هاووڵاتییانی هەرێم بۆ چارەسەری پزیشكی ڕوو لە رۆژهەڵاتی كوردستان دەكەن

هاووڵاتییانی هەرێم بۆ چارەسەری پزیشكی ڕوو لە رۆژهەڵاتی كوردستان دەكەن

محەمەدباڵەك- ئورمیە: ماوەی چەند ساڵێكە، هاووڵاتیانی هەرێمی كوردستان، بەهۆی بوونی قەیرانی دارایی و كەمی بەهای دراوی ئێرانی بەرامبەر بە دۆلار و دیناری عێراقی، بە مەبەستی چارەسەری تەندروستی و بەشێكیشیان بۆ گەشتیاری بەلێشاو ڕوو لە شارەكانی ڕۆژهەڵاتی كوردستان و وڵاتی ئێران دەكەن، زاری كرمانجی لە شاری ئورمیە ڕاپۆرتێكی مەیدانی ئەنجام داوە، سەردانی كەران هۆكارەكانی چوونیان بۆ رۆژهەڵاتی كوردستان دەخەنەڕوو .
مستەفا حوسێن كە خڵكی شاری كەركوكە و لەبەردەم دەرگای دكتۆرێكی كۆمەڵگای حەسەنیە وەستابوو كە كۆمەڵگەیەكی پزیشكیە و ڕۆژانە 24 كاتژمێر نەخۆش سەردانی ئەكەن، بۆ زاری كرمانجی گووتی" هاتنمان بۆ ئێرە و بڕینی ئەم ڕێگادوورە، هۆكارەكەی ڕوون و ئاشكرایە، لە كوردستان هێندەی گرینگی كۆكردنەوەی بە پارە دەدەن، هێندە گرینگی بە نەخۆش و گرنگی مرۆڤەكان نادەن، لە لایەكی تر، كوالێتی دەرمانەكانی رۆژهەڵاتی كوردستان بەرزن و ئەو ئامێرانەی پشكنین و تیشكی پێدەكەن پێشكەوتوو ترن، ئەمەش وای كردووە خەڵكانێكی زۆر ڕوو لە ئێران بكەن بۆ مەبەستی چارەسەری پزیشكی.
رابیعە خەلیل كە ئافرەتێكی تەمەن 50 ساڵانە و دانیشتووی شاری هەولێرە و لەیەكێك لە نۆرینگەكان لەسەر كورسی چاوەڕوانی دانیشتبوو بە زاری كرمانجی گووت" دكتۆرەكانی ئێرە خاوەن ئەزموونن و بەچەند پشكنینێك ئەگەنە ئەنجامی نەخۆشیی، بەڵام لە هەرێمی كوردستان جیاوازە و دەیان جار بۆ چەندین نەخۆشی سەردانی بنكەی تەندروستی و نەخۆشخانەی گشتیم كردووە ژمارەیەیێكی زۆری داو دەرمانم بەكارهێناوە، هیچ كاریگەری نەبووە .
زیاتر دەڵێت" لێرە بە سێ جۆری پشكنین تەواوی نەخۆشیەكانم دەركەوتوون، ئەمە جاری دووەمە سەردانی ئێرە دەكەم، دووبارە پشكنینەكانم كردۆتەوە و بەڕێژەیەكی بەرچاو چارەسەری نەخۆشیەكەم كراوە، ئومێدەوارم لە كوردستانیش ئەم جۆرە ڕێكاریانە و ئەم ئامێرانە بۆ خزمەتی خەڵكی بهێننە كوردستان و بەشێوازێكی باش لەخزمەت نەخۆش دابن، با ئەو پارەییەی لە ئێران و ووڵاتانی دی خەرج دەكرێت، هەر بۆخۆمان بێت".
