مەسیحیەكانی شەقڵاوە باردەكەن

مەسیحیەكانی شەقڵاوە باردەكەن

محەمەد ئامۆكەیی-شەقلاوە: چەند دەییەك دەبێت مەسیحی و موسلمانەكان لە باشوری كوردستان وەك برا ژیان دەكەن و تا ئێستاشی لەگەڵ دابێت گرفتێكی ئەوتۆ لە نێوان پەیڕوانی هەردوو ئاینەكە رووی نەداوە، مەسیحیەكان لە كوردستان بەسەر چەند ناوچە و شارێك دابەش بوونە قەزای شەقڵاوە یەكێك لەو جێگایانەیە كە كریستیانی لێ نیشتەجێن بوونە و لەگەڵ دانیشتوانی ئەو شارە لەخۆشی و ناخۆشیەكانی یەكتر بەشدارن، ئەوەی جێگای قسە لەسەركردنە كۆچی مەسیحیەكانی شەقڵاوەیە كە لە چەند ساڵی رابردوو بە لێشاو شارەكە جێ دێلن و لەسەر هۆكاری رۆشتنیان زاری كرمانجی بەدواداچونێكی كردووە و تێیدا هۆكارەكان دەخاتە روو.
سویت گەنجێكی مەسیحی نیشتەجێی بێترمەیە لە شاری شەقڵاوە كە زۆربەی دانیشتوانی مەسیحی نشینە، بۆ زاری كرمانجی گووتی" هۆكاری سەرەكی رۆشتنی مەسیحیەكان دەگەڕێنمەوە بۆ نەبوونی هەلی كار و كەمی خزمەتگوزاری، شەقڵاوە وەك شارەكانی تر نیە كە شوێنی كار بێت لەبەر ئەوەی ئێستا گەنجان بەدوای كار دەگەڕێن و دەچنە عەنكاوە لە هەولێر یاخود بۆ دەروەی وڵات كۆچ دەكەن و بەدوای بژێوی ژیان دەگەڕێن.
باسی لەوەشكرد" ئێستا بەنیازم لەگەڵ خانەوادەكەم ئێرە جێبێلم و بچمە هەولێر لەبەر ئەوەی كۆمپانیایەیكی وانیە كاری تیابكەم و دامەزراندنیش نیە، بۆیە رۆیشتن بە تاكە چارەسەر دەبینم." پێشم ناخۆشە كە زیێدی باب و باپیرانم جێ دێلم لەبەر ئەوەی ئێمە لێرە كێشەمان نەبووە لەگەڵ موسلمانان و هەمیشە بەچاوی رێزەوە سەیری یەكمان كردووە و مێژووی ئێمە دوور و درێژە و پڕە لە شانازی.
عوسمان محەمەد، كەسێكی موسلمانە و چەندین ساڵە دراوسێی مەسیحیەكانە ئەو باس لە پەیوەندی نێوان مەسیحی و موسلمان دەكات و دەڵێت" ئەوەی جێگای قسە لەسەركردنە ئەوەیە ئێمە و مەسیحیەكان لە بۆنە ئاینی و نەتەوەیەكانی یەك بەشدارین و بۆ چەندین ساڵە پێكەوە دەژین و رۆژێك شتێكی ناخۆش لە نێوانمان رووی نەداوە، ئێستاش ئەوان كە شەقڵاوە جێ دێڵن پێمان ناخۆشە لەبەر ئەوەی وەك برا واین و جیاوازین بەیەك نەكردووە، مەسیحیەكان خەڵكی بەوەفان و زۆرێك لەوانەی كۆچیان كردووە، كە پرسەن هەبێت بۆ هاوخەمی دەربڕین سەردانمان دەكەن ئەوەش رەنگدانەوەیەكی جوانی دانیشتوانی شارەكەیە بە هەردوو ئاینەوە.
قەشە ئەنیس، قەشەی كەنیسەی شەقڵاوە لەسەر هۆكاری رۆشتنی مەسیحیەكان بە زاری كرمانجی راگەیاند" شەقڵاوە شوێنێكی گەشت و گوزارییە دار و درەختی زۆری تیایە و بە یاسا رێگە نادرێت بۆ خانوو دروستكردن شوێنی سەوزایی تێكبدرێت ئەوەش كاریگەری زۆری هەبووە لەسەر كۆچی خەڵكی رەسەنی مەسیحی لە شەقڵاوە چوونكە ساڵانە كچ و كوڕی مەسیحی هاوسەرگیری دەكەن و لەبەر نەبوونی شوێن ناچارن ئێرە جێ بێلن و رووبكەنە شوێنەكانی تر."
قەشە ئەنیس ئەوەشی گووت" زیاتر 900 خێزان لە شەقڵاوە هەبوون و لە چەند ساڵی رابردوو بەیەكجاری ئێرەیان جێهێشتووە و روویان لە عەنكاوە و هەندەران كردووە و تەنیا نزیكەی 150 بۆ 200 خێزان لە شەقڵاوە ماون و ئەوانیش وردە وردە خەریكی كۆچكردنن، ئەو كۆچەمان پێ ناخۆشە بەڵام لەوانیە ئەوان وایان پێ باشتربێت و ناتوانین رێگریان لێبكەین.

زۆرترین بینراو