هاوشان لەگەڵ (زاخۆ) پێویستە (سۆران )یش بكرێتە ئیدارەی سەربەخۆ

وەیسی سەعید وەیسی

ئەندامی پەرلەمانی كوردستان

شاری سۆران لەڕووی كارگێڕییەوە سەر بە پارێزگای هەولێرە و دەكەوێتە باكوری ڕۆژهەڵاتی شاری هەولێر، ژمارەی دانیشتووانی زیاتر لە 200 هەزار كەسە. سۆران ئێستە ناوەندی كارگێڕی قەزاكانی وەك چۆمان، مێرگەسۆر و ڕەواندزیشە، تەنیا لە سەنتەری سۆران 65 فەرمانگەی حكوومی هەیە كە زیاتر لە 45 فەرمانگەیان كارەكانی هەرچوار شارۆچكە ی "سۆران و مێرگەسۆر و چۆمان و رواندز" بەڕێوە دەبەن. هەروەها بەهۆی بوونی دەروازەی نێودەوڵەتی حاجی ئۆمەران پێگەیەكی گرنگی ئابووریشی هەیە، وێرای ئەوەی بەهۆی هەڵكەوتەی جوگرافی و بوونی سروشتێكی جوان، دەڤەری سۆران لە سەدا ٣٠% كەرتی گەشتیاری عیراقی پێك دەهێنێت.
لەگەڵ ڕۆڵی دیاری دەڤەرەكە لە بزوتنەوەی رزگاریخوازی گەلی كوردستان كە هەمیشە پاڵپشت وپشتیوانی شۆرش و راپەرینەكان بووە، لەهەموو قۆناغەكانیشدا ڕۆڵەكانی خۆی پێشكەشی كوردستان كردووە، ئەمەش وادەكات بەقەد خەبات و قوربانیدانی خزمەتی دەڤەرەكە بكرێت.
نەخاسمە ساڵانێكە خەڵكی تێكۆشەری دەڤەرەكە لە چاوەڕوانی كردنەوەی ئیدارەی سەربەخۆدان، كە سەرۆكایەتی ئەنجوومەنی وەزیران بە نوسراوی ژمارە 1650 لە (8)ی مانگی (2)ی ساڵی 2011 بڕیاریدا بە كردنەوەی ئیدارەی سەربەخۆی سۆران تاكو مامەڵەی پارێزگای لەگەڵ بكرێت، كەچی تائێستا بڕیارەكە جێبەجێنەكراوە، ئەوەش نیگەرانی دانیشتووانی دەڤەرەكەی لێكەوتۆتەوەو بە بەردەوامی ئەم داواكاریە رووبەروومان دەكەنەوەو داوادەكەن لەكابینەی نۆیەمی حكومەتی هەرێمی كوردستان هەوڵی پێویست بدرێت بۆ ئەوەی بڕیارەكە بەشێوەی كردەیی جێبەجێ‌ بكرێت.
وێرای ئەوەی لە پێشووتریشدا پەرلەمانی كوردستان بەبریاری ژمارە (11) لە22-9-1999 بڕیاری هێنانەكایەی بەپارێزگابوونی سۆرانی داوە، بەڵام تاكۆئێستا ئەم بریارەش نەچۆتە واری جێبەجێكردنەوە.
بەتێروانینی هەمووان، ئەمە بڕیارێكی گرنگ و پێویست و لە جێی خۆیەتی كە سۆران بكرێتە ئیدارەی سەربەخۆ، چونكە دەڤەرێكی بەرفراوانەوە سنووری هەرچوار قەزاكانی (سۆران، مێرگەسۆر، چۆمان، رواندز) بەیەكتردەبەستێتەوەو، ناوەندێكی گرینگیشە لە ڕووی ئابووری و دەروازە سنوورییەكان، هەروەها ڕێژەی دانیشتووانیشی ڕۆژبەرۆژلە زیادبووندایە، لەگەڵ ئەوەشدا بۆ رایكردنی ئیش و كاری هاووڵاتیان، شوێنەكە دوورە دەستە تا سەردانی شاری هەولێر دەكەن بۆیان ئاستەم دەبێت، بەڵام ئەگەر ئیدارەیەكی سەربەخۆ هەبێت، ئەوە دەتوانرێ سەرجەم كارەكانی هاووڵاتیانیش لەبری هەولێر، لە سۆران ئەنجام بدرێن. هەر چەندە ئێمە وەك نوێنەرانی دەڤەرەكە لە پەرلەمانی كوردستان بە نووسراوی فەرمی لە رێگای سەرۆكایەتی پەرلەمانی كوردستانەوە داوامان لە لایەنە پەیوەندارەكانی حكومەتی هەرێمی كوردستان كردووە بۆ كاراكردنی بڕیارەكە و سۆران بكرێتە ئیدارەیەكی سەربەخۆ، لە داهاتووشدا هەموو هەوڵێكمان لەم پێناوەیەدا دەخەینەگەر.
گرنگە كابینەی نۆیەمی حكوومەت ئەم بریارەیە بخاتە واری جێبەجێكردنەوە لەپێناو خزمەتكردنی زیاتری هاوڵاتیان و كەمكردنەوەی رۆتینیاتی ئیداری، بە تایبەتیش دوای سەردانەكەی بەرێز مەسروور بارزانی سەرۆكی حكوومەتی هەرێمی كوردستان بۆ قەزای زاخۆ و جەختكردنەوەی لەسەر كاركردن بۆ ئەوەی زاخۆ بكرێتە ئیدارەی سەربەخۆ، ئەمەش كارێكی گرنگ و پێویستە، بەهۆی بوونی پێگەی جوگرافیی تایبەتمەندیی قەزای زاخۆ، بەڵام لەگەڵ بە ئیدارەكرنی زاخۆ، پێویستە دەڤەری سۆرانیش بكرێتە ئیداری سەربەخۆ بۆ ئەوەی هەم ببێتە دیاری كابینەی نۆیەم بۆخەلكی تێكۆشەری سنورەكە و هەمیش ئەو بارگرانییەی لەسەر ئیدارەی پارێزگای هەولێر هەیە كەمتر ببیتەوە.

زۆرترین بینراو