هاووڵاتییەكی دانیشتووی رواندز وزەى کارەبا دروست دەکات

هاووڵاتییەكی دانیشتووی رواندز وزەى کارەبا دروست دەکات

دیدار- محەمەد هەسنانی: هاووڵاتییەكی دانیشتووی رواندز، توانیویەتی داهێنان لە رووی پەخشی رادیۆ و تەلەفزیۆن و ئامێرە تەكنەلۆجیاكان بكات، هەروەها كارەبایی ماڵەوەشی لە وزەی خۆر بەرهەمهێناوەو دەلێت " ئەگەر لەبەر گرفتی ماددی نەبوایە پڕۆژەی تازەو دەگمەنم بەرهەم دەهێنا".
كارزان حەمەد حەمەد ئەمین، لە دایكبووی ساڵی 1980 دانیشتووی شارۆچكەی رواندزە، قوتابی پەیمانگای داتای ناحكومی سۆرانە، تیشك دەخاتە سەر كارو پڕۆژە ئەلكتڕۆنی و تەكەنەلۆجیەكانی و دەڵێت " لە پەنای ئەركی فەرمانبەریم دوكانی چاككردنەوەی رادیۆو تەلەفزیۆن و ئامێرە ئەلكتڕۆنییەكانم هەیە، لە تەمەنی هەرزەكاریم ئاشنایم لەگەڵ بواری تەكنەلۆجیا دروست كردووەو توانیومە چەند ئامێرێك دروست بكەم، لە ساڵەكانی نەوەدەكان توانیم پەخشی رادیۆی fm لە شاری هەولێر دروست بكەم، بەشێوەیەكی سەركەوتووانە، پەخشی ئەم رادیۆیەم لەساڵی 1996 لەپێشانگای بەڕێوبەرایەتی چاودێری زانست لە شار هەولێر نمایش كرد، كە مامۆستا ئەحمەد سالار و خاتوو ناسكە بەڕێوبەری چاودێری زانستی و ژمارەیەكی بەرچاو لە رۆشنبیران و چین و توێژەكان ئامادەبوون، هەروەها رۆڵم هەبووە لەپەخشی چەند رادیۆ و كەناڵێك لە كوردستاندا، ئێستاش دەتوانم لە رواندز پەخشی رادیۆ بەرهەم بێنم، كە پەخشەكەی بگاتە شاری هەولێر و دەورووبەری، هەروەها پەخشی تیڤی بە هەمان شێوە، داهێنانێكی ترم بریتی بووە لە درووستكردنی (مفقس) واتە ئامێرێكی تایبەت بە دەرهێنانی جوجەڵە، ئەوەش بەشێوەكی بەرچاو سەركەووتو بووە".
گووتیشی " دوای ماوەیەكی زۆر كاركردنم لە بواری پڕۆگرام سازی توانیم پڕۆگرامێك دورست بكەم كە دەتواندرێت بۆ فەرمانگە حكومی و كەرتی تایبەت و پەروردە و قوتابخانە و پاراستنی ئاسایشی نیشتمانی سوودی زۆری ڵێ وەربگیرێت، ئاسانكارییەكی زۆر دەبێت لەڕایی كردنی كاری هاووڵاتییان، ئەم پڕۆگرامە دەتواندرێ گشت كەسێك سوودی لێ ببینێت، ئەوانە زۆر شارەزا نین لە كۆمپیوتەر یا بەرنامەی ئەكسل، ئەم پڕۆگرامە لەتوانایدا هەیە ناو تۆماری نوێ زیاد بكات، بەدوایدا بگەڕێت و دۆزینەوەی ناوی دووبارەو دانانی بەروار بەخۆكارانە و چەندین كرداریتر، ڕەنگە نەتوانم هەموویان باس بكەم، ئەم پڕۆگرامە بۆ گشت قۆناغەكانی خوێندن دەبێت بۆ دانانی نمرەی قوتابییان، دەتواندرێت لەگشت دەزگاكانی حكومەت سوودی لێ ببیندرێت، تۆمارەكانی تێدا هەڵبگیرێت و بە ئاسانی بدۆزرێتەوە".
كارزان حەمەد، ئەوەش دەخاتەروو: "خەتێكی تایبەت بەئەنتەرنێتم بەرهەمهێناوە، كە زیاتر بۆ مۆبایلی خۆم بەكاری دێنم، هەروەها لەماڵی خۆم كارەبایی ماڵەكەم بە وزەی خۆر بەرهەمهێناوە، بە كەمترین تێچوو، واتە زیاتر لە دوو ساڵە كارەبایی مۆلیدەم نییەو پشتم بە كارەبایی خۆم بەستووە، بەهەمانشێوە ئامێری فێنككەرەوەم بەهەمانشێوە بە وزەی خۆر كار دەكات، بەشێوەیەكی گشتیش شارەزایی زۆرم هەیە لە رووی تەكنەلۆجیا، ویستم لەپاڵ ئەوەشدا بۆ خوێندن روو بكەمە پەیمانگای داتای ئەهلی كە شارەزایی زیاتر دروست بكەم و پەرە بە بەهرەو تواناكانم بدەم".
لەدوا قسەكانیدا كارزان حەمەد ئاماژەی بەوەدا: "لەتوانامدا هەیە پڕۆژەی گەورە لە رووی تەكنەلۆجیاو زانستییەوە ئەنجام بدەم، بەڵام كێشەو گرفتی سەرەكیم ماددیە، بەتایبەتیش كە خاوەن خێزانم و قوتابیم لەوانەیە كاركردن لەم جۆرە پڕۆژانە ئاستەم بێت، بەڵام ئەگەر لایەنێك هاوكارم بێت دەتوانم پڕۆژەی تازەو دەگمەن ئەنجام بدەم".

زۆرترین بینراو