هەرچەندە لە هەرێم كوردستانیش دكتۆری باشی هەیە بەڵام چەندین جار سەدان هەڵەی زەقی دكتۆرەكانمان بینیوە، بۆیە متمانەم بەدكتۆرەكانی خۆمان نەماوە، ئەمە دەستپێكی قسەكانی هاووڵاتی شێروان خێروڵایە، ئەو هاووڵاتیە كەلە قەزای كفری یەوە سەردانی شاری ئورمیەی كردوە بۆ مەبەستی چارسەری باوكی بۆ زاری كرمانجی زیاتر دەڵێت" كەرتی تەندرووستی لە هەرێمی كوردستان تەواو وێرانە، خەڵكی متمانەی بە دكتۆرەكان نەماوە، نمونەی زۆریش هەن كە لەڕاگەیاندنەكان بینیومانە، كۆمپانیا هەیە تەنها گەچی هێناوە و بەحەبی ئۆرجیناڵی فرۆشتۆتە خەڵكی، كەی دووایی پشكنینی بۆكراوە تەنها گەچ بووە، یان بینیومانە لەفاف و مەقەس لە زگی نەخۆش بەجێهێڵدراوە ئەمانە و چەندان هەڵەی وا ڕویداوەو نەمان دیوە كەس لەسەر ئەمە سزا بدێت، هەر ئەمەش وای كردووە خەڵكی پەنا بۆ ووڵاتانی تر ببات بۆ مەبەستی چارسەركردنی نەخۆشەكانی".
لە زۆربەی شارەكانی كوردستان گەڕاوم هیچ دكتۆرێك نەیتوانی نەخۆشیەكەم بدۆزێتەوە، لێرە توانراوە نەخۆشیەكەم بدۆزرێتەوە، ئەمە دەستپێكی قسەكانی بوڕهان جەلیل ە كە هاووڵاتییەكی دانیشتوی هەڵبجەی شەهیدە، لە درێژەی قسەكانی دەڵێت" چەند مانگێك بەر لە ئێستا بە شێوەیەكی كت و پڕ باری تەندروستیم تێكچوو، بەڕدەوام سەرم گێژی ئەخوارد و ئەڕشامەوە، لەسلێمانی سەردانی چەند دكتۆرێكم كرد، بەڵام بێسودبوو، هەروەها سەردانی هەولێرم كرد بەهەمان شێوە چارەسەری نەخۆشیەكەم نەكرا، بەڵام لە ماوەی رابردوو هاتمە شاری ڕەزایە و دكتۆرێكم دۆزیەوە، دوای ئەنجامدانی چەند پشكنین و سۆنار دەركەوت كە دوانزەگڕێم انتهابی كردووە، ئەمەش كاریگەری كردبووە سەر گەدەم و گەدەشم انتهابی كردبوو، دوای وەرگرتنی چارەسەر لێرە ئێستا بۆ ئەنجامدانی پشكنینی دڵنیایی هاتومەتەوە و جیاوازیێكی زۆرم كردوە لەنەخۆشیەكەم، ئەمەش ئەوە دەرئەخات دكتۆرەكانی ئێرە، زۆر لێهاتوو شارەزان لە دیاری كردنی نەخۆشیەكان .
هیمداد ئازاد هاووڵاتێكی دانیشتوی شاری سۆرانە و بۆ مەبەستی نەشتەرگەری براكەی لەگەڵ نەخۆشەكە، هاتبونە تەبرێز بۆزاری كرمانجی گووتی" بوونی مەرجی سەلامەتی و دڵسۆزی كاركردنی پزیشكان و شارەزاییان وای كردووە بەلێشاو خەڵكی ڕوو لەشارەكانی ئێران بكات، ڕاستە لێرە هەموو چاەسەرێك بە پارە دەكرێت و پارەی ئێران بێ بایەخە بەرامبەر پارەی ئێمە، بەڵام ئەو دەرمانانەی وەك چارەسەر وەردەگیرێن لەهی كوردستان باشترن و خێراترن لە چارەسەر بوون .
بەختیار لەتیف یەكێكی ترە لەو هاووڵاتیانەی سەردانی ئیرانی كردووە بۆ مەبەستی چارەسەری بەڵام ئەو پێچەوانەی ئەوانی تر دەڵێت" لە ئێران هیچ مەبەستێك چارەسەركردن نییە، جگە لە بازرگانی كردن، چونكە ئەزانن پارەی ئەوان هیچ بایەخی نیە پارەیەكی یەكجار زۆرت لێوەر ئەگرن، راستە دەرمانەكانی ئێرە باشن، بەڵام مامەڵە و هەڵس و كەوتی خەڵكی لە گەڵ ئێمە خراپە و هەردرمانێك بكری سێ ئەوەندەی خەڵكی وەرئەگرن، بەختیار دەڵێت" سەردانی