هاووڵاتییەكی كورد دوای رادەستكردنەوەی بە ئێران لەسێدارە دەدرێت

هاووڵاتییەكی كورد دوای رادەستكردنەوەی بە ئێران لەسێدارە دەدرێت

بە پێی ئەو هەواڵەی كە ژمارەیەكی بەرچاو لە كەناڵەكانی راگەیاندنی ئێرانی و عەرەبی و كوردستان، بڵاویان كردۆتەوە، دوای ئەوەی هاووڵاتییەكی سیاسی، خەڵكی گوندێكی شاری سەقزی رۆژهەڵات لە زیندان هەڵدێت و دەگیرێتەوە ئەمڕۆ بەیانی لە سێدارە درا.
باسنیوز نووسیویەتی " مستەفا سەلیمی چەند هەفتەیەك لەمەوبەر و لە كاتێكدا بەشێك لە بەندكراوەكانی زیندانەكە هەڵاتوون، ئەویش هەڵاتووە و خۆی گەیاندووەتە سنووری پارێزگای سلێمانی.
لەمبارەیەوە ئەرسەلان یارئەحمەدی، سەرۆكی ڕێكخراوی مافی مرۆڤی هەنگاو لە پێگەی خۆیدا لە تۆڕی كۆمەڵایەتیی (فەیسبووك) بڵاوی كردووەتەوە كە مستەفا سەلیمی خۆی گەیاندووەتە گوندی (گەرمەك)ی سەر بە قەزای پێنجوێن و چووەتە ماڵی كەسێكەوە، ئەو كەسەش پەیوەندی بە ئاسایشی پێنجوێنەوە كردووە.
دواتر ئاسایش بە زۆر ڕەوانەی سنووری شاری بانەی ڕۆژهەڵاتی كوردستانیان كردووەتەوە".
زیاتر نووسراوە " ئاسایشەكان باسیان لەوە كردووە كە هۆكار ئەوە بووە، بە هۆی پەتای كۆرۆنا، هاتنی هەر كەسێكی خەڵكی ئێران بۆ هەرێمی كوردستان قەدەغە بووە و ئەوانیش بۆیە ئەویان گەڕاندووەتەوە، بەڵام من پشتڕاستی ناكەمەوە كە ڕادەستی هێزە ئەمنییەكانی ئێران كرابێت، بەڵكوو پاش رەوانەكردنەوەی بۆ ئێران، هێزە ئەمنییەكان دەستبەسەریان كردووە".

هەروەها ڕۆژنامەنووسی دیار رۆژهەڵاتی كوردستان عەلی جەوانمەردی، خەڵكی ڕۆژهەڵاتی كوردستان لە تۆمارێكی ڤیدیۆییدا دەڵێت " ئاسایشی یەكێتی مستەفا سەلیمییان ڕادەستی تیمێكی قەرارگەی رەمەزانی سەر بە سوپای پاسدارانی ئێران كردووەتەوە".
مستەفا سەلیمی پێشمەرگەی حزبی دیموكراتی كوردستانی ئێران بووە، 17 ساڵ لەمەوبەر وازی لە پێشمەرگایەتی هێناوە و گەڕاوەتەوە ئێران، لەوێش بە تۆمەتی هەڵكوتانە سەر پایگای ئێرانشای ساقز و كوژرانێكی چەكدارێكی پاسداران لە شاری نەهاوەندی سەر بە پارێزگای هەمەدان، دەستبەسەر كراوە و دواتر لەلایەن دادگای شۆڕشی سەقز بە سەرۆكایەتیی دادوەر (گەودینی) بە تۆمەتی (دزیی چەكدارانە) و (ئەندامێتی لە حزبی دیموكرات) حوكمی 15 ساڵ بەندكران و سێدارەی بە سەردا سەپێندراوە و ئەمڕۆ فەرمانی لەسێدارەدانەكەی جێبەجێ كراوە".

زۆرترین بینراو