هەموو ساڵێك عاشقان بە یادی ڤالانتاینەوە 50 ملیۆن گوڵی سوور پێشكەش بە یەكتر دەكەن

هەموو ساڵێك عاشقان بە یادی ڤالانتاینەوە 50 ملیۆن گوڵی سوور پێشكەش بە یەكتر دەكەن

راڤێست كوردی- سۆران:
لە سەدەكانی سێهەمی زایینی لە رۆما، سەركردەیەك بەناوی (كلادیۆسی دووەم) هەبوو، ئەو پێی وابوو ‌ئەو سەربازانەی كە هاوسەرگیریان نەكردووە، باشتر و بەهێزترن لەو سەربازانەی كە ژن و منداڵیان هەیە، بۆیە بڕیار دەدات كە سەربازەكانی ئیمپڕاتوری رۆم، نابێت بە هیچ شێوەیەك ژن بخوازن و دەبێت بە سەڵتی بمێننەوەو هەر سەربازێكیش سەرپێچی لە بریارەكەی ئەو بكاتن سزاكەی مەرگ دەبێ‌، لەبەر ئەوەی كلۆدیۆس سەركردەیەكی زاڵم و زۆردار بووە، بۆیە هیچ كام لە سەربازەكان و تەنانەت سەركردەكانیش نەیتوانیووە دژ بەو بریارە بەوەستن و قسەی لەسەر بكەن.
لەو كاتەی سەربازەكان لە رەوشێكی خراپی دەروونی دەژیان و ئومێدیان بە دیاركردنی هاوبەشی ژیان و گەیشتن بە خۆشەویستەكانیان كەم ببووە، قەشەیەك وەك یاخییەك دژ بەو بریارە دەركەوت و بوو بە فریادرەسی سەربازە گەنجەكان و بە شێوەیەكی نەهێنی لەنێو كەڵیسەكەیدا، مەراسیمی گەیاندنیان بە كچە خۆشەویستەكانیان و مارەكردنیان لە یەكتر رێك دەخست.
هەوڵە دڵسۆزییەكانی قەشە (ساینت ڤالانتاین) درێژە ناكێشێ و ئیمپراتۆر لە كارەكەی ئاگادار دەكرێتەوە، ئیمپراتۆر لەپێناو لێخۆشبوونی، مەرجێك دەخاتە بەردەم قەشە ڤالانتاین، بەوەی واز لە ئاینی مەسیحی بهێنێت و لەبەرامبەردا بتەكانی رۆمانی بپەرستێت، بەڵام قەشە ڤالانتاین بە توندی داواكەی ئیمپراتۆر رەت دەكاتەوەو سووربوونی خۆی لەسەر یەكتاپەرستی و ئاینەكەی دووپات دەكاتەوە، ئەم هەڵوێستەی قەشە ئیمپراتۆر توڕە دەكات و رۆژی 14 / 2 / 270 زاینی فەرمانی لە سێدارەدانی بەسەردا جێ بە جێ دەكرێ.
دوای لە سێدارەدانی، ڤالانتاین بووە هێمای عەشق و خۆشەویستی و مرۆڤدۆستی، هەربۆیە لە سەرتاسەری جیهان، كچ و كوڕانی عاشق 14 ی شوباتی هەموو ساڵێك، وەك وەفایەك بۆ گیانی قەشە ڤالانتاین، بە كەرنەڤاڵێكی مەزن ئەو رۆژە بە ئاڵوگۆڕكردن و بەخشینی گوڵی سوور و پۆستكارت و بووكە شووشە و چوكۆلات و نامە و شیعری دڵداری یاد دەكەنەوە.
لە كوردستان یش هاوشێوەی وڵاتانی دونیا، ئەم رۆژە بە شێوەی جیا جیا یاد دەكرێتەوەو عاشقان و هاوسەران روو لە دوكانی گوڵفڕۆشی دەكەن و گوڵێكی سوور وەیان دیارییەكی تایبەت كە هێما بێ بۆ ئەو یادە دەكڕن و پێشكەش بە خۆشەویستانی خۆیان دەكەن.
