هونەر هەموو شتێكی لێ سەندوم بەس نێو بانگی پێ بەخشیوم

هونەر هەموو شتێكی لێ سەندوم بەس نێو بانگی پێ بەخشیوم

محەمەد ئامۆكەیی- هەولێر: دڵسۆز ماوەتی، ناوی راستەقینەی لاڤەخان مستەفایە، لە ساڵی (1985) لە گەڕەكی بەرانانی سلێمانی چاوی بەژیان هەڵیناوە، تەمەنی 15 ساڵ دەبێت دێتە نێو دونیای هونەر و یەكەم كاری هونەریشی لە شاری دهۆك دەبێت، ئەو كاتەی دڵسۆز دەبێتە شانۆكار كەم ئافرەت هەبوو لەبەر داب و نەریتی كۆمەڵگە، بتوانێت ئەو كارە بكات، ئەو ئازایەنەو چاو نەترسانە گوێی بەوەنەداو ئەسپی خۆی تاودا تابوو بە ئەستێریەكی رۆناكی ئاسمانی هونەری كوردی، دڵسۆز، ماوەیەك بێ دەنگ بوو ئەو لە بارەی بێ دەنگیەكەیەوە دەڵێت" من وای دەبینم هەر ئەكەتەرو هونەرمەندێك بە بەردەوامی لەسەر شاشە بێت بێ گومان بینەر لێی بێزار دەبێت، بۆیە دەبێت ناوە ناوە جێگەی خۆت چۆل بكەی بۆ كەسانی تر، چونكە دەیان كەسی تر هەیە ئەیەوێت كاربكات، ئەگەر هاتوو ئێمەی هونەرمەند كەمێك پشومان وەرگرت دواتر بە كاری نوێ و هەواداری زیاتر دەگەڕێینەوە."
شانۆ كار دڵسۆز ماوەتی، پێی وایە" پەخشكردنی درامای بیانی كوردستانی وێران كردوە قەیرانێكی مەزنی خستە نێو هونەری كوردییەوە، ئەو پەخشكردنە كاریگەری كردۆتە سەر كەوچكی نان خواردن و ستایل و قسەكردن و تەنانەت ئەخلاقی تاكی كوردیشی تێكداوە." ماوەی پێنج ساڵە درامایەك پەخش دەكرێت بەناوی لێم ببورە ئەوندە سەقەتە بەهۆكاری دادەنێم بۆ ئەو تێكدانەی پێشتر باسم لێوەكرد، ئەگەر ناویان لێ نابا لێم مەبورە هەتا هەتایە بەردەوام دەبوو، بۆیە راگرتن و نەهێشتنی درامای بیانی شتێكی زۆرباشەو لەگەڵی دام بەهەموو شێوەیەك قەدەغە بكرێت."
ئەم خانمە شانۆكارە قسەی لەسەر شەڕە جنێو و توانجیش هەبوو نەیشاردەوە" هیچ مرۆڤێك بێ توانج نابێت بەهەردوو رەگەزەوە، بەڵام لە كۆمەڵگەی كوردەواری خۆمان زیاتر شكانەوە و توانج بەر ڕگەزی مێینە كەوتوە، منیش بەدەر نەبوومە لەوە، چەند مانگێك سەرقاڵی دەرهێنانی فیلمێك بووین، ترالێری فیلمەكەم دابەزاندوە هەركەسێك سەرنجێكی هەبێت لەسەری ئەتوانێت پێم یڵیت، بیر لە ماندوبون و شەو نخونیت ناكەنەوە دێن قسەی نەشیاوت بۆ دەنوسن دەتشكێنەوە، ئەزانی منداڵی واهەیە هێشتا راست و چەپی خۆی نازانێت مۆبایلێكی بەدەستە كۆمێنتی نوسیە ئەرێ چیە خۆت قەلەوكردۆتەوە، ئاخر من باسی كار دەكەم تۆ چ كارت بەسەر جەستەی منە، بۆیە لە جیاتی یەكتر شكانەوە با هەمومان پێكەوە ئەو كۆمەڵگەیە جوان بكەین."
دڵسۆز مستەفا، باس لەوەش دەكات" ئێستا شانۆ ئەو رۆلەی جارانی نەماوە لەبەر ئەوەی لە كوردستان بینەری سینەمامان نیە، ئەگەر بینەری سینەمامان نەبوو بینەری شانۆش نابێت، ناكرێت پڕۆگرامی بەزمی بەزم بكەین بە پێوەر كە خەڵك تامەزرۆی شانۆیەو تێدا بەشدار دەبێت، ئەوە زیاتر پڕۆگرامێكی كۆمیدیە بەشێكی زۆری لەوێ دادەنیشن بۆ كات بەسەر بردن دەچن، ئەگەر راستی بلێین فێل لە خۆمان نەكەین، نها بینەر تۆراوە لە شانۆ و سینەما، لێرەدا ئەركی وەزارەتی رۆشنبیرو دەزگا راگەیاندنەكانە، كار لەسەر ئاشتكردنەوەی بینەر بكەن و هاوكارمان بن لەوەی شانۆ و سینەما وەك پێشوی لێبكەینەوە."
ماوەتی رەخنەی لە وەزارەتی رۆشنبیری هەیەو گووتی" وەك هونەرمەندێك مافی خۆمە ئەمەوێت رەخنەی ئەوە لەو وەزارەتە بگرم، چەندین كابینەیە وەزیرەكان گەنج نین، ناكرێت كەسێك پێشمەرگە بوبێت و قوربانی دابێت تۆ بیكەی بە وەزیری ئەو وەزارەتە گرنگە، خۆ ئەتوانن لە شوێنی تر جێگەی بۆ بكەنەوە و پێشمەرگە تاجی سەری هەمومانەو پێشم وایە كەس هێندەی من پێشمەرگەی خۆش ناوێت، لە رابردوش ئێمەی هونەرمەند رەخنەن هەبوە لەسەر ئەداو كاری ئەو وەزارەتە." ئێستا وەزارەتی رۆشنبیری پێویستی بە وەزیرێكی لاو هەیە، بۆ ئەوەی لە نزیكەوە گوێ لە گڵەی و گازندەی لاوان و گەنجان بگرێت، دەیان كچ و كوڕ هەیە پڕۆژەی هەیەو نازانێت بچێت بۆ كوێ بۆیە كەمن بێ دەنگ بوومە ئەو فەراغەم پڕكردۆتەوە خەریكی پێگەیاندنی كەسانی تربومە."
راشیگەیاند" هونەر لە كوردستان نەبۆتە پیشە كە بژێوی ژیانی خۆمان پێ بەڕێوەبەرین، حكومەت نەیتوانیوە خزمەت و هاوكاری هونەرمەندان بكات، لە كاتی هاتنی داعشیش چەندین شانۆم لە نێو هۆل و سەر شەقام بەبێ بەرامبەر ئەنجامدا، تەنیا لەبەر ئەوەی دەمزانی حكومەت لە چ دۆخێك دابووە، وەك دڵسۆز، ئەتوانم بە بێ وەزارەتی رۆشنبیریش كاری هونەری بكەم، چونكە عاشقی هونەرم و لەخۆم زیاتر خۆش دەوێت، هونەر لە وڵاتەكەی من هەموو شتێكی لێ سەندوم بەس نێو بانگێكی پێ بەخشیوم."
دڵسۆز مستەفا ماوەتی، دەربارەی دابەزاندنی كێشی ئاماژەی بەوەكرد" من پێشتر كێشم زۆربوو بەڵام نایشارمەوە چەند نەشتەرگەریەكم ئەنجامداوە، ئەمەوێت ئەوەش باس بكەم "جەستەی دڵسۆز ماوەتی، پەیوەندی نیە بەینەرەوە هونەركەم موڵكی بینەرە، ئەگەرنا جەستەو ژیانی خۆم تەنیا پەیوەندی بەخودی خۆمەوە هەیە نەك خەڵكی تر."

زۆرترین بینراو