نەسە سەبری: شیعر دەتوانێ پەیامی كۆمەڵگە بگەیەنێتە دەسەڵات

نەسە سەبری: شیعر دەتوانێ پەیامی كۆمەڵگە بگەیەنێتە دەسەڵات

 

 


محەمەد ئامۆكەیی – باڵەكایەتی:
نەسە سەبری 27 ساڵ، دانیشتووی گوندی گوێزان ی سەر بە قەزای چۆمان ە، گەنجێكی بزۆز و خوێن گەرمەو حەز و خولیایی شیعر نووسینە و هەروەكو خۆی بۆ زاری كرمانجی باسی دەكات رۆژانە خەریكی خوێندنەوەو نووسینی شیعرە و لەبارەی دونیای ئەدەب و نووسینی شیعر دەڵێ‌"شیعر دەتوانێ پەیامی كۆمەڵگە بگەیەنێتە دەسەڵات، دەتوانێ پەیامی وڵاتێك بگەیەنێت بە وڵاتانیتر، بەتایبەت ئەو وڵاتانەی لەژێر چەوسانەوەدان، شیعر دەتوانێ ئەوین ببەخشێت و ببێتە گریان و ببێتە خۆشی، جۆنسۆن لەپێشەكی شكسپیردا دەڵێت: ئەركی نوسەر ئەوەیە جیهان جوانتر لەوەی كە هەیە نیشان بدات، بەڵام دەبێ شتەكان وەك خۆی نیشان بدرێن، تا ئازار و ناشرینیەكانیش بەڕوونی دیاربن، مەبەستی جۆن سۆن ئەوەیە ئەو جوانیانەی هەن نەكەونە بەر ناشرینیەكان و وون بن، هیوا لەدەست نەدرێ"،
ئەو گەنجە بەهرەمەندە لە بارەی كات و ساتی نوسینی شیعرەوە دەڵێ‌"شیعر بەشێكی ئیلهامە، بەشێكیشی وەك "هەڵمەت عوسمان"ی شاعیر دەڵێت، گەر روداوێك رووبدات، كەسی ئاسایی تەنها پێی ناخۆشە، بەڵام شاعیر دەچێتە دیوی دووەمی روداوەكەو بەجۆرێ دای دەڕێژێ لە شیعرێك دا، بۆیە ناكرێ بڵێین كاتێكی دیاریكراومان هەیە، چونكە ئیلهام و رووداوەكان كاتیان بۆ دانەنراوە، وەك خۆم زیاتر لە شەودا دەنوسم، چوونكە سرووشتی بەشە ئیلهامیەكە وایە، لەشەودا زیاتر دێت"،
نەسەی باڵەكایەتی، كە چەند ساڵێكە دەستی داوەتە نوسینی شیعر و لەبارەی گەنجە شاعیرەكانەوە دەڵێ‌"لەو چەند ساڵەی ڕابردوو كۆمەڵێ شاعیری گەنج هاتونەتە مەیدانی شیعری كوردی، گەر بەرگێكی تریشیان نەدابێتە بەر شیعر، جوانی و ئەهمیەتی شیعریان وەك خۆی هێشتۆتەوە، نموونەی ئەم شاعیرانەش زۆرن و، درێژەیان بە ڕێبازی كلاسیك داوەو جوانییەكەیان هێشتۆتەوە، لە شیعری ئازادیش دا كۆمەڵێ شاعیر هەن جێ پەنجەیان دیارە، جێگەی ئومێدن"، هەمیشە لە كۆمەڵگەی كوردەواری قسەی زۆر لەسەر كپتی ژن دەكرێت نەسە سەبری، نایشارێتەوەو گووتیشی"نەك ئافرەت كپت كراوە بەڵكو ئەو پیاوانەی شیعریان دەنوسی بەهۆی هەڵ و مەرجی سیاسی رێگری بەردەوامیان لێ دەكرا، دەكرێ بڵێین ئەوانەی دوای پڕۆسەی هاوسەرگیری واز لەشیعر دەهێنن، هەستی شیعر لە ناخیان نەڕواوە، چونكە شاعیر ناتوانێ واز لە شیعر بهێنێ، ئەمە دەبێتە خاڵێكی لاواز لە شیعری كوردیدا، چونكە رێژەی شیعر كەم دەبێتەوە، رێَژەی جوان نوسی كەم دەبێتەوە، گەر سەیر كەین پێشتر ئافرەت ئەستەم بوو لە بواری ئەدەب بنوسێت نەك بۆ ئافرەت بگرە بۆ پیاویش هەندێ سەخت بوو ناخی دڵی خۆیی و كۆمەڵگە دەربڕێت لەبەر باودۆخی سیاسی، بەلام ئێستا خۆشبەختانە كۆمەڵێ ئافرەت بە بوێریەوە هاتونەتە مەیدانی ئەدەبی شیعر نوسین و، جێ پەنجەیان دیارە، كۆڕی شیعری دەبەستن و كتێب چاپ دەكەن، بەڵام ئێستاش هەندێ ئافرەت شاعیری پڕ جوانین، بەڵام رێگریان هەیە لە نوسین".

زۆرترین بینراو