ناز فەلەكەدین كاكەیی: خوێندنەوەی كتێب،  وەرزشی رووحی و مێشكە، لە رووی تەندروستی دەروونی سودی یەكجار زۆری هەیە

ناز فەلەكەدین كاكەیی: خوێندنەوەی كتێب، وەرزشی رووحی و مێشكە، لە رووی تەندروستی دەروونی سودی یەكجار زۆری هەیە

موڕشید برادۆستی – سۆران:

لە دیمانەیەكی زاری كرمانجید، بەڕێوەبەری كتێبخانەی گشتی هەولێر، باس لە گرنگی كتێب و سودەكانی خوێندنەوە دەكات و دەڵێت" سەدان هەزار كتێبی جۆرا و جۆرمان هەیە و ئێستە باشترین دەرفەت بۆ خوێندنەوەی كتێب رەخساوە، ئاماژەش بەوەدەدات، خوێندنەوەی كتێب، وەرزشی رووحی و مێشكە، لە رووی تەندروستی دەروونی سودی یەكجار زۆری هەیە و پێویستە بەلایەنی كەم رۆژانە چەند خولەكێك بخوێندرێتەوە.
لە دەستپێكی قسەكانیدا، ناز فەلەكەدین كاكەیی، بەڕێوەبەری كتێبخانەی گشتی هەولێر، بۆ زاری كرمانجی گووتی" كتێب بۆمن واتای مەدەنیەت و شارستانیەت و فیكرە، دەروازەیەكە بۆ دوور كەوتنەوە لە نادانی و ئازادبوون لە بەند و زنجیر كۆیلایەتی كۆمەڵگەی تەقلیدی، دوور بوون لە كەسی نەرێنی و نگێتڤ، سەركەوتن بە رەو پێبلكەكانی ژیان، سیمای زیندووی خەسلەتی ئافرەتانە بە كتێب خوێندن زۆرتر هێور و ژنانەتر بەدەر دەكەوێت و فێری ڕۆشنبیری بەرگ پۆش و هەڵبژاردنی جۆری خواردن، ڕۆیشتن و قسەكردن و ئەتە كێت دەبن و بۆ پیاوانیش بە هەمان شێوە".
زیاتر گووتی" كتێب خوێندن وەرزشی رووحی و مێشكە، لە رووی تەندروستی دەروونی زۆر باشە و سودی یەكجار زۆری هەیە، كاتێك كتێب دەخوێنیت ئەوە كەسایەتی خۆت بە هێز دەكەی و فێری وشە دەبیت، هەر چەند فێری وشە بیت زیاتر لە بواری قسە كردن پێشدەكەویت، خەڵكی زیاتر ڕێزت لێدەگرێت و مەجالێك دەبێت بۆ وەرگرتنی كاری باشتر.جیاوازی خوێنەر و كەسێك كە خوێنەر نەبێت ئەوەیە كە دەسەڵاتداری قسە كردن و قەناعەت هێنانی لە شوێنی كار و كۆڕ و كۆبوونەوە و میتینگ ، كەسە خوێنەرەكە بەرزترە. باشترین دەرمانی خەوتن كتێبە، پێشنیار دەكەم ئەگەر لەبەر دڵە ڕاوكێ ناتوانن بخەون بە خوێندنی كتێب دەتوانن خەوێكی ئارامتان هەبێت. لە كاتی تەنگانەی كۆمەڵایەتی و یان هەر بابەتێك كە خەڵك نیگەران بكات ڕوو لە خوێندنەوە بكەن".
ناز فەلەكەدین كاكەیی، لە رێگەی زاری كرمانجی، پشنیاریش دەكات و دەڵێ" ئە گەر بكرێت ڕۆژانە تەنانەت ئەر خولیای كتێبیش نیت، تەنها بۆ ماوەی هەشت خولەك بابەتێك بخوێننەوە، چونكە زۆربەی زاناكان لەم باوەڕەدان كە 68% لەو كەسانە كە چەند خولەكێك دەخوێننەوە لە نەخۆشی لە بیرچوون لە كاتی پیری كە بە رۆكی بە مرۆڤ دەگرێت دوور دەبن، هەروەها لە ئێستەدا كە سەرجەم تیڤی و سایتەكان باس باسی هەواڵی تووش بوون یا گیان لە دەستدانی مرۆڤە بە ڤایرۆسی كۆرۆنا، هەمووان لە ماڵەوەن باشترین دەرفەتە رۆژانە بۆ ماوەی چەند كاتژمێرێك یا چەند خولەكێك كتێب لە بوارە جیا جیاكان بخوێننەوە تا سوود مەند بن لە كتێبە بە نرخەكان.
لە بەردەوامی قسەكانیدا، بەڕێوەبەری كتێبخانەی گشتی هەولێر، ئاماژەشی بەوەدا" خوێندنەوەی كتێب باشە و پێویستیەكی ژیانە، بۆ خوێندنەوە لە هەموو تەمەن و ئاستێك روومان تێ دەكەن، كتێبخانەی گشتی دێوانخانەیەكە بۆ كەسانی خاوەن قەڵەم و ئەكادیمی و سیاسی، پێگەی بەرزی حوكومی، قوتابخانەكانی هەولێر بە شێوەی گروپ سەردانمان دەكەن و پەیوەندی باشمان لە گەڵ هەندێك لە باڵوێزخانەكان هەیە .
دووپاتی كردەوە، ئێستا و لەم سەردەمە، كتێبی سیاسی، مێژوویی، ڕۆمان و چیرۆك، دەروونناسی، یاسایی و چەند جۆرە كتێبێك باوی هەیە و خەلك زۆر هۆگری خوێندنەوەیانە، هەروەها زۆر جار كەسانی سەربازی بە پلە و پایەی بەرز بۆ وەرگرتنی كتێبی تایبەت بە زانستی سەربازی سەردانمان دەكەن و یان كتێبی خۆیان پێشكەش بە كتێبخانە دەكەن .
لەبارەی بە ئەلیكترۆنی كردنی كتێبخانەكەیان، كاكەیی، دەڵێت" كتێبخانەی گشتی هەولێر، دیجیتاڵی نییە، چونكە پێویستی بە بودجە و پارەی زۆر هەیە، بەڵام سایتی تایبەتیمان هەبوو كە ئێستا لە بەر چەند هۆكارێك را گیراوە، پێجی ( Hawlrer library-zaytun ) چاڵاكی كتێبخانەكەمان لە خۆدە گرێت.، هەروەها هەموو كتێبەكانمان بە شێوەی دیوی، پۆلین كراون و زانیاری لەسەر تاك تاكی كتێبەكان لە ناوكۆمپیۆتەر تۆمار كراوە، تەنانەت سیستەمی دۆسیەی هەموو كارمەندانی كتێبخانەكان بەشێوە سەردەمیانە و ئەلیكترۆنی لە كۆمپیۆتەر و لەناو هاردی تایبەت تۆمار كراون كە بە دەگمەن لە فەرمانگەكانی حكومی ئەم كارە دەكرێت .
شایەنی باسە، كتێبخانەی گشتی هەولێر، لە ساڵی 1943 دامەزراوە و باڵەخانەی كتێبخانەكە لە نێو پاركی سامی عبدولڕەحمانە، لەلایەن كۆریای باشوور لە ساڵی 2005 بۆ 2008 لە سەر رووبەری چوار هەزار مەتر دووجا دروست كراوە و دوو نەهۆمە، چەندین هۆڵ، وەك هۆڵی كتێبەكان بە زمانی كوردی و زمانە بیانییەكان و هۆڵی تایبەت بە كتێب و چاڵاكی بۆ مناڵان و هۆڵی گۆڤار و ڕۆژنامەكان و دوو هوڵ تایبەت بە كتێب و یادگارییەكانی كۆریای باشوور، لە نێو باڵەخانەكەدا، هۆڵی ڕۆژنامە، هۆڵی كۆمپیۆتەر، هۆڵی خوێندنەوە و چەندین تایبەت مەندی تری تێدایە، هاوكات، تەلاری تایبەت بە بۆن و چاڵاكی تایبەت بە خۆی هەیە كە زیاتر لە دووسەد هەزار كتێب بە زمانی كوردی و ناونیشانی جیا لە خۆ دەگرێت. كتێبخانەی گشتی هەولێر بەڕێوەبەرایەتی سەرجەم ئەو كتێبخانانە دەكات كە سەر بە پارێزگای هەولێرن كە ژمارەیان 32 كتێبخانەیە و 550 كارمەند سەرقاڵی كارن لەو كتێبخانانە .

 

بابەتى پەیوەندیدار دیمانە

زۆرترین بینراو