هاووڵاتیان داوای داخستنی بازاڕی رۆژانی هەینی سۆران دەكەن

هاووڵاتیان داوای داخستنی بازاڕی رۆژانی هەینی سۆران دەكەن

محەمەد ئامۆكەیی- زاری كرمانجی: بەشێك لە هاووڵاتیانی سۆران نیگەرانی خۆیان سەبارەت بە هەفتە بازاڕی سۆران كە بە بازاڕی هەراج ناسراوە دەردەبڕن كە لە رۆژانی هەینی خەڵكێكی زۆر بۆ كڕینی شمەك و كاڵای نرخ هەرزان ڕووی تێدەكەن و شوێنەكەی دەكەوێتە شەقامی جووتسایدی نزیك گۆشتفرۆشان لە سەنتەری شار.
هاوڵاتی (هیمداد محەمەد) كە كاری شوفێری دەكات لە سۆران، بەگلییەوە سەبارەت بەو بازاڕە دواو و گووتی"ئێمە لەسۆران كێشەی سیستەمی هاتووچۆمان هەیە بەهۆی تەسكی شەقام و قەرەباڵغی و زۆری ئۆتۆمبێلەوە، كەچی شەقامی جووتسایدی سەنتەری شار كراوەتە بازاڕ، ئەوەش ئاستەنگی گەورەی لەبەردەم شوفێران دروستكردووە و هەندێجار بەنیو كاتژێر زیاتر لە دیانای كۆنەوە ناگەینە سەنتەری شار بەهۆی ئەو بازارەوە، بۆیە داواكارین شوێنی ئەو بازار لە سەنتەری شار لابدرێت.
رۆژنامەنووسێكیش نارەزایی خۆی لەبارەی ئەم بازاڕە دەخاتەڕوو و دەڵێت: ئەم شوێنەی كراوەتە هەفتەبازاڕ هیچ تایبەتمەندییەكی بازاڕی تیادا نیە و رێخۆشكەرە بۆ تاوانەكانی وەك دزی و شەڕو كێشە و ڕووداوانی كاری نەخوازراوی وەك ئاگركەوتنەوە كە بەهۆی بێسەروبەری و قەرەباڵغییەوە كۆنتڕۆڵكردنی ئەم ڕووداوانە كارێكی ئاسان نابێت. هەروەها پاشمەوەیەكی زۆری كەلوپەل لەسەر شەقام بەجێ دێیڵن ئەمەش جگە لەوەی سیمای شار ناشرین دەكات هاوكات ئەركی پاككەرەوەكانیش قورس دەكات بۆ خاوێنكردنەوەی شەقامەكە، بۆیە پێشنیار دەكەم كە قائیمقامیەت و شارەوانی سۆران بە بڕیارێكی ئیداری ئەم بازاڕە لە سەنتەری شار لابدەن و شەقامەكە بۆ مەبەستی سەرەكی خۆی كە هاتوچۆكردنە بەكاربهێنریت.
بەڕێوەبەری تەندروستی سۆرانیش ئەوە دەخاتەڕوو كە هیچ رێنمایی و مەرجی تەندروستی لەم بازاڕدا بوونی نییە، لەبەر ئەوەی ئەو كەلوپەلانەی دەفرۆشرێن لەسەر شەقامی گشتی بەبێ چاودێری ورد دەخرێنەبەردەم كڕیار و بۆیە بوونی ئەم بازاڕە لەڕووی تەندروستی و كواڵیتیەوە جێگای پرسیارە.
دوكاندارێك لە دووكانەكەی دانشتبوو، ماندوویەتی بازار هیلاكی كردبوو، بەوپەڕی بێزاریەوە لەبارەی ئەم بازارەوە بۆ زاری كرمانجی دواو گووتی: بەداخەوە جێگای نیگەرانیە كە ئێمە كرێی دوكان و باج و زەریبە دەدەین، كەچی خەڵكانێك دێن لەسەر شەقامێكی گشتی تایبەت بەهاتووچوو خەڵك شوێنی تایبەت و دوكانیان بۆخۆیان داناوەو كەلوپەلی كوالیتی نزم دەفرۆشن و كە بەشێكی ئەو كەسانە لە دەرەوەی سۆرانەوە هاتوون، ئەم بازاڕە جگە لەوەی سیمای شاری ناشرین كردووەو هاتووچۆشی پەكخستووە، هاوكات زیانی لە بازاری گشتیش داوە، بۆیە داواكارین ئەو بازاڕە بێسەروبەرە دابخرێت.
زاری كرمانجی نیگەرانی هاووڵاتیانی گەیاندە شارەوانی سۆران و لە پەیوەندییەكی تەلەفۆنی سەرۆكی شارەوانی سۆران (كاوە نەجم) لەبارەی بوونی ئەم بازاڕە گووتی: ئێمە ئاگاداری نیگەرانی هاووڵاتیانین سەرەبات بەم بازاڕە كە بۆتە هۆی دروستبوونی قەرەباڵغی بەتایبەتی لەڕووی هاتووچۆە، بەڵام لەبەر ئەوەی خەڵكانێكی هەژار لەو هەفتە بازاڕە داهاتێكیان دەست دەكەوێت نەمان ویستووە ببینە هۆكاری بڕینی قوتی ئەو خەڵكە. بۆیە لە بەرنامەماندایە كە ئەو بابەت بخەینە بەردەم ئەنجومەنی شارەوانی بۆ ئەوەی بتوانین شوێنێكی تر لەدەرەوەی سەنتەری شار بۆ ئەو كەسانە دابین بكەین.
دلاوەر لەتیف، بەرپرسی راگەیاندنی بەڕێوەبەرایەتی هاتووچۆی سۆران، بۆ زاری كرمانجی گووتی" ئەو دووسایدە بەكەمەربەندی سەنتەری شاری سۆران دادەنرێت و بۆ ئەوەیە خەڵك لەو جەنەجالییەی لە بازاڕ هەیە خۆیان بپارێزن، زۆربەی رۆژانی هەینی خنكان لە بازاڕ دروست دەبێت و بگرە هەندێ جاریش رێگە دادەخرێت و ئەوەش كاری پۆلیسی هاتووچۆ قورستر كردووە، ئێستاش نازانین ئەو كەسانەی لەوێ كاردەكەن لە لایەن كێوە رێگەیان پێدراوە كە بە ئارەزوی خۆیان ئەو شەقامە بەكار بێنن و لە هیچ یاسایەك نیە شەقام بكرێتە شوێنی ساخكردنەوەی كاڵا."
ئەوەشی گووت" كاری ئێمە وەك هاتووچۆ ئەوەیە كە بەهیچ شێوەیەك نابێت لەو شوێنە ئۆتۆمبێڵ بوەستێت و هەموو ئەوانەی دەستگێرن و یاخود عەرەبانەیان پێیە ئیشی لیژنەكانی قائیمەقامیەتە لێپێچینەویان لەگەڵ بكات، بۆیە هەركارێك بە ئێمە بسپێردرێت لەسەر ئەو بابەتە جێبەجێی دەكەین.

 

زۆرترین بینراو