ناریمان مایی: شێوەكاری ژیانمی گۆڕی بۆ ژیانێكی پڕ لە هەست و خۆشەویستی

ناریمان مایی: شێوەكاری ژیانمی گۆڕی بۆ ژیانێكی پڕ لە هەست و خۆشەویستی

رەمەزان هەرنی – دهۆك : كچە هونەرمەندێكی شێوەكار لە پارێزگای دهۆك، داواكارە پاڵشتی زیاتری شێوەكاران بكرێ بەتایبەت لەكاتی كردنەوە پێشانگەی وێنەكانیان.
كچە شێوەكار ناریمان مایی، لە دیمانەیەكی تایبەت بە زاری كرمانجی راگەیاند"لە تەمەنی زۆر زوو حەزم لە بواری شێوەكاری بوو، بەڵام لە تەمەنی 12 ساڵی زیاتر هەستم بە نیزیكبوونی خۆم كرد لەگەڵ ئەم بوارەو زیاتر تێكەڵی بووم، دوای ئەوە حەز و ئارەزووم زیاتر بوو كە لە پەیمانگای هونەرە جوانەكان بخوێنم، تاكو بە تەواوی خۆم لەنێو جیهانی فراوانی هونەری شێوەكاریدا ببینمەوە، ئەوە بوو دەرفەتم بۆ رەخسا لە كۆلیژی زانستە مرۆییەكان بەشی شێوەكاری بخوێنم، بۆ ئەوەی زیاتر تواناكانی خۆم دەرخەم بەشێوەیەكی ئەكادیمی و زانستی و، بەشداریم لە ژمارەیەك چالاكی جۆراو جۆر كردووەو لەگەڵ بەشداریكردن لە پێشانگای هاوبەش و، چەندین جاریش لەگەڵ رێكخراوی یۆنسیف بەشداربوومە".
گوتیشی"ئەو تابلۆیانەی من دروستم كردوونە، دەربڕین لە بینیی من دەكەن بۆ ژیان، كۆتا پرۆژە كە دروستم كردووە دەربرین لە ئازارەكانی ئافرەت دەكات لە ناو كۆمەڵگە بەناوی (هیوای ژێر گڵ) بەهۆی ئەوەی پێویستە هونەرمەند داهێنان لە كارەكانی دا بكات، هەروەها گرینگترین شت ئەوەیە هونەرمەندی شێوەكار ستایلی تایبەت بە خۆی هەبێت، ئەمەش كارێكی ئاسان نیە بەهۆی ئەوەی دەبێت شێوەكار بەردەوام لە گەڕان دابێت بۆ ئەوەی ببێتە خاوەن ئەزموون تا بتوانێت ستایلێكی تایبەت بەخۆی هەبێت" .
ئاماژەی بەوەشكرد"كاری هونەری لە ژیانمدا شتێكە زۆر قۆرسە بتوانم بوەستم و تێدا كارنەكەم، بواری شێوەكاری ژیانمی گۆڕی بۆ ژیانێكی پڕ لە هەست و خوشەویستی و رەنگ، كە بەرەنگ ژیان جوانتر دەبینم"،
ئەو كچە شێوەكارە لە دوا قسەكانی خۆی دا بۆ زاری كرمانجی دەڵێ‌"تا رادەیەك گرنگی بە بواری شێوەكاری دراوە، بەڵام لە ئاستی پێویست نیەو بەشداریكردنی هاووڵاتیانیش لەكارو چالاكییەكاندا دڵخۆشكەرانە نین، بۆیە داواكارم لە شوێنی پەیوەندیدار زیاتر گرنگی بە هونەری شێوەكاری بدەن، بۆ نموونە ئەگەر بمەوێت پێشانگەیەك لە دەرەوەی وڵات بكەمەوە ئەگەر پاڵپشتیم نەكرێت، خەرجیەكەی زۆرەو پێم ناكرێت".

زۆرترین بینراو