەموو ئەمانەش زۆر جار، تاڕادەیەك شیعر ناتوانێت وەكو پێویست بەرنگاری بكات، لەم حاڵەتەشدا مرۆڤ پەنا دەباتە بەر زمانێكی ڕیالیستی و ناچار دەبێت واز لە فەزای خەیاڵاوی شیعر بێنێت و روو لە واقعییەت بكات، نابێت خۆمان بخافلێنین تا رووبەڕووی راستییەكان نەبینەوە هەرگیز پێشكەوتن بە خۆمانەوە نابینین، ئێمەی مرۆڤی ئەم سەردەمە، كاتمان نییە بۆ بێهۆشی خۆخڵافاندن، بمانەوێ و نەمانەوێ بە پێی رووداوە سیاسی و ئابوورییەكان و دۆخی ناجێگیری ئاسایشی وڵاتەكەمان، دەبی ئێمە كاتمان بۆ هزر و بیركردنەوە تەرخان بكەین، چونكە تەنها بیركردنەوە لەم دۆخە نالەبارەمان رزگار دەكات."
لە دوا پەیڤەكانی دا ئەم خانمە شاعیرە گووتیشی" شاعیر و نوسەر هەمیشە بەدووای خۆیدا وێڵە لە نێو وشە و كەس و شوێنەكان و كتێبەكاندا بۆ خۆی دەگەڕێت، لە راستیدا ئێمەی مرۆڤ هەمیشە وێڵ و سەرگەردانی خۆمانین، لە حەقیفەتدا بە نوسینی خۆشی و ئازار و مەینەتییەكان، خۆمان دەنووسینەوە، شیعری كوردیش رێبازی خۆی هەیە و بۆ سەپاندنی خۆی هەوڵێكی زۆری داوە، ناڵێم گەیشتوونەتە ئاستی جیهانی، بەڵام لە شوێن خۆشیان ڕانەوەستاون و لەم ساڵانەی دوواییدا بە هۆی ئەو فەزا فراوانەی میدیا و دونیای ئەمڕۆوە پێشكەوتنی باشی بە خۆیەوە بینیوەو بۆ من شیعر پەنجەرەیەكی فراوانە بۆ ڕوانین یەكەم لە خۆم دەڕوانم و دواتریش لە ژیان، من لە ڕێگەی شیعرەوە دەمەوێت هەندێ جار ئازارەكان و هەندێ جاریش خەونەكان و جاری واش هەیە خۆشیەكانم بگەێنم، هەندێجاریش دەنگی كەسێك هەڵدەبڕم، ئازار و رەنجێكی هاوبەش كە دڵ و هزرم داگیر بكات، خۆشبەختانە شیعر ئەو پانتاییەم پێدەبەخشێت، و خۆشحاڵم ئەگەر توانیبێتم لە ڕێگەی نووسینی شیعر یان چیرۆكەوە دەنگم هەڵبڕیبێت و پەیامێكم گەیاندبێت.

زۆرترین بینراو