ناوچەی پیشەسازی خەلیفان پێویستی بەخزمەتگوزارییە

ناوچەی پیشەسازی خەلیفان پێویستی بەخزمەتگوزارییە

محەمەد ئامۆكەیی- خەلیفان: پیشەوەران و خاوەن ماڵەكانی ناوچەی پیشەسازی خەلیفان ماوەی چەندین ساڵە بەدەست خراپی رێگاوبان دەنالێنن و داوا دەكەن حكومەتی هەرێم ئاوڕێكیان لێ بداتەوە.
زیاتر لە 12ساڵە ئەمە دۆخی ئێمەیە ئەمە دەستپێكی قسەی خاوەن ماڵێكی نزیك ناوچەی پیشەسازییەو دەڵێت" لە گوندێك بوم بۆیە ماڵم هێناوە بۆ شار تا كەمێك ژیانم باشتر بێت لەڕوی خزمەتگوزارییەكان و رزگاربونمان لە خراپی رێگاوبان، بەڵام ئەو هەموو ساڵە لێرە ژیان دەبەمەسەر تاكوو ئێستا هیچ پڕۆژەیەك نەكراوە بۆمان، ئەوە وەرزی زستانیش هات ئێمە ژیانمان سەختردەبێت لەبەر ئەوەی زۆربەی كۆڵانەكان و بگرە رێگای سەرەكی كە بۆ ناوچەی پیشەسازی دێت خۆرەو لەبەر باران بارین قوڕوو لیتەی زۆر دروست دەبێت و هەندێ جار ناتوانین بە ئۆتۆمبێلیش پێیدا بڕۆین."
ئەو هاووڵاتییە ئەوەشی گووت" زۆربەی ئەوانەی لە دەوروبەری ناوچەی پیشەسازی خانویان هەیە خەڵكی كەم دەرامەتن و توانای ئەوەیان نیە لە شوێنەكانی تر خانوو یاخود زەوی بكڕن، بۆیە داوای ئێمە ئەوەیە زیاتر لە 12ساڵە لە چاوەڕوانی چاككردنی رێگاداین و هیواخوازین ئەمجارە دەنگمان بگاتە لایەنی پەیوەندی دارو خەمێكمان لێبخۆن.
وەستا رەنجدەر پیشەوەرە گووتی" كاتێ لێرە ناوچەی پیشەسازی دروستكرا دەبوا حكومەت پلانی ئەوەی هەبا رێگاوبانەكانی قیڕتاوكربان نەوەك بەو جۆرەی ئێستا هەیە، چەندین جاریش بەڵێنی ئەوەمان پێداروە كە ئەو ناوچەیە قیڕتاو بكرێت و پڕۆژەكانی تری خزمەتگوزاری پێشكەش بكرێت، بەڵام تا ئەم ساتە هیچمان بۆ نەكراوە."
ئەو پیشەوەرە باس لەوەش دەكات و زیاتر گووتی" بوونی قوڕولیتە لەبەردەم دوكانەكانمان وایكردووە بێ زاربین و ئەوكەسانەی ئۆتۆمبێلی خۆشیان لە شوشتەگە دەشۆن تا دەگەنەوە سەر رێگای قیڕ وەك پێشوتری لێدێتەوە، تاكە داواكاری ئێمە ئەوەیە هەرچی زووە پەلەبكرێت لە قیڕتاوكردنی هەموو كۆڵانەكانی ناوچەی پیشەسازی و رێگای سەرەكی چونكە بەڕاستی ناكرێت لە شارێك بژی ئەوە دۆخت بێت.
كاروان كەریمخان، بەڕێوەبەری ناحیەی خەلیفان، بەزاری كرمانجی راگەیاند"پڕۆژەی چاككردن و درووستكردنی رێگای پیشەسازی خەلیفان وەك زۆربەی پڕۆژەكانی تر بەهۆی قەیرانی دارایی راگیراوە، بەشێك لە پڕۆژەكە ئەنجام درابوو، لە ئێستاشدا خەریكە كۆتایی بە قەیرانی دارایی دێت و بارودۆخی دارایی حكومەت بەرەو باش بوون دەچێت، بۆیە داوامان لە بەڵێندەری پڕۆژەكە كردووە دەست بەكارەكانی بكاتەوە، هەر چەندە پڕۆژەكە خۆی كەموو كورتی هەیەو بەڵام تاكوو ئێستا بەڵێن دەر ئامادەیی خۆی دەرنەبڕیوە كە دووبارە دەست بكاتەوە بە پڕۆژەكە بۆیە ئێستاش وەرزی زستان هات و خەلیفانیش جیاواز لە شوێنەكانی تر ساردە لەوانیە ئەو پڕۆژەییە بكەوێتە ساڵی دابێت.

زۆرترین بینراو