هەرێمی كوردستان قەوارەیەكی دانپێدراوی یاساییە و هەڵناوەشێتەوە

هەرێمی كوردستان قەوارەیەكی دانپێدراوی یاساییە و هەڵناوەشێتەوە

زاری كرمانجی: بابەتی كار كردن بۆ نەهێشتنی كیانی سیاسی هەرێمی كوردستان، كە لە لایەن پەرلەمانتارێكی كوردستان لە فراكسیۆنی كۆمەڵی ئیسلامی ورووژێندرا و لە لاپەڕەی تایبەتی فێسبووكی خۆی ئاماژەی پێداوە، رووبەڕووی رەخنە و كاردانەوەی توندی چین و توێژەكان بوویەوە.
ئاری هەرسین، ئەندامی پێشووی پەرلەمانی كوردستان لەمبارەوە دەڵێت " مانەوەی قەوارەی هەرێمی كوردستان لە ئۆكسجین پێویسترە بۆ خەڵكی هەرێمی كوردستان، جگە لەوەی جێی هیوای سێ پارچەكەی دیكەی كوردستانیشە، بۆ مانەوەی قەوارەی هەرێم دەبێت ئەوانەی ئەو وڵاتە بەڕێوە دەبن لەناو خۆیان یەك بن". دەشلێت " بۆیە بەغدا بە داواكارییەكانی كورد رازی نابێت و پابەندی دەستوور نابێت، چونكە دەزانێت كورد لە ناوخۆ یەك نییە، ئەگەر ئێمە یەك بین حسابمان بۆ دەكەن، ئەگەر یەك نەبین هەر رۆژە و سوود لە یەكێكمان دەبینن".
سمكۆ محەمەد، نووسەر و رۆشنبیر لەمبارەوە دەڵێت "خاتر جەمبن كە هیچ گروپێك ناتوانێ تاسەر بڕیار لەسەر چارەنووسی نەتەوەیەك بدات كە فرەییە لەجیاوازی زمان و شوناس و مەزهەب و ئایین و كولتوور، هەروەها خاوەن قەزیەیەكی شەرعی و یاساییە، خیانەتیش تەنها بە لێدوانی سیاسیانە نابێت مەگەر بۆ ئیستهلاكی ناوخۆیی بێت و هەڵچوونی دەروونی درووست بكات".
موحسین دۆسكی، ئەندامی پەرلەمانی كوردستان لە بارەی داوای ئەو پەرلەمانتارێكی كورد، گووتی" ئەم كیانە موڵكی كەس وكاری شەهیدان و پێشمەرگە و گەلە، ئەوانەی داوای هەڵوەشانەوەی دەكەن، كەسانی داخ لە دڵن و رقی سیاسییان هەیە و قەسەكانیان هیچ بەهایەكی نییە".
د. زیرەك عەبدولڵا، نووسەر و چاودێری سیاسی، لەمبارەوە دەڵێت " قەوارەی سیاسی هەرێمی كوردستان، لە بنەچەدا بووێكە وابەستەی كەسێك، توێژێك، گرووپێك، پارتێكی سیاسی نییە، بەڵكو پەیوەستە بەتەواوی كۆمەڵگە، واتا موڵكی كۆمەڵگەیە. بە گەڕانەوە بۆ مێژوو بەئاسانی دەبینرێت، كە ئەو كیانە لەلایەن هەموو چین و توێژ و پێكهاتێكی كوردستانەوە خەباتی بۆ كراوە، خوێنی بۆ دراوە، پارێزراوە و گەشەی پێدراوە. هەر چەندە لە ئێستادا بێكەموكوری و كێشە نییە، بەڵام بێسوودی ماددی و مەعنەویش نییە. لەلایەنی ئەخلاقییەوە ئەو قەوارەیە چەندە پێوەست بێت بەوانەی لە ژیاندان، ئەوەندەش پێوەستە بە خوێنی رژاوی پێشمەرگە قارەمانەكان و بنەماڵەكانیان، پێوەستە بە گوندی وێرانكراو و شاری كیمیابارانكراو، پێوەستە بەمێژووی ئەو نەتەوە و پێكهاتانەی لەسەری دەژین.
د. رۆژان ئاشتاب، چالاكوانی سیاسی رۆژهەڵاتی كوردستان، لەمبارەوە دەڵێت" كوردستان پێویستی بە رووخاندن نییە، بەڵكو پێویستی بە پاراستنی هەیە، حكومەتی هەرێم بە شێوازییەكی دیموكراتیك لەلایەن خەڵكەوە هەڵبژردراوە ودەستەڵاتی بنكە فەراونە و چەندین هێزی سیاسی حكومەت بەڕێوە دەبن، ئەوانەی داوی رووخانی دەكەن كۆمەڵێك بەكرێ گیراوی دەوڵەتانی ناوچەكەن و دژی كوردیشن".

زۆرترین بینراو