هاووڵاتیەكی رواندز لەماڵەكەی كەل و پەلە رەسەنەكان كۆدەكاتەوە

هاووڵاتیەكی رواندز لەماڵەكەی كەل و پەلە رەسەنەكان كۆدەكاتەوە

دیدار-محەمەد هەسنانی: هاووڵاتیەكی خەڵكی ئاكۆیان لە سنووری قەزای رواندز، كە ئێستا دانیشتووی شاری سۆرانە، چەندین پارچە شوێنەوارو كەرستەی رەسەنی كە هندێكیان مێژووەكەیان دەگەڕێتەوە بۆ هەزاران ساڵ لەماڵەكەی كۆكردوونەتەوەو دەشڵێت "نیازم وایە مۆزەخانەیەك لەماڵەكەم بكەمەوە.
ساڵح عەبدولڵا، ناسراو بە وەستا ساڵح ئاكۆی، لەدایكبووی گوندی ئاكۆیان سەربە قەزای رواندز و دانیشتووی شاری سۆران رایگەیاند: "هەركەس خولیاو ئارەزووی كارو پیشەیەكی هەیە، دیارە ئێمەش خواستمان لەسەر ئەوەبووە، كەبتوانین ئەم كەرستە فۆڵكلۆری و رەسەنیانە كۆبكەینەوە كە سەردەمانێك لەم دەڤەرە بەكار هاتوون و كاریان پێكراوە، لە شیر و رەم و چەكی كۆنەوە بگرە تا دەگاتە ئەم كەرستەو كەل و پەلانەی كە رۆژانە بۆ ئامرازی ماڵەكان بكار هاتوون، دواتریش قەوان و ئامێرەكانی بیستن و گراما فیك و سینما كۆنەكان و رادیۆ مۆسیقا هەتد... فانۆسی سەردەمی گەشتی وانەكان كە كاتی خۆی بۆ هیمای بەرامبەرەكان و ئاگاداكردنەوە بەكار هاتووە، بەمەش ئەم كەل و پەلانەی كە لولای خۆم پاراستوومە مێژوەكەیان دەگەڕێتەوە بۆ نیوان زیاتر لە 200 هەزار ساڵ تا سەدەی رابردوو، بەردەوامیشم لەسەر كۆكردنەوەی ئەم جۆرە كەل و پەلانەو لەماڵەكەمدا دەیان پارێزم".
ئەوەش دەخاتەروو "كۆكردنەوەی ئەم كەل و پەلە مێژوی و كەلتوریانە كارێكی وا ئاسان نییە، بەڵكو هەوڵی زۆری دەوێت تا بەدەستی دەهێنیت و لەماڵەوەش دەیان پارێزی، بۆ نموونە من زۆربەی ئەم شتانەم بەپارە كڕیوون یان لەرێگەی برادەران پێم بەخشراون، چونكە هندێكیان زۆر دەگمەنن بۆ نموونە كۆنترین ئەم شتەی كە بەدەستم هێناوە بریتیە لە سەر ڕمی ئەسپ سواری كە مێژوەكەی بۆ زیاتر لە دوو هەزار ساڵ دەگەڕێتەوە، كە كاتی خۆی لەكاتی جەنگەكان بەكار هاتووە، وەك دیاریشە هەر شتێك بەدەست بێنم لێكۆڵینەوەشی لەسەر مێژوەكەی دەكەم، هەروەها شیری سەردەمی پاشای گەورەی رواندزم بەدەست هێناوە كە كاتی خۆی ئەویش بۆ بەرگری كردن لەدەست سوار چاكەكانی رواندز بووەو بەرگری لە میرنشینەكە كراوە، هەروەها ژمارەیەكی چەكی دیكەی كۆنیشم پاراستووەو بەردەوامیشم لە كۆكردنەوەیان".
وەستا ساڵح عەبدولڵا، ئەوەش دەخاتەروو: "زۆربەی ئەو كەل و پەلانەی كە كاتی خۆی لەلایەن باب و باپیرانمانەوە بەكارهاتوون، كۆم كردوونەتەوە وەك كوپەو قاپ و پیاڵەو ئەم جۆرە شتانە كە هەموایان لە مس و چەند ماددەیەكی تایبەت دروستكراون و بەرگەی مانەوەیان هەیە، بەمەش هەوڵمداوە بتوانم كلتوری باب و باپیرانمان بۆ ئێستاو نەوەی دوای خۆم بپارێزم، كەل و پەلەكانی دیكەش وەك سینەمەی كۆن و گرافیك و رادیۆ و ئەم جۆرە شتانە كە مێژوەكەیان بۆ سەدەی رابردوو دەگەڕێتەوە، هندێكیان تائێستا كاردەكەن".
وەك خۆشی دەڵێت "بەنیازە لەماڵەكەی مۆزەخانەیەكی بچووك بۆ دانان و كۆكردنەوەی زیاتری ئەم كەرستە كۆن و كلتوریانە بكاتەوە، داواكاریشە لە هاووڵاتیان ئەگەر هەركەس پارچەیەكی لەم جۆرە كەل و پەلانە لایان هەبێت هاوكاری بن پێی ببەخشن بۆ ئەوەی بە جوانترین شێوە بیپارێزن و لەمۆزەخانەكەی كۆیان بكاتەوە، دەشڵێت: "سوپاس بۆخودا ئەندامانی خێزانەكەمان هاوكارن لەگەڵم بۆ كۆكردنەوەو پاراستنی ئەم جۆرە كەل و پەلە رەسەن و كلتوریانە.
لەدوا قسەكانیدا خوازیار بوو "بایەخی زیاتر بە بواری رەسەنایەتی و كەل و پەلە كلتوریەكان بدرێت و بۆ پاراستن و كۆكردنەوەیان مۆزەخانە لە زۆربەی شارو شارۆچكەكانی كوردستان بكرێتەوە، بەتایبەتیش دەڤەری سۆران، كە خاوەن مێژوێكی كۆن و رەسەنایەتی و جۆرەها پارچە شوێنەواری گرینگ لەدەڤەرەكەدا بوونیان هەیە و كە بەشێك لەوانە تا ئێستا لەلای هاووڵاتیان پارێزراون.

زۆرترین بینراو