نزیك بوونەوە لە مەترسی كوشندە

ئیسماعیل ئیبراهیم


بیرم دێت ساڵی 1999 بوو، لەگەڵ كۆمەڵێك لە هاورێكانم لە هەولێر، سلێمانی و دهۆك بەدوای ئەوە دەگەڕاین بتوانین گرووپێك پێك بهێنین، تا حكومەت و لایەنە پەیوەندارەكان لە مەترسی دروست بوونی گەندەڵی، مافیا، دامەزراندنی هەرەمەكی بە تەزكییەی حزبی، سەرهەڵدانی نادادپەروەری و كۆمەڵێك بابەتی دیكە مەترسیدار ئاگادار بكەینەوە و هەر نەبێت گوشارێك دروست بكەین، بەداخەوە هەوڵی ئەو كاتەماندا سەری نەگرت بە هۆی نەبوونی ئێمكانیاتی ماددی و كەناڵێكی راگەیاندن و نەبوونی سۆشیال میدیا.
دواتر ساڵی 2001 هەفتەنامەی هاووڵاتی دامەزرا، لەوێ لە رێگەی مامۆستا نوری بێخاڵی توانیم پەیوەندییان پێوە بكەم و دەستمان پێ كردەوە، بۆ ئاشكرا كردنی گەندەڵكاران و مەترسییەكانی دوا رۆژ كە لە ئەنجامی سیستەمی بەڕێوەبەردن لەم وڵاتە بوونی هەبوو.
ئیتر لەو رۆژەوە ئەوەی دەستمان دایە تا بە ئەمڕۆش دەگات بە هەمان هەناسە بەردەوام بووین، قەدەر گرووپی هاووڵاتی لێكدابری و هەر یەكەوە لە دامەزراوەیەك دەستمان بەكار كردەوە، من هەمان هەناسەی دژایەتی كردنی گەندەڵی و ئاشكرا كردنی مافیا و خەوشەكانی بەڕێوەبەردنم گواستەوە ناو دەزگای زاری كرمانجی، تا ئێستاش بەردەوامم، پیاو بۆ حەق بڵێت رۆژێك لە رۆژان لە سەر یەك ووشە یا رەخنە، بۆچوون، راپۆرت یا هەر بابەتێكی دیكەی رۆژنامەوانی بچووكترین رێگریم لێ نەكرا و تا ئێستا هەر ناكرێت، ئەوانەی كۆسپیان بۆ دروست دەكردین ئەوانە بوون كە بەرپرسی گەندەڵ بوون و وەك تۆڕی جاڵجالۆكە دامەزراوەكانیان تەنی بوو، یا ئەو مافیانە بوون كە بە هۆی نووسینمانە تووشی زیان بوونەوە.
هەر لە لایەن ئەو كەسانەشەوە كە لە دامەزراوەكانی حزبی، حكومی، ئەمنی و سەربازی بوون، هەر جارەوە تۆمەتێكیان بۆ هەڵدەبەستین، بیرم دێت پێیان دەگووتم: ئێوە سەربە حزبی بەعس، دواتر بەعس نەما گووتیان ئێوە سەر بەمیتی توركیا، دواتر كراینە ئیتلاعاتی ئێرانی، ئەمەشیان پێ ئیسپات نەبوو، گووتیان خاك فرۆش و نانیشتمانین. دەستیان بۆ شەرەف و كەرامەتیان بردین.
ئێستا ئەو شتانەی كە ئێمە لێی دەترساین و وەك نیشتمانپەروەرێك هەوڵماندەدا رێگری لێ بكەین بۆ ئەوەی وڵات نەكەوێتە ئەم دۆخەی ئێستا و شكۆی هاووڵاتیی بە هەموو چین توێژەكانییەوە پارێزراو بێت، هاتە دی.
مافیا دروست بوون، قاچاخچی وایان لێ هاتووە حكومەت پێیان ناوێرێت، شكۆی هاووڵاتی وای لێهاتووە خۆزگە بە سەگ بوونی خۆی دەخوازێت، حزبییە بیر تەسكەكان ئەوەندە كڵۆڵ لە بیر كردنەوە كە خەریكی تەخویت كردنی ئەوی دیكەن، كۆمەڵگە بەسەر دوو چینی زۆر لێكدا بروا دابەش بووە، ئەویش سەرمایەداری ناتەندروست و هەژاری تووڕە.
وڵات لە لێواری تەقینەوەیە، دەستی دووژمنان و دەرەكی بەهۆی نادادپەروەری و گەندەڵی بەرپرسانمان كاریگەری كردۆتە سەر تاك بەتاكی ئەم نیشتمانە، گەنج سەری خۆی هەڵدەگرێ دەروات، زانكۆكان بوونەتە كارگەی بەرهەم هێنانی بڕوانامەی بێ زانیاری، نەخۆشخانەكانمان بوونەتە شوێنی بازرگانی بە مرۆڤ، رۆژانە كوشتن و بڕین لە زیادبووندایە، بەشێكی زۆری ئەو پێشمەرگانەی من قسەم لەگەڵ كردوون زۆر بێ ئینتمان و تەنها مووچە رایگرتوون، هونەر لەم وەڵاتە بۆتە گاڵتەجاری، ئافرەتانی نیوەرووت بە ناوی فاشیۆن و نمایشكار كۆمەڵگە بەرەو وێرانە دەبەن، تیڤییەكانمان بێ سانسوور و چاودێری كار لە سەر لێكترازاندنی خێزان و كۆمەڵگە دەكەن. لەش فڕۆشی و هاوجنسبازی زیاتر لە هەر كاتێكی دیكە بوونی هەیە، رێژەی لێكهەڵوەشانەوەی خێزان هەرگیز بەقەد ئەم چەند ساڵەی نەبووە.
سەرمایەی ئاسمان و زەوی و ژێر زەوی بۆ بەشێكی زۆری هاووڵاتییان بۆتە غەزەب، هیچ شتێك بەناوی رێز لە مامۆستا، زانا، كەسایەتی سیاسی هەتا دایك و باوك .
لایەنە سیاسییەكان بوونەتە شێرپەنجەی نیشتمان، وایان كردووە گەنجێ دوای راپەڕین خۆزگە بە حەشدی شەعبی بخوازێت و رێگرییان لێ نەكرێت بە یەك رۆژ هەزارانیان لەو گرووپانە خۆیان ناونووس دەكەن، بەشێكی زۆر لە ئەندام و لایەنگیران و كادیرانتان نەك لێتان توورەن، هەتا لە گفتووگۆكان خۆیان دەدزنەوە، چونكە دەزانن ناتوانن بەرگریتان لێ بكەن و شەرمەزار دەبن،( هەموو لایەنەكان) ئەمە راستییەكە باس دەكەم وەك ئەركێك، لە سایەی سیاسەتی ناتەندروستی بەڕێوەبردن لەم وەڵاتە خەریكە لە رۆخی هەڵدێرێكی مەترسیدار نزیك دەبینەوە، ئەوەی باسم كرد مشتێكە لە خەروارێك، بەڵام هێشتا درەنگ نییە، با بەس بێت، بە بڕیاری بوێرانە لە ماوەی یەك هەفتە دەتوانن كۆتایی بە هەموو توڕەییەكان و مەترسییەكان بێنن، تكایە خۆتان و نیشتمان رزگار بكەن با بەس بێت.

زۆرترین بینراو