ناگلێسمان:  نامەوێ جارێ باسی نازناوەكە بكەم

ناگلێسمان: نامەوێ جارێ باسی نازناوەكە بكەم

زاری كرمانجی- ئاژانسییە هەواڵییە وەرزشییەكان: یولیان ناگلێسمان، راهێنەری یانەی لایپزیگ دڵخۆشی خۆی بەرامبەر سەركەوتنی یانەكەی بۆ قۆناغی پێش كۆتایی چامپیۆنزلیگ پێشانداو گووتی" نامەوێ جارێ باسی نازناوەكە بكەم".
ناگلێسمان دوای بردنەوەیان لە ئاتلێتیكۆ مەدرید گووتی" یاریزانەكان یارییەكی زۆرباشیان كرد، ئاتلێتیكۆ مەدرید وەك هەمیشە بەشێوەیەكی باش بەرگری كرد، بەڵام لە كۆتاییدا ئەو یانەیە سەردەكەوێت كە باشتر یاری دەكات، سەرەڕای ئەوەی كە زۆر هەلمان نەبوو، بەڵام سوودمان لەو هەلانە وەرگرت كە درووستمان كرد".
یولیان گووتیشی" زۆر دڵخۆشم بەوەی وەك بچووكترین راهێنەر گەیشتمە قۆناخی پێش كۆتایی، لە یانەكەو تیپەكەمدا هەستێكی زۆر خۆش هەیە، من راهێنەرم و رێگەیەكی درێژم لە پێشە".
راهێنەری لایپزیگ لە بەشێكی دیكەی قسەكانیدا گووتی" كاتێكی زۆر بۆ ئاهەنگ گێڕان نیە، بەڵام لە هۆتێل ئاهەنگ دەگێڕن، ئێستا كاتی ئەوەیە بیر لە یاری پاریس سانجێرمان بكەنەوە".
دواتر ناگلێسمان گووتی" بردنەوەی یانەكەی لە تۆتێنهام و ئاتلێتیكۆ مەدرید، تەنیا ركابەری راهێنەرەكان نیە، بەڵكو وەرزشی یانەكانە، ئێمە زیاتر لە هەموو ئەو یانانە هەلمان هەبوو كە پێشتر بەرامبەر ئاتلێتیكۆ یارییان كردووە، دوای ئەوەی گۆڵی یەكسانبوونمان لێكرا، لە رووی هزرییەوە وەك خۆمان ماینەوەو سەرمان شۆڕ نەكرد".
لە كۆتایی قسەكانیدا راهێنەری یانە ئەڵمانییەكە لە بارەی بردنەوەی نازناوی پاڵەوانێتییەكەدا گووتی" ئێستا نامەوێ باسی ئەوە بكەم، بەڵام بە دڵنیاییەوە دەمانەوێ بگەینە كۆتایی، بۆ ئەوەش پێویستە یانەیەكی گەورەی وەك پاریس سانجێرمان ببڕین، كە یانەیەكی بەهێزە, خۆشحاڵم بەو پێشكەوتنە خێرایەی لە یانەكەدا دەبیندرێت لەو كاتەوەی بۆ بۆندزسلیگا سەركەوتووین، یانەكە 3 جار بەشداری لە چامپیۆنزلیگدا كردووەو دەمانەوێ زیاتر خۆمان لەو پاڵەوانێتییەدا ببینن".

زۆرترین بینراو