هەندێك بێ ئاون و هەندێكش رۆژانە 12 كاتژمێر ئاویان بۆ دەچێت

هەندێك بێ ئاون و هەندێكش رۆژانە 12 كاتژمێر ئاویان بۆ دەچێت

ئا -دیلمان فەرحان: شارەدێی سرێشمە سەربە ناحیەی خەڵیفانە و زیاتر لە هەزار خێزانی تێدا نیشتەجێن، خاوەن مێژوویەكی درێژە و ڕۆڵێكی بەرچاویان هەبووە لە شۆڕش و بەرخۆدانەكان، خاوەنی چەندین كەسایەتی دیارە، كە مەعروف جیاوك یەكێكە لە ناودارەكانی رابردووی ئەم شارەدێیە، ئێستا ئەم شارەدێیە بە دەست كۆمەڵێك كێشەی كمی خزمەتگوزاری دەناڵێنێت، كە دیارترینیان كێشەی ئاوە.
موسلیح مستەفا عومەر، بەرپرسی فەرمانگەی ئاوی سرێشمە، وەڵامی ئەو هاووڵاتییانە دەداتەوە كە گومانیان لە پاكی ئاوی خواردنەوەی سرێشمە هەیە و دەڵێت" سیستەمی پاك راگرتنی ئاوی سرێشمە لە رێگەی كلۆرەوەیە و %100 پاكە".
بەشێك لە بۆرییەكانی تۆڕی ئاوی سرێشمە زوو زوو دەشكێن، ئەمەش پرسیاری هۆكاری شكان و بەردەوامی پێداویستییەكانی لای دانیشتووانی شارەدێكە دروستكردووە، لە بەرامبەریشدا بەرپرسی فەرمانگەی ئاوی ئەو شوێنە دەڵێت " هۆكارەكە بۆ خراپی كوالێتی پێداویستییەكان دەگەڕێتەوە، پێشتر داوامان لە بەڕێوەبەرایەتی ئاوی سۆران كردووە بۆ دابینكردنی پێداویستییەكانمان، هەرچەندە یارمەتیان داوین، بەڵام ئەو ئیمكانییەتەیان نەبووە بۆ دابینكردنی پێداویستییەكان".
ئەو بەرپرسە دەشڵێت " حكومەت وەك بەڕێوەبەرایەتییەك مامەڵەی لەگەڵ كردووین نەوەك فەرمانگە".
بەپێی زانیارییەكان زیاتر لە 250 ملیۆن دینار تەرخانكراوە بۆ پڕۆژەی راكێشانی بۆرییەكی ئاو بۆ شارەدێیەكە، بەڵام وەستێندراوەن موسلیح موستەفا لەمبارەوە گووتی" پڕۆژەكە نەوەستاوە تەنها كێشەی پێداویستییەكانمان هەیە".
گووتیشی " هەبوونی پڕۆژەی رێگاوبان لە سنوورەكەمان كێشەی زۆری لە بەرامبەر پڕۆژەكەمان دروستكردووە، زیاتر لە 16 بۆڕی ئاومان بەم هۆیەوە شكاون".
زۆربەی گەڕەكەكانی سرێشمە بەپێی پێویست ئاویان بۆ ناچێت، گەڕەكیش هەیە زیاتر لە 6 كاتژمێر ئاویان بۆ دەڕوات، ئەمەش بۆتە هۆی نیگەرانی دانیشتووانی ئەو گەڕەكانەی ئاویان بۆ ناچێت، لە بەرامبەردا، بەرپرسی فەرمانگەی ئاوی دەڵێت" زیاتر لە 80 ماڵ كەوتوونەتە سەر رێگای ئاوی بەردەوام، رۆژانە 12 كاتژمێر ئاو بۆ شارەدێی سرێشمە دێت كە 24 گەڕەكە لەماوەی 12 كاتژمێر بە بەردەوامی ئاو بۆ ئەم 80 ماڵە دەڕوات، بەدواداچوونمان كردووە و بیرشمان لەوە كردۆتەوە كە سیستەمێك بۆ ئەم بابەتە دابنێن، بەڵام تا ئێستا وەڵامی بەدواداچوونەكانمان نەدراوەتەوە".
هەندێك لە هاووڵاتییان تێبینی ئەوەیان هەیە، كە هەر كاتێ كێشەیەكی ئاویان بۆ دروست دەبێت یا بەشێك لە تۆڕی ئاو رووبەرووی كێشە دەبێتەوە ماوەی مانگێك دەخایاند تا كێشەكان چارەسەر دەكرێت، لەو ماوەیەشدا لە بێ ئاوی هیلاك دەبین. موسلیح موستەفا لەمبارەوە گووتی" كێشەكانمان هیچ كات نەگەیشتوونەتە مانگێك بۆ چارەسەركردنیان، تەنها هەندێكجار كەمی پێداویستییەكان رێگر بوونە لە كارەكانمان".

زۆرترین بینراو