هونەر دنیایەكی بێ ناسنامە و جیهانێكی بێسنوورە

هونەر دنیایەكی بێ ناسنامە و جیهانێكی بێسنوورە

محەمەد ئامۆكەیی- خەلیفان: پەرێز شوان، یەكەم كچی دانیشتوی شارەدێی خەلیفانە چۆتە كۆلیژی هونەرەجوانەكان تەمەنی ٢٠ساڵەو لە كۆلێژی هونەرەجوانەكانی زانكۆی سەلاحەددین بەشی شێوەكاری لەقۆناغی یەكدایە، لەدیدارێكی زاری كرمانجی باس گرنگی هونەری كێشان و حەزو خولیای خۆی بۆكارەكەی دەكات.

*گرنگی هونەری وێنەكێشان لەچیدایە؟
هونەر دونیایەكی بێ ناسنامەیە، جیهانێكی بێسنوورە حەزو لەزەتو ئاواز و مۆسیقای خۆی هەیە جوانی و ڕازاوەی تێدایە هەست وروژێنە و ئاسۆی هزر فراوان دەكات، هونەر مەیدانێكە بۆ خۆشگوزەرانی و هەمەچەشن كردن و بەخشینی شیلەی میهرەبانی لەم گەردوونە جەنجاڵەدا بە مرۆڤ هاتۆتە كایەوە، لای من هونەری وێنەكێشان بەرجەستەكردنێكی ڕۆحییە بۆ كێشانی تابلۆیەك پێویستە سەرەتا لە مێشك و هزری خۆت دروستی بكەیت ئینجا لە ڕێی دەستەكانتەوە بیگەیەنیت هونەر خۆراكی روحە دونیایەكی پڕ لە ڕەنگە شادی بەخشە
*چۆن بوو هونەرە جوانەكانت هەڵبژارد؟
هونەر حەزو خولیای منداڵیم بوو هەمیشە ویستوومە ڕۆژێك بێت لەم بەشە بخوێنم و گرنگی پێبدەم زۆر حەزم دەكرد ڕۆژێك بێت بتوانم ببم بە مامۆستایەكی سەركەوتوو لە بواری هونەر بتوانم ببم بە مامۆستایەك كە گرنگی بە وانەی هونەر بدات و منداڵەكان فێر بكەم چونكە لە منداڵیەوە تا ئێستا مامۆستایەكم نەبووە گرنگی بە دەرسەكە دابێت نە تەنها مامۆستاكان بەڵكوهەموو خوێندنگەكان دەرسی هونەر بەلاوە دەنێن لە كاتێكدا گرنگترین وانەیە بۆ قوتابی تاكە وانەیە خۆشی و شادیان پێ ئەبەخشێ خۆراكی مێشكیان بۆ دابین ئەكا بۆیە من و قوتابیانیتر بێ ناز كراوین لە نەبوونی ئەم وانەیە پڕ چێژە وە شاردنەوەو پوكانەوەی ئەو بەهرە جوانە."
*ئارەزووت لە هونەر بوو یان تەنها بۆ بەدەستهێنانی بڕوا نامە:
بڕوانامەیەكم ناوێت بێ فێربوون چی لە پارچە كاغەزێك بكەم كە نەتوانم ڕۆژێك منداڵێك فێر بكەم كە نەتوانم كەسێك فێر بكەم، كە نەتوانم سودێكم هەبێت بۆ كۆمەڵگە تەنانەت ڕازیم بەوەی هونەرەكەم هەبێت بێ هیچ بڕوانامەیەك تەنها بۆ ئەوەی بتوانم خزمەتێك بە نیشتیمانەكەم بكەم بتوانم منداڵە هەژارێك فێر بكەم.
*تا ئێستا وەك پێویست گرنگی بە هونەری وێنەكێشاندراوە لە كوردستان یان نا؟
