هونەر عەبدولواحید: تا ئێستا داواكاری هیچ نەخۆشێكمان ڕەت نەكردۆتەوە

هونەر عەبدولواحید: تا ئێستا داواكاری هیچ نەخۆشێكمان ڕەت نەكردۆتەوە


هونەر عەبدولواحید هەسنانی، سەرۆكی رێكخراوی بەخشینی خوێن و ژیان لە دیمانەیەكدا تایبەت بە زاری كرمانجی ڕایگەیاند" تا ئێستا زیاتر لە چواردە هەزار (14000) بتڵ خوێن بەخشراوەو زیاتر لە سێ سەد(300) خێزان هاوكاری مرۆیی كراون".
* پوختەیەك لەبارەی رێكخراوەكەتان.
- رێكخراوی بەخشینی خوێن و ژیان لە 14-1-2015 لە فەرمانگەی رێكخراوە ناحكومییەكان بە فەرمی تۆمار كراوە، ئۆفیسی سەرەكی لە قەزای سۆرانە و خاوەنی 17 لقی رێكخراوە لە سەرجەم شارەكانی كوردستان بە كەركوكیشەوە. بۆ ئەو مەبەستە خاوەنی 110 كارگێر و 800 ئەندام و 6000 خوێن بەخشە و دابەش بوون بەسەر كۆی لقەكان و شارەكان.
*چۆن بوو بیرۆكەی دامەزراندنی رێكخراوێكی لەم شێوەتان بۆهات؟.
- بەهۆی بوونی بۆشایەكی گەورە لەم بوارەدا و بە ئامانجی هاوكاری كردنی نەخۆش و نەخوشخانەكان و پركردنەوەی ئەو بۆ شاییەی كە لە بواری بەخشینی خوێن هەیە ئەم رێكخراوەمان دامەزراند.
*رێكخراوەكەتان زیاتر كار لەسەر چی دەكات و توانیوتانە ئەو ئامانجەی رێكخراوەكەتان بۆ دامەزراندووە بیهێننە دی؟.
- كار دەكەین لە بواری تەندروستی و هاوكاری مرۆیی، لە هەر دوو بواردا توانیومانە ئامانجی باش بپێكین و لەو پێناوەدا زیاتر لە 14 هەزار بتڵا خوێن بەخشراوە و زیاتر لە 300 خێزان هاوكاری مرۆیی كراون، خۆشبەختانە تا ئێستا داوای هیچ نەخۆشێكمان ڕەت نەكردۆتەوە.
*شێوازی هاوكاری كردنی هاووڵاتییان لای ئێوە چۆنە و بە چ میكانزمێكە؟.
- ژمارە مۆبایلی رێكخراوەكەمان لە سەرجەم شوێنە گشتییەكان هەیە بە تایبەت لە نەخۆشخانەو بانكەكانی خوێن، هەركات پەیوەندیمان پێوە بكرێت پەیوەندی دەكەین بەم خوێن بەخشانەی ناویان تۆمارە لە رێكخراوەكەمان، وێرای ئەوەش هەر هەژارێك و كەمدەرامەتێك پەیوەندیمان پێوە بكات پەیوەندی دەكەین بە خودا پێداوان و خێرخوازان تا بەهانایەوە بچن و هاوكاری بكەن.
*هەماهەنگیتان لەگەڵ رێكخراو و دەزگاكانی نێوخۆ و دەرەوە هەیە؟.
- بەڵێ لەگەڵ سەرجەم دەزگا نێوخۆییەكان هەماهەنگیمان هەیەو پەیوەندییەكی بەهێزمان لەگەڵیان هەیە، لەئاستی دەرەوەش لەگەڵ دەزگای KIS لە تارانی پایتەختی ئێران رێكەوتنمان هەیە كە هەر نەخۆشێك پەیوەندیمان پێوە بكات و بەمەبەستی ئەنجامدانی نەشتەرگەری سەردانی ئەو وڵاتە بكات شوێنی مانەوەو وەرگێر(مترجم) بەبێ بەرامبەر بۆی دابین دەكەین، ئەمە وێڕای كەمكردنەوەی خەرجییەكانی تر بە گشتی.
*چیتان كردووە بۆ ئەو نەخۆشانەی بە بەردەوامی پێویستیان بە خوێنە؟.
- ژمارەی رێكخراوەكەمانیان لایە، هەركات پێویستیان بە خوێن بێت خوێنیان بۆ دابین دەكەن بە زووترین كات.
*هەوڵتان نەداوە خول بۆ هۆشیاری هاووڵاتییان بكەنەوە تا ببن بە خوێن بەخش؟.
- ڕۆڵێكی بەرچاومان هەبووە لە هۆشیاری تەندروستی و هاندانی هاووڵاتییان بۆ بەخشینی خوێن، بۆ ئەو مەبەستەش خاوەنی دەیان ئەكاونت و پەیجی تایبەتین لە تۆڕە كۆمەڵایەتییەكان.
*ڕۆڵ و گرنگی بوونی رێكخراوەكەتان چییە و ‌تا چەند گرنگە رێكخراوی هاوشێوەی ئێوە هەبن؟.
- بێگومان بوونی رێكخراو و گرووپی لەم شێوەیە پێویستە هەبن، چونكە ڕاستەوخۆ پەیوەستن بە رزگار كردن و پاراستنی گیانی هاووڵاتییان، بە نموونە (رێكخراوی بەخشینی خوێن و ژیان) لەو كاتەی دروستبووە تا ئێستا نەخوشێك پەكی نەكەوتووە لە دەست نەكەوتنی خوێن و پێكهاتەكانی تری ناو خوێن، لەكاتێكدا پێشتر بۆ بتڵێك خوێن ناچار پەنایان دەبردە بەر فەرمانگەو دەزگا ئەمنییەكان.

بیروڕا

زۆرترین بینراو