دكتۆرێكی گورچیلەم كرد، گووتی بڕۆ سۆنەرێكم بۆبكە، سەرەتا كە پێش بچمە لای دكتۆر 120000 تومەنم پێدان، كاتێ چوم سۆنەرم كرد135000 تومەنیان وەرگرت، كاتێ چوم سۆنەر نیشانی دكتۆر بدەمەوە 120000 تومەنی وەرگرتەوە، واتا تەنها لەیەك نەخۆش 240000 یان وەرگرت، هەرچەندە ئەم بڕە پارە بۆ ئێمە كەمە، بەڵام بۆ ئەوان بڕێكی زۆرە، ئەتوانم بڵێم بەشی زۆری دكتۆرەكانی ئێرە لە سەر پارەی ئێمە ئەژین و لەبەر كوردەكانی ئێرە نەبێت ئەوان ئەو بازار و داهاتەیان نییە، جگە لەمەش هاتنی ئەم هەموو خەڵكە تەنها چاولێكەریەو هیچی تر، من بەش بەحاڵی خۆم جاری یەكەممە دێمە ئێرە، دواجاریشم ئەبێت، چونكە گەیشتمە ئەو بڕوایەیی لێرە جگە لەمەبەستی بازرگانی هیچ مەبەستێكی تر لە ئارادانیە".
هەرچەندە كاری ڕاگەیاندن بە شێوەیەكی ئازاد لە وڵاتی ئێران رێگە پێدراو نییە و قەدەغەیە، بەهەرجۆرێك بێت توانیمان لێدوان لە دكتۆرێكی ئەوێ وەربگرین كە ڕازی نەبوو ناوەكەی ئاشكرا بكەین، بە زاری كرمانجی راگەیاند" رۆژانە تا هاووڵاتیێكی ئێرە بەڕێ ئەكەین چەندین هاووڵاتی عێڕاقی و كورد بەڕێ ئەكەین كە بۆ چارەسەری پزیشكی روویان لە ئێران كردووە، خەڵكی تەواوی شارەكانی هەرێمی كوردستان سەردانی ئێران دەكەن بۆ وەرگرتنی چارەسەری .
ئەو دكتۆرە سەر سوڕمانی خۆی دەربڕی و گووتی " لای ئێمەی دكتۆرەكانی ئێران سەیرە ئایا لەعێراق و كوردستان چۆن دكتۆری باش نییە و چۆن ئەو هەموو خەلكە روو لە ئێران دەكات، یان خەڵكی بەچاولێكەری دێنە ئێرە، هەر نەخۆشێكیش كە سەردانی كردووین ماوەیەكی زۆبرە تووشی نەخۆشیەكە هاتوون كەدێنە ئێە چارەسەر وەردەگرن و دوای ئەوەی سەردانمان ئەكەنەوە نەخۆشیەكان چارەسەر بووە، ئەوانەی سەردانیشمان ئەكەن باسی خراپی كوالێتی دەرمان و ناشارەزایی دكتۆرەكان دەكەن .
بەپێی زانیاریەكانی زاری كرمانجی، ڕۆژانە ژمارەیەكی بەرچاو لە سەرجەم شارەكانی هەرێمی كوردستان دێنە ڕۆژهەڵات بۆ مەبەستی چارەسەركردن نەخۆشیەكانیان، زۆرترینیش روو لە شارەكانی ئورمیە و تەبرێز و بەشكیش دەچنە تارانی پایتەختی ئێران، بەشی زۆریشی ئەو سەردانی كەرانە لە ئێران كۆنتاكیان لەگەڵ شوفێران هەیە، شۆفێرەكانیش بەهەمان شێوە كۆنتاكیان لەگەڵ ساختمان و داروخانەكان هەیەو بەشێك لەو پارەیەی لە نەخۆشەكان وەری ئەگرن دەیدەنە ئەو شۆفێرانە،هەندێك شۆفێرانیش ئەمە بەدەرفەت ئەزانن و پارەیەكی زۆریان دەست ئەكەوێت، ئەو پارەییەی وەری ئەگرن لەبەرامبەر پارەی عێراق كەمە، بەڵام بۆ خەڵكی ئێرە زۆرەو ڕۆژانە پارەیەكی خەیاڵی ئەچێتە گیرفانی ئەوان .

 

 

بیروڕا

زۆرترین بینراو