نەخێر هیچ گرنگیەكی پێ نەدراوە لە قوتابخانەیەكی سەرەتایی تا كۆلێژی هونەر لە ڕووی هەموو شتێكەوە هیچ گرنگیەكی پێ نەدراوە ئەو ناوبانگە كەمەی كە ئێستا هەیە تەنها بەهۆی هەوڵی هەندێ هونەرمەندی تێكۆشەر و هونەر دۆستەوەیە، پێم وایە ئەوەی كە لە قوتابخانەكان گرنگی بە وانەی هونەر نادرێت هۆكاری یەكەم حكومەتە كە گرنگی بەوانەی هونەر نادات وەكو وانەكانی تر ئەگەر مامۆستای هونەر دابمەزرێنێ و وانەكە گرنگ بكات و لێپێچینەوە بكرێت وەكو وانەكانی تر ئەوا هونەریش وەكو هەموو وانەكانی تر گرنگ دەبێت، هۆكاری دووەم مامۆستاكانن لەبەر ئەوەی مامۆستاكان هەمیشە كەمتەرخەمن و دەرسەكە بە گرنگ وەرناگرن وە هۆكاری ئەوەی كە ئەم مامۆستا كەمتەرخەمانە هەن هۆكارەكەی ئەگەڕێتەوە بۆ وەرگیرانی خوێندكار لە زانكۆ و پەیمانگاكان وەرگیرانی كەسانێكی بێ بەهرە كەسانێك كە تەنها بەهۆی كەمی نمرەكانیانەوە ڕوویان لەم بەشە كردووە كە ئەم كەسانە تەنها بۆ بەدەستهێنانی پارچە كاغەزێك كە پێی دەگوترێ بڕوانامە هاتوون، هیوادارم چاكسازی بكرێت لەمە، بۆ ئەوەی لە داهاتوو كەسانی بەهرەمەندو شارەزامان هەبێت.
*بەشێك لەوانەی پەیمانگاو كۆلێژی هونەرە جوانەكان تەواو دەكەن دوای دەرچونیان گرنگی بە پیشەكەیان نادەن ئەمەیان بۆ؟
من پێم وایە گەنجی كورد بەهرەكەی شتێكە و بڕوانامە شتێكیتر و ئیشەكەشی شتێكیترە بۆ ئەمەش سەرەتا كێشەكە لەخۆیەتی و دواتر حكومەت ئێمە لە منداڵیەوە هەڵە تێگەیەنراوین كە وێنەكێشان حەرامە، بەڵام لە ڕاستیدا وانییە هیچ بەڵگەیەك نییە كە بڵێ وێنەكێشان حەڕامە چونكە حەدیسیش ئەڵێ هەموو كردەوەیەك بە نییەتە بۆیە بەهۆی ئەم هەڵە تێگەیشتنەوە زۆر لە خێزانەكان ناهێڵن منداڵەكانیان بچن بۆ ئە بەشە، بەمەش كەسانی بەهرەمەند زیاتر دەشاردرێنەوە وە كەسانێك دەچن بۆ ئەو بەشە كە هیچ بەهرەیەكیان نییەو گرنگی پێ نادەن ئەگینا زۆر لە بەهرەمەندەكان دوای تەواوبونیان لە كۆلێژ هەر گرنگی پێ ئەدەن ئەگەر نەشیكەن بە سەرچاوەی سەرەكیان دەیكەن بە بەشێك لە كارو چالاكی ڕۆژانەیان، هۆكارێكی تر حكوومەتە گرنگی نادات بە هونەر و بە دامەزراندنیان بۆیە زۆربەیان واز لە بەشەكەیان ئەهێنن لەبەر ئەوەی هونەر ناتوانێت نانیان بۆ دابین بكات، هۆكارێكی تر خەڵكە كاتێك هونەرمەندێكی بە توانا ڕەسمێك یان پەیكەرێك یان هەر شتێكیتر دروست دەكات ئەوا خەڵك بە شتێكی سادەو ئاسایی وەریدەگرن وادەزانن كە ئیشێكی كۆپی و سادەیە لە كاتی كڕینیشی گرنگی نادرێت بە ماندووبوونی هونەرمەندەكە و نایانەوێ نرخێكی باش بدەن ئیشێكی جوان و ناوازەیان دەوێت بە پارەیەكی كەم بۆیە زۆربەی هونەرمەندان واز لە ئیشەكەیان ئەهێنن، بە ڕای من ناكرێ هونەرمەند نرخ بۆ وێنەكەی خۆی دابنێ ئەبێ بیخاتە دەست كڕیارەكە ئەو بە پێی ماندووبوونی هونەرمەندەكە نرخەكە دابنێت، بەڵام بۆ ئەم میللەتە نابێت چونكە هەموو كات حەزیان لە شتی خۆڕاییە و گوێ نادەن بە ماندوو بوونی هونەرمەند.

 

 

 

زۆرترین بینراو