نرخی حەكیمی بە 3 یانەی گەورەی ئەوروپا راگەیاندرا

نرخی حەكیمی بە 3 یانەی گەورەی ئەوروپا راگەیاندرا

زاری كرمانجی- ئاژانسییە هەواڵییە وەرزشییەكان: بەهۆی درەوشانەوەی ئەشرەف حەكیمی بەرگریكاری راستی ریال مەدرید كە لە بڕوسیا دۆڕتمۆندی ئەڵمانی یاری دەكات، یانە ئیسپانییەكە نرخی یاریزانەكەی بە 3 یانەی گەورەی ئەوروپا راگەیاند لەوانەی بە گواستنەوەی ئەو یاریزانە مەغریبیە سەرقاڵن.
لەم بارەیەوە، رۆژنامەی (ماڕكا)ی مەدریدی ئاشكرای كردوە یانەكانی پاریس سان جێرمان و بایرەن میونخ و بڕۆسیا دۆرتمۆند داوای ئەو بەرگریكارە مەغریبیەیان كردوە كە دەتوانێت لە باڵی راستیش یاری بكات، لەم رووەوە رۆژنامەكە بڵاویكردوەتەوە كە ریال مەدرید بری 80 ملیۆن یۆرۆی وەك نرخی فرۆشتنی حەكیمی دیاری كردوە، یاریزانەكەش بەگوێرەی هەواڵەكە گرێبەستی لەگەڵ مێرەنگی تا 2023 بەردەوام دەبێت.
لەكۆتایی هەواڵەكەدا هاتووە كە ئەگەر یانەی بایرەن میونخ حەكیمی بوێت پێویستە 80 ملیۆن یۆرۆ بدات ئەوەش هەمان بەهای كڕینی لۆكاس هێرناندێزی بەرگریكاری ئاتلەتیكۆ مەدریدە لە لایەن یانەی باڤارییەوە، لە هەواڵەكەش هیچ ئاماژەیەك نەكراوە كە ئایا زێدان یاریزانەكەی دەفرۆشێت یان بۆ وەرزی داهاتوو دەیخاتە نێو پلانەكانیەوە.

زۆرترین بینراو