هۆڵەكانی ئەم دەڤەرە لە ئاستێكی باشدا نین

هۆڵەكانی ئەم دەڤەرە لە ئاستێكی باشدا نین

ئا: شەهلا رەشید- سۆران: فەریبا شاكر عەبدوڵا، مامۆستای فیتنێس و ئیرۆبیك ماوەی دوانزدە ساڵە راهێنەری وەرزشە، چەندین ساڵ خۆبەخشانە لە بنكەی وەرزش و لاوانی سۆران كاری كردووە، ئەوكات وەرزش كردن لەنێو ئەم كۆمەڵگەیە بەرتەسكە بۆ ئافرەت بەراستی قوڕس بووە, بەڵام توانی بە هاوكاری خێزانەكەی كە هەمیشە پاڵپشتی بوون بەردەوام بێت لە كارەكەی و خزمەت بە ئافرەتانی ئەم دەڤەرە بكات.
فەریبا بە زاری كرمانجی گووتی" ساڵی 2008 لە سۆران چوومەتە نێو دونیای وەرزش كاتێك لە نێو یاریگە لەگەڵ تیپی كوڕەكانی بنكەی وەرزش و لاوانی سۆران یاری تۆپی پێم كرد، داوام لە مامۆستا باپیر كرد شوێنێك بۆ ئافرەتانی ئەم دەڤەرە بكرێتەوە، تا بتوانن بەشداری لە وەرزش بكەن، دواتر گروپێكمان دانا لەگەڵ چەند ئافرەتێك دەستمان پێكرد، لەگەڵ چەند گروپێكی بیانی بەشداری كردنی خولی زێرەڤانیم لە دوو یاری (باندی و كریكت) كرد كە لە سوید، بەریتانیا و ئەڵمانیاوە هاتبوون، ئەوەبوو توانیم پلەی یەكەم بەدەست بهێنم و بە خەونەكەم گەیشتم، بەڵام خەونێك كە هیچ سەرمایە و داهاتێكی نیەو نەبووە، ماوەی چەند مانگێك لەگەڵ ئەم گروپانە بەشداری وەرزشی دەروونیم كرد لە هەولێر و شەقڵاوە، جگە لە وەرزش ئارەزووی گۆرانی وتنم هەبووە، لە پڕۆگرامی گەنجینەی كوردستان تیڤی بەشداریم كردووە، ئەوكات مامۆستا سەید ئەحمەد موزیكژەنی بەتوانا بە دەنگی بەڵێ هەڵیبژاردم، لە چەند كۆنسێرتێك وەك گۆرانیبێژ بەشداریم كردووە".
سەبارەت بە رۆڵی ئافرەت لە وەرزشدا ئەم مامۆستایە گووتی" بەشداری ئافرەتان لە چاو ساڵانی رابردوو بەرەوپێشچوونی زۆر باشی بەخۆیەوە بینیووە، ئەو ئافرەتانەی لەگەڵ من راهێنان دەكەن خۆیان ماندوو دەكەن و گرنگی بە وەرزش دەدەن، یەكەم جار لەگەڵ قۆتابییەكانم وەك هاوڕێ گفتوگۆ دەكەم، دەمەوێ پێش دەستپێكردنی راهێنان لەبارەی دەروونیان ئاگادرادبم و دڵنیابم ئەوكات دەست بە راهێنانی پێویست دەكەین، لەم دەڤەرە ئافرەتان زیاتر بۆ دابەزاندنی كێش دێنە هۆڵی وەرزش، ئەوان زۆر خولیای لەشجوانی و فیتنێس نین".
دواتر لەبارەی وازهێنانی وەرزش فەریبا گووتی" وازهێنان لە وەرزش زیانی نیە ئەگەر ئاگاداری خۆت بیت و وەكو پێویست خواردنەكانت رێكبخەی، ئەوەی گرنگی بە تەندروستی خۆی نەدات بە وەرزش یان بێ وەرزش زیانی پێ دەگات، دەستپێكردنی وەرزش پەیوەستە بە جۆری وەرزشەوە، ئەگەر یارییەكانی جمناستیك یان مەلەوانی بێت, دەبێ لە تەمەنی منداڵی دەستپێبكرێت، بەڵام وەرزشەكانی وەك فیتنێس و ئیرۆبیك لە تەمەنی 18 ساڵی گونجاوترە, هەندێ جاریش پەیوەندی بە جەستەی كەسەكەوە هەیە تا چەندو چ تەمەنێك توانای هەیە، جۆری وەرزشی ئافرەتان و پیاوان جیاوازە, چونكە سیستەمی جەستەی پیاوان بەهێزتر و توندترە، ئافرەت جەستەی شلە توانای هەموو جۆرە وەرزشێكی نیە، نەك لە رووی قوڕسایی بەڵكو لە رووی راهێنانەكانیشەوە جیاوازە".
ئاماژەشی بە چۆنیەتی هۆڵەكان كردو گووتی" نەبوونی ئامێری پێویست كێشەی گەورەی ئێمەیە لە هۆڵەكان، بە شێوەیەكی گشتی هۆڵەكانی ئەم دەڤەرە لە ئاستێكی باشدا نین و بە تایبەتی لە وەرزی زستاندا كێشەمان هەیە, چەندین ساڵە راهێنەری وەرزشیم تا ئێستا نەمتوانیوە هۆڵی وەرزشی تایبەت بەخۆم هەبێت بەهۆی نەبوونی پشتگیری".
لە كۆتاییدا ئەم راهێنەرە گووتی" خێزانەكان تا رادەیەك پشتگیری ئافرەتەكانیان دەكەن بۆ چوونە هۆڵی وەرزشی و دابەزاندنی كێش، بەڵام بۆ بەشداری كردن لە خول و پاڵەوانێتیەكان پشتگیری كردنی ئافرەت لەم دەڤەرە لاوازە، ئەگەر هەبێت من یەكەم كەس دەبم هەوڵیان بۆ بدەم و لەگەڵیان بم تا لوتكەی سەركەوتن".

 

زۆرترین بینراو