سەهەند محەممەد كوڕە گەنجێكی تەمەن 25 ساڵەی دانیشتووی سۆرانە، ئەو بریاری داوە بۆ رۆژی ڤالانتاین گوڵێك و بۆكەڵەیەكی ورچی رەنگ سوور بكاتە دیاری خۆشەویستەكەی و دەڵێ‌"ژیان بە خۆشەویستی یەوە جوانە"، سەهەند دوای وەرگرتنی 3 رەفز لەلایەن كچە هاوڕێیەكانی، دوو ساڵە كەوتۆتە داوی خۆشەویستی كچێكی دراوسێی و دەڵێ‌"لەوەتەی ئەو كچەم خۆشویستووە، وا دەزانم هەموو دونیا ئی منە، بۆیە ئامادەم لەو رۆژە پیرۆزە دا دڵی خۆم دەربهێنم و پێی ببەخشم".
كارێز عەبدوڵا هاوتەمەن و هاورێی سەهەندە، ئەو پێچەوانەی برادەرەكەی باوەڕی بە رۆژی خۆشەویستی نییە و پێی وایە خۆشەویستی ئەو سەردەمە هەمووی تەنها بۆ سیكسكردنە و دەڵێ"هیچ شتێك بە ناوی خۆشەویستی نێوان كوڕ و كچ نەماوە، ئەوەی هەیە تەنها پەیوەندی جنسی یە و، كوڕ و كچ بۆ تێركردنی ئارەزووە سیكسیەكانی خۆیان پەیوەندی دروست دەكەن"، كارێز بوونی زۆربەی كێشە كۆمەڵایتییەكان هەر بۆ ئەم مەبەستە دەگەڕێنێتەوە"لەبەر ئەوەی پەیوەندی نێوان كوڕ و كچەكە تەندروست نییە، بۆیە زۆربەی جار كێشە لە نێوان هەردوولا دا دروست دەبێ و جاری واش هەیە كێشەكان گەورە دەبن و لە دەستی دوو كەس دەردەچێ و دەبێتە كێشەی كۆمەڵایەتی نێوان دوو خێزان و بەو هۆیەشەوە خوێن دەڕژێ و دوژمنداری دروست دەبێ، بۆیە باوەڕم بە خۆشەویستی ئەو سەردەمە نییە".
رۆژان ئەحمەد تەمەن 27 ساڵ ئامۆژگاری عاشقان دەكات بەوەی دڵسۆز و وەفادار بن بەرامبەر بە یەكتر و ناپاكی لەو پەیوەندییە پیرۆزە نەكەن كە لە نێوان هەردوولادا هەیە و دەڵێ‌"چ شتێك بە قەد خۆشەویستی پیرۆز نییە لای من، مەرج نییە ئەو خۆشەویستیە بە مانای پەیوەندی خۆشەویستی نێوان كوڕ و كچ بێ، دەكرێ پەیوەندی خۆشەویستی نێوان دایك و رۆڵەكەی بێ، بۆ كوردستان بێ، گرینگ ئەوەیە ناپاكی لەو پەیوەندییە نەكرێ و جوانییەكەی پارێزراو بێ و رێزی لێ‌ بگرین"،
رۆژان تاكو ئێستا دڵی نەیتوانیووە هیچ كوڕێك هەڵبژێری بۆ پەیوەندی خۆشەویستی، ئەو بە پێكەنینەوە دەڵێ‌"تاكو ئێستا دڵم دەرگای بۆ هیچ كوڕێك نەكردۆتەوەو لەداهاتووش نازانم چ كوڕێك دەبێتە میوانی دڵم، بەڵام لێرەوە رۆژی خۆشەویستی ڤالانتاین لە تەواوی خۆشەویستان پیرۆز دەكەم و هیوای پەیوەندییەكی پاك و ژیانێكی پڕ لە خۆشییان بۆ دەخوازم".
- هەموو ساڵێك لەو رۆژە دا (36) ملیۆن دڵ لە شێوەی سندوق و شوكولاتە و شیرینی دروست دەكرێت و دەفڕۆشرێت.
- لە شاری ڤیرۆنا ی ئیتالیا كە شوێنی خۆشەویستی نێوان (رۆمیۆ و جولێتە) ساڵانە لەو رۆژەدا بە هەزاران لە عاشقان كۆدەبنەوەو وتار پێشكەش دەكەن و باس لە خۆشەویستی و مرۆڤایەتی دەكەن.
- 73 % كڕیاری گوڵی سوور، پیاون.
-نزیكەی 50 ملیۆن گوڵ دەگۆڕدرێتەوە لە جیهاندا.
-تەنها لە ئەمەریكا عاشقان یەك ملیار كارتی پیرۆزیاییی دەگۆڕنەوە.

 

 

 

 

زۆرترین بینراو