ناڕەزاییەكانی عەڕەب و توركمان دژبە پێدانی پۆستی پارێزگای كەركووك بە كورد بە نایاسایی دادەنرێت

ناڕەزاییەكانی عەڕەب و توركمان دژبە پێدانی پۆستی پارێزگای كەركووك بە كورد بە نایاسایی دادەنرێت

راپۆرت-محەمەد هەسنانی: نووسەر و چالاكوانان و مامۆستایانی زانكۆ، خۆپیشاندان و ناڕەزاییەكانی پێكهاتەكانی عەڕەب و توروكمانەكان، دژبە دانانی كوردێك بە پارێزگاری كەركووك، بە نایاساییە دەزانن و راشی دەگێنن "بەپێی دەنگەكان و دانیشتوانی كەركووك پۆستەكە مافێكی رەوای كوردە.
سانع شەریف شێروانی، ماموستا لە فاكەڵتی یاساو پەیوەندییە نێودەڵەتییەكانی زانكۆی سۆران و قوتابی دكتۆرا لە وڵاتی مالیزیا، بەزاری كرمانجی راگەیاند "هەرچەندە خۆپێشاندان مافێكی سروشتی و رەوای خەڵكە بۆ بەدەستهێنانی مافەكانیان، بەڵام ئەبێت لەچوارچێوەێكی یاسایی و شەرعی و لۆژیكی دابێت. بەڵام ئەگەر سەیری ئەو خۆپێشاندانەی لایەنەكانی عەڕەب و توركمان بكەین، دژی بوونی پارێزگارێكی كورد لە كەركووك، ئەوا خۆپێشاندانێكی نادەستوری و نایاساییە، چونكە لە رووی دەستووریەوە كورد پێكهاتەێكی سەرەكییە لە عێراق، لە رووی یاسایی و شەرعیەوەش زۆرینەی خەڵكی ئەم شارە كوردەو كە شەرعیەتیان بەلیستی برایەتیان داوە، كە هی نوێنەرانی كوردە، خاوەن زۆرینەی كورسییەكانی ئەنجوومەنی پارێزگای كەركووكە، بەمەش پۆستی پارێزگای كەركووك مافێكی رەوای كوردە، بۆیە نارەوایە رێگە بەم جۆرە خۆپێشاندانە ناڕەوایانە دژی پرسێكی یاسایی وشەرعی بدرێت كە خۆی لە بەرگێكی دیموكراسیدا حەشاردەوە".
گووتیشی " دەكرێت ئەم جۆرە ناڕەزایی و خۆپیشاندانانە دەستێكێ دەرەكیشی لە پەنای جولاندنی ئەم خۆپێشاندانانەوە بێت، چونكە هەر كاتێك كەركووك لەدەستی پارێزگارێكی كورد بێت، ئەوا ئەمنیەتی و ئاوەدانی شارەكەو بژێو ژیانی خەلَِكی شارەكە باشترە، زیاتر لەمەش ئەم ئارامیەو پێشكەوتنەش لە بەرژەوەندی وڵاتانی رۆژئاواش دایە، ئەمەش دەبێتە هۆی زیاتر بەهێزی سەنگ و قورسایی كورد و هەرێمی كوردستان، لە سەر ئاستی نێودەوڵەتییەوە لەرووی سیاسی و ئابوریەوە، بەگشتی ئەوانەی ناڕازین، دەیانەوێت كەركووك ئارام نەبێت و لەدەستێكی ئەمیندا نەبێت، تاكو كورد لە كەركووك وە هەرێمی كوردستان لاواز ببن.
دلاوەر محەمەد، چالاكوانی كۆمەڵی مەدەنی بەزاری كرمانجی گووت " دانانی پارێزگارێكی كورد لەشاری كەركووك، مافێكی رەوای كوردە، چونكە هەڵبژاردنەكان سەنگی مەحەكن، دەبێت هەمولایەك پێی یەوە پابەند بێت، بە تایبەت توركمان و عەڕەب ئەم چەندساڵەی ڕابردو كە كەسێكی عەرەب ببووە پاڕێزگا، بەهۆی خیانەتێكی ناوخۆی چەند كەسانێك بو كوردیش باجی زۆری دا، لە ئاوارەو دەر بەدەربوون و تێكدانی ماڵ و حاڵی هاووڵاتییان و نەبوونی كار و كاسبی، لەهەموشیان گرنگتر بەتاڵان بردن و خاپور كردن و شەهید كردنی ژن و پیاو منداڵانی بێتاوان بوو لەم شارە، هەروەها لادانی كورد لەم پۆستانەی كەبە ئیستحقاقی هەڵبژاردن كورد بەدەستی هێنابوون، ئەمانە هەموی تاوان لەدوای تاوان بوون بەرامبەر بە بۆیە لایەنەكاتی تریش دەبێت ئەوەبزانن كە كورد مافی خۆیەتی دوای ڕێككەوتنی پارتی و یەكێتی لەسەر كەسێكی كورد ئەم مافە بۆ گەلی كورد دەگەڕێتەوە. ئینجا ئەمڕۆ بێت یان بەیانی بۆ ئەوەی خەڵك لەم شارە لەژێر چەترێكی ئارام ژیان پێكەوە بكەن.
مشیر فارس نووسەر، بە زاری كرمانجی راگەیاند "وێڕای ئەو ڕاستەقینە و فاكتە بەڵگە نەویستەی كە كەركووك كێشەیەكی مێژوویی فرە رەهەندەو مامەڵە كردن لە گەڵیدا دەبێت هەستیارانە بێت، بەهۆی مۆزایكی فرە پێكهاتەییەوە، بەڵام ئەو ڕاستییە ناشاردرێتەوە كەركووك بەشێكی دانەبڕاوی جوگرافیایی كوردستانەو هەر موساوەمەیەك ئۆباڵێكی قوڕسی مێژووی دەخاتە ئەستۆی هەموو لایەك".
دەشڵێت "ناڕەزایەتی مەشحونكراوی توركمان و عەڕەب و خۆ نیشاندانەكانیان زادەی ئەو عەقلییەتە شۆڤینییەیە كە سەدەیەكە دەوڵەتی عێراق بەرەو وێرانە دەبات، بۆیەش لە بەرامبەر ئەو زیهنییەتەدا باشترین وەڵام تەبایی ریزەكانی كوردەوارییەو یەكخستنی هەڵوێستی هێزو لایەنە سیاسییەكانە، لە بەرامبەر ئەو تێڕوانینە شۆڤینیستەی لە ژێر پەردەی ناڕەزایەتی توركمان و عەرەبدا دەیهەوێت درێژە بە داگیركاری و پڕۆسەی تەعریب بدات".

زۆرترین بینراو