نانەواخانەیەكی سەردەمی شۆڕشی ئەیلوول نۆژەن دەكرێتەوە

نانەواخانەیەكی سەردەمی شۆڕشی ئەیلوول نۆژەن دەكرێتەوە

موڕشید برادۆستی – رواندز: لە سنووری قەزای رواندز سەر بە پارێزگەی هەولێر، چەند گەنجێك هەڵساون بە نۆژەن كردنەوەی نانەواخانەیەكی سەردەمی شۆڕشی ئەیلوول و دووای تەواو بوونی دەكرێتە ناوچەیەكی گرنگی گەشتیاری.
لە ساڵی 1963 شۆڕشی ئەیلوول بە رابەرایەتی بارزانی نەمر بەتێكڕای سەركردایەتییەوە ڕوویان كردە دەڤەری باڵەكایەتی، خانەوادەی بارزانی نەمر و نوسینگەی پێشوازی و مەكتەب سیاسی و ڕادیۆ هەموویان بارەگا و بینایەی تایبەت بە خۆیان هەبوو، هەرچەندە لە سەرەتادا بینایەكان بەهۆی بێ ئیمكانیەتی شۆڕش ڕێك و پێك نەبوون، بەهۆی هێڕشی فڕۆكەی دوژمن، زۆرجار پەنا دەبرایە بەر ئەشكەوتە سروشتی و دەستكردەكان، لە ساڵی 1970 دەستكرا بە دروست كردنی چەندین بینایەی تۆكمە بۆ خانەوادەی بارزانی نەمر لە دیلمان و حاجی ئۆمەران و ئێستاشی لەگەڵ بێت شوێنەواری بەشێكیان ماوە و ساڵی رابردوو چەند شوێنێك نۆژەن كراونەتەوە.
لە سنووری رواندزیش چەند شوێنێك هەن كە شوێنی خەباتی بارزانی نەمر و پێشمەرگە قارەمانەكانی شۆڕشی ئەیلوول و گوڵانن، نانەواخانەی كۆسپێ‌ سپیش دەكەوێتە نێوان قەزای رواندز و چۆمان، پەنجا و پێنج ساڵ بەر لە ئێستە شوێنێك بووە سەدان پێشمەرگە نانی نانەواخانەكەی خواردووە و لە نێویشیدا سەرۆك بارزانی .
هونەر كاك ئەحمەد بەپرسی رێكخراوی نەوەكانی ئەیلوول كە رێكخراوێكی ناحكومییە لە ناوچەكە بە زاری كرمانجی گووت" كۆسپێ‌ سپی لە سنووری گوندی پیروسووان سەر بە قەزای رواندز هەڵكەوتووە و لە دەورووبەری ساڵی 1965 تا كۆتای نسكۆی شۆڕشی ئەیلوول، نانەواخانەیەكی لێ بووە تایبەت بە درووست كردنی نانی پێشمەرگە لە چیاكانی زۆزك و هەندرێن و سەرتیز و دەورووبەری، لەو ماوەیە كە نانەواخانەكە كاری كردووە چەندین وەستا و شاگردی گۆڕیووە و ئێستە چەند كەسێك لە ژیان ماون كە پێشتر لە نانەواخانەكەدا كاریان كردووە".
روونی كردەوە، نانەواخانەكە رۆڵی باش و كاریگەری هەبووە لە دابین كردنی نان بۆ پێشمەرگەكان، لە تەواوی سەنگەرەكانی دەورووبەری رواندز بە سواری وڵاخ و ئەسپ و ئێستر هاتوونە لەو نانەواخانەیە نانیان بۆ پێشمەرگە گواستۆتەوە".
هونەر، ئەوەشی خستەڕوو، وەك رێكخراوی نەوەكانی ئەیلوول لە ساڵی رابردوو دیدارێكی تایەتمان لەگەڵ سەرۆك بارزانی ئەنجامدا، لە چوار چێوەی ئەو دیدارە بارزانی باسی ئەو نانەواخانەی كرد و پێی ووتیین" چەندین جار لە نانەواخانەی كۆسپێ سپی نانم خواردووە و یادگاریەكی شیرینە لای من و حەز دەكەم بیخەنە بەرنامەی كارتان بۆ نۆژەن كردنەوەی " بۆیە لەسەر راسپاردەی سەرۆك بارزانی هەڵساوین بە نۆژەن كردنەوەی".
گووتیشی" ماوەیەكە دەست بە كاركردن كراوە و لە قۆناغی سەرەتایی كاكردنداین، بە هۆی بەرتەسكی شوێنەكە كاركردن تا رادەیەك زەحمەتە، خەریكی بڕینی شاخ و دروست كردنی شوێنەكەین، چاوەڕوان دەكرێت پڕۆژەكە پێنج مانگ بخاینێت، نانەخانەكە لە چوار ژوور پێكهاتووە، ژوورێك بۆ تەندوور و هەویركردن و پێشمەرگە و چەند تایبەت مەندیەكی تر، كۆمەڵێك وردەكاری و ئیشی تێدەكرێت، دەمانەوێ بە شێوازێكی جوان و سەرنج راكێش نۆژەنی بكەینەوە، چەند بڕگ و بابەتی تری هوونەری و جوانكاری رەنگ بداتەوە و داواجار دەبێتە شوێنێكی گەشتیاری و شوێنەواری، شوێنی تایبەت بۆ پشوودانی گەشتیارانیش درووست دەكەین و لەگەڵ دانانی كۆمەڵێك تابلۆ، بەشێوەیەك درووستی دەكەینەوە سیمایەكی جوان بە دەڤەرەكە ببەخشێت".
رێكخراوی نەوەكانی ئەیلوول چەند ساڵێكە لە باڵەكایەتی دامەزراوە و لەو ماوەیەدا چەند كار و چاڵاكیەكی ئەنجامداوە، لە ساڵی 2017 بارەگای بارزانیان لە حاجی ئۆمەرانی دەڤەری باڵەكایەتی نۆژەن كردۆتەوە، هەروەها دانانی مۆنۆمێنتی وەفایەك بۆ ئەیلوول لەسەر پردی بنكێلان، گەیاندنی خزمەت گوزاری دانانی چەند جوانكاریەك بۆ ئەشكەوتێك كە بارەگای دەنگی كوردستان بوو، هەروەها بنیاتنانەوەی نانەواخانەی شۆڕشی مەزنی ئەیلوول لە كۆسپێ‌ سپی لە قۆناغی كاركردن و چاككردندان.

 

زۆرترین بینراو