هەوڵی تەواو كردنی پڕۆژەی نەخۆشخانەی 25 تەختیی سیدەكان دەدرێت

هەوڵی تەواو كردنی پڕۆژەی نەخۆشخانەی 25 تەختیی سیدەكان دەدرێت

موڕشید برادۆستی – سیدەكان: چوار ساڵ زیاترە، لە ناحیەی سیدەكانی سەر بە قەزای سۆران، پڕۆژەی نەخۆشخانەیەكی 25 تەختی بەهۆی قەیرانی دارایی كاركردنی تێدا راگیراوە و هاووڵاتییانی دەڤەرەكەش داوا لە حكومەت دەكەن هەوڵی تەواو بدات بۆ وەگەڕستنەوەی ئەو پڕۆژەیە و تەواو بوونی بە پێویست دەزانن.
پڕۆژەی نەخۆشخانەی 25 ( قەرەوێل ) تەختەیی سیدەكان لە ساڵی 2014 لەلایەن كۆمپانیای ئاراسن بە گوژمەی زیاتر لە 3 ملیار دینار دەست بەجێبەجێ كردنی كراوە و دووای تەواو كردنی بناغەی نەخۆشخانەكە كارەكانی پڕۆژەكە راگیرا و تەواو نەكراوە، هاووڵاتییانیش ناچارن بۆ سەرجەم نەشتەرگەریەكان روو لە قەزای سۆران و شوێنەكانی دیكە بكەن .
شایەنی باسە، بەرفراوانی شارەدێی سیدەكان و زۆربوونی رێژەی دانیشتووانان، وای كرد حكومەتی هەرێمی كوردستان بەمەبەستی پێشكەش كردنی خزمەت كردنی زیاتری بواری تەندرووستی، لە ساڵی 2013ەدا بڕیاری دروست كردنی نەخۆشخانەیەكی 25 تەختەیی دەربكات، نەخۆشخانەكە دوو نهۆمە كۆمەڵێك تایبەت مەندی هەیە و بە گوژمەی 3 ملیارد و 448 ملیۆن و 350 هەزار دینار بۆ ماوەی 300 رۆژ لە گوندی سەربیش نزیك سیدەكان كەوتە واری جێبەجێ كردن، ماوەی زیاتر لە سێ ساڵە پڕۆژەی نەخۆشخانەكە بەهۆی قەیرانی داراییەوە لە ماوەیەكی كەمی كاركردن راگیراوە .
مزەفەر مستەفا هاووڵاتییەكی دانیشتووی سەنتەری ناحیەی سیدەكانە بە زاری كرمانجی گووت " شارەدێی سیدەكان سنوورێكی بەرفراوانی هەیە و زیاتر لە 15 هەزار كەس لەو دەڤەرە نیشتەجێیە، ئەمە لە كاتێكدایە ناوچەیەكی سەرسنووری و دوورەدەستە لە پارێزگای هەولێر، جیا لە نەشتەرگەریەكان دەبێـ بۆ سەرجەم نەشتەرگەری و رووداوە نەخوازراوەكانی وەك : بۆردومان، تۆپباران، تەقینەوەی تەقەمەنیەكان، رووداوی ئۆتۆمبیل و رووداوەكانی دیكە روو لە سۆران بكرێت، بۆیە زۆر پێویستە حكومەت و بەتایبەت وەزارەتی تەندرووستی پڕۆژەی نەخۆشخانەی 25 قەرەوێلی سیدەكان تەواو بكەن ئەگەر پارەش بەردەست نەبێت، جێ خۆیەتی بۆ تەواو كردنی ئەو پڕۆژەیە پارەی بۆ قەرز بكەن .
پێشتر، فیراز كاكە ئەمین بەڵێندەری پڕۆژەی نەخۆشخانەی 25 تەختەیی سیدەكان لە لێدوانێكیدا بۆ زاری كرمانجی دووپاتی لەوەكردبووەوە " لە 8 – 10 – 2014 وەك كۆمپانیای ئاراسن دەستمان بەجێبەجێ كردنی پڕۆژەی نەخۆشخانە كردوە، كە 25 تەختەیی و دوو نهۆمە كۆمەڵێ تایبەت مەندی هەیە، پڕۆژەكە بە گوژمەی 3 ملیار و 448 ملیۆن و 350 هەزار دینار دەست بە جێبەجێ كردنی كرا.

ناوبراو زیاتر گووتی " هەرچەندە قەیرانی دارایی هەیە و بەڵێندەران كارەكانیان راگرتووە، بەڵام ئێمە ئامادەین كارەكانی خۆمان جێبەجێ بكەین لە و پڕۆژە تا ئەوكاتەی كە توانامان هەبێت لە شوێنەكانی دیكەش وەك شاری كۆیە و تەق تەق و رەواندز شەش پڕۆژەمان هەبووە و سەرجەمیان تەواو بوونە لە حكومەتیش وەرگیراون، بۆ ئەم پڕۆژەیەی نەخۆشخانەش كارەكانمان ئەنجام دەدەین تا ئەوكاتەی توانامان هەبێت، حكومەتیش كەی پارەی پێی داین ئەوكات وەری دەگرین، هەموو هەوڵێكیش دەخەینە گەڕ بۆ تەواو كردنی پڕۆژەكە .
بەڵام ئەوەی جێگەی نیگەرانی هاووڵاتییانی سیدەكانە، پڕۆژەكە لە لایەن ئەو كۆمپانیا و بەڵێندەرە نەتوانرا تەواو بكرێت و دووای ماوەیەكی كەمی كاركردن و دروست كردنی بناغەی پڕۆژەكە، بەڵێندەر پڕۆژكەی جێهێشتوو و كارەكانی راگرت .
د . مەقسوود ئیسماعیل بەڕێوەبەری تەندرووستی سۆران بە زاری كرمانجی راگەیاند" لە 16 – 2 – 2013 دروست كردنی نەخۆشخانەیەكی 25 تەختی بۆ سیدەكان لەلایەن وەزارەتی تەندرووستی رەزