هەریر... هاووڵاتیان داوای دانانی كارگەی ریسایكلبین دەكەن

هەریر... هاووڵاتیان داوای دانانی كارگەی ریسایكلبین دەكەن

راپۆرت محەمەد ئامۆكەیی- هەریر: یەكێك لەو گرفتانەی لەكۆنەوە بوونی هەیە لە باشووری كوردستان نەبوونی كارگەی ریساكلبینە بۆ دووبارە شیكردنەوەی پاشمەوەكانی زبل و خاشاك، لە شارەدێی هەریریش هاوشێوەی بەشێك لە شوێنەكانی تر تا ئێستا كارگەی ریساكلبین نیە، شارەوانی بۆ لە نێو بردنی زبل دەبێت ئەو پاشماوانە فڕێ بدات و دواتر بیسوتێنێت، فڕێدانی پاشماوەكان كەوتۆتە نێوەڕاستی چەند گوندێك لە وەرزی هاوین بەهۆی سوتانی پاشماوەكان دووكەل ئاسمانی ئەو گوندانە دەتنێت، دانیشتوانی لادێ نشینەكانیش داوا دەكەن هەرچی زووە ئەو گرفتە چارەسەركەن، زاری كرمانجی لە بە دواداچونێكی دا ئەو گرفتەی گەیاندە لایەنی پەیوەندی دار و ئەوانیش قسەی خۆیان هەیە.

سامان ئەحمەد دانیشتووی یەكێك لەو گوندانەییە كە نزیكە لە شوێنی كۆكردنەوەی پاشماوەكانی شارەوانی و دەڵێت" بۆ چەند ساڵێك دەبێت شارەوانی هەریر، بگرە زۆر جاریش پاشماوەكانی زبل و خاشاكی شەقڵاوەش، لە نزیك گوندەكەمان لە نێو دەبردرێن ئەوەش بۆتە گرفت لەبەر ئەوەی ئێستا بەرەو وەرزی هاوین دەچین بەهۆی سوتانی پاشماوەكان دووكەلێكی زۆر لەو سنوورە بڵاو دەبێتەوە".
ئەو هاووڵاتییە ئاماژە بۆ ئەوەش دەكات" بەشێك لە خەڵكی ئەو گوندانە مەڕو ماڵاتیان هەیە ناتوانن نزیك بنەوە لەو شوێنە بەهۆی بوونی زەلفی لایلۆن و پاشماوەكانی تر، جگە لەمەش مێشو مەگەز یەكێكی ترە لەو گرفتانە كە لە هاویندا زۆربەی گوندەكانی نزیكن لە شوێنی پاشماوەكانی شارەوانی لێ فرێ دراوە بەدەست زۆری مێش و مەگەز دەناڵێنن، بۆیە داوا دەكەین لە شارەوانی هەریر هەرچی زوە ئەو كێشەیە چارەسەر بكات بۆ ئەوەی لەدەست دووكەل و بڵاو بونەوەی نەخۆشیەكانی تر رزگارمان بێت.
لای خۆشیەوە زاهیر بناوی، سەرۆكی شارەوانی هەریر بە زاری كرمانجی راگەیاند" یەكێك لەو گرفتانەی لە كۆنەوە هەیە لە كوردستان نەبوونی كارگەی ریساكلبینە، هەریر و قەزای شەقڵاوە و ناحیەكانی ئەو گرفتەیان هەیە، تاكوو ئێستا شارەوانییەكان دەبێت پاشماوەكان لە شوێنێك كۆبكەنەوە و دواتر بیسوتێنن یاخوود ژێر خاكی بكەن ئەوەش گرفێتی مەزنەو كاری گەری خراپی دەبێت بۆ سەر ژینگەو تەندروستی هاووڵاتیان".
سەرۆكی شارەوانی هەریر ئاماژەی بەوەشدا" لەسەر بڕیاری وەزیری شارەوانی حكومەتی هەرێم، لەمەو بەدوا هەر كۆمپانیایەك بیەوێَت خاوێن كردنەوەی شار لە ئەستۆ بگرێت دەبێت كارگەی ریساكلبین دامەزرێنێت بۆ شیكردنەوەی پاشماوەكان، بۆیە ئێستا ئەو داواكارییە لە وەزارەتی داراییە بۆ ئەوەی پارە خەرج بكرێت و بتوانرێت لە ئەم ساڵ كارگەیەك لە سنووری قەزای شەقڵاوە دامەزرێت".
ئەوەشی گووت" تا ئێستا دیار نیە ئەو كارگەییەی دادەمەزرێت لە سنووری هەریرە یان شەقڵاوە، گرنگ دانانەكەیەتی جا لە هەر شوێنێك بێت بە كردنەوەشی ژینگەی دەڤەرەكە تەندروست دەبێت و كرێكارەكانیش كاریان ئاسانتر دەبێت، لە لایەكی تریش خەڵكانێك لە شوێنی فڕێ دانی پاشماوەكان دەبینرێن و كەل و پەل و پاشماوەكانی فرێ دراو كۆ دەكەنەوە لەوانەیە لە داهاتوو تووشی نەخۆشی بن، بە دانانی كارگەی شیكردنەوە ئەوانیش لەو شوێنە نامێن.

زۆرترین بینراو