هاووڵاتییان داوایی دابەشكردنی ستومەنی دەكەن

هاووڵاتییان داوایی دابەشكردنی ستومەنی دەكەن

محەمەد باڵەك - سۆران: بەهۆی هەڵكەوتەی شوێنی جوگرافی دەڤەری سۆران ناوچەیەكی ساردە لەزستاندا، ئەمەش وادەكات خەڵك زیاتر لەناوچەكانی تر سوتەمەنی بەكار بهێنن، بۆیەش داواكارن، پەلەبكرێت لەدابەشكردنی سوتەمەنی بەسەر هاووڵاتیاندا، وە هۆشداریش دەدەن، ئەگەر بێت و وەك دوو ساڵی ڕابردوو، درەنگ سوتەمەنی دابەشبكرێت، ڕەنگە زیانێكی زۆر بەر ژینگەبگات و دارستانەكان لەناوچەشاخاوییەكان ببڕدرێن.
ئادەم ئیسماعیل هاووڵاتیێكی دانیشتووی گەڕەكی وەستارەجەبە و بە زاری كرمانجی گووت" سۆران و دەوروبەری ناوچەیەكی زۆر ساردە، ئەمەش وای كردووە لێرە زووتر هەست بەسەرما بكرێت و وەزی ساردو سەرما زووتر لێرە دەستپێدەكات و درەنگتر كۆتایی دێت، ئەمەش وادەكات خەڵكی ئەم ناوچەیە زیاتر پێویستیان بە سوتەمەنی بێت، بۆیە داواكارین لەحكومەتی هەرێمی كوردستان پەلەبكەن لەدابەشكردنی سووتەمەنی بەسەر هاووڵاتیان، چونكە لەگەڵ هاتنی وەرزی سەرما نرخی سوتەمەنی بەرزدەبێتەوەو بەشێكی زۆری هاووڵاتییان توانای كڕینی نییە".
مەولود مستەفا هاووڵاتیێكی دانیشتووی باڵەكایەتی یە بۆ زاری كرمانجی گووتی" سنووری باڵەكایەتی بەگشتی ناوچەیەكی شاخاویە و لەوەرزی پایز و زستان و بەشێكی وەرزی بەهاریشی لەگەڵ بێت ساردە، پێویستە لە ئێستاوە حكومەت دەست بەدابەشكردنی سوتەمەنی بكات بەسەر گوندنیشینەكان بەتایبەتی و ئەوانەی لە شارەكانیشن، چونكە ئەگەر سوتەمەنی نەبێت ناچارین دارەكان ببڕینەوە، بەمەش زیان بەژینگەی ناوچەكەمان دەگات، لەگەڵ ئەوەشدا، ناتوانین ڕێگری لە خەڵكی تریش بكەین كە دار نەبرن، چونكە ئەگەر ناچار نەبن و سوتەمەنی هەبێت دار نابڕن".
هیوا سەلیم هاووڵاتییەكی دانیشتووی دەڤەری سۆرانە بە زاری كرمانجی گووت" ئەمساڵ لەوەرزی هاوین بەشەنەوتی زستانم وەرگرتووە، ئەگەر وەك ساڵەكانی رابردوو بەمجۆرەبكەن دابەشی نەكەن باشترە، چونكە لەوەرزی هاوین چی لەنەوت بكەین؟ بۆیە لەسەر حكومەتی هەرێم پێویستە ئەمساڵ بەر لەهاتنی وەرزی سەرما سوتەمەنی دابەشبكەن، چونكە خەڵكی ئێستاشی لەگەڵ بێت ئاسەواری قەیرانی دارایی بەسەرەوە ماوە توانایی كرینی سووتەمەنی نیە، یان دەبێت سوتەمەنی دابەشبكرێت، یان دەبێ ڕێگا بەبڕینی دارو درەخت بدرێت".
هەمین شێرزاد كچە چالاكوانێكی سیدەكانە لەم بارەیەوە بۆزاری كرمانجی گووتی" سەبارەت بە گرینگی زوو دابەشكردنی نەوتی هاووڵاتییان پێم وایە گرینگیەكەی لەوەدایە كە یارمەتیدەرێكی باشی هاوڵاتیانە، هاووڵاتییان ناچار نین بچن بەرمیلێك نەوت بە سەرووی سەت هەزارەوە بكڕن، وە خەڵكی كەم دەرامەت هەیە بەداخەوە توانای ئەوەی نییە نەوت بكڕێت، هەروەها دابەش كردنی نەوت لەو كات و ساتەدا پارێزگاری دەكات لە پاراستنی ژینگە، چونكە بەداخەوە ئەگەر بێت وسەیربكەین دەبینین كە داربڕین بووە بە دیاردەیەكی مەترسیدار، كە ئەمەش هۆكارەكەی دەگەڕێتەوە بۆ درەنگ دابەشكردنی بەشە نەوتی هاووڵاتییان، كە بەداخەوە زیان بە ژینگە دەگەیەنێت، چونكە ڕێژیەكی زۆر لە دار دەبڕدرێتەوە، ئەگەر بێت و سووتەمەنی زوو دابەش بكرێت هاووڵاتییانیش ناچار نین بچن دار ببڕنەوە، كە ڕەنگە لەداهاتوودا زیانی زۆر گەورەمان بەر ژینگە بكەوێت، هیوادارم لایەنە پەیوەندی دارەكان ڕێبگرن لەو دیاردە مەترسیدارە كە بەداخەوە بەرەو هەڵكشانە، چارەسەریش زوو دابەشكردنی بەشە نەوتی هاووڵاتیانە".
شایەنی باسە، لە دوایین كۆبوونەوەی ئەنجومەنی وەزیرانی حكوومەتی هەرێمی كوردستان، بڕیاردراوە پێش هاتنی وەرزی زستان نەوت بەسەر هاووڵاتییان دابەش بكرێت. بەپێی زانیارییەكانی زاری كرمانجی، دوای كۆبوونەوەی ئەنجوومەنی وەزیران، بڕیارە حكوومەتی هەرێمی كوردستان، هەر خێزانیەو بڕی بەرمیلێك نەوتیان بەسەر دابەش بكات و بەم نزیكانەش دابەشكردنی نەوتەكە دەست پێبكات". ئەوەش ئاشكرا كراوە ، كە هەرێمی كوردستان، پێوستی بە 250 ملیۆن لیتر نەوت هەیە، تا بەسەر هاووڵاتییانی شارو شارۆچكەو گوند و ناوچەكانی هەرێمی كوردستان دابەشی بكا .

زۆرترین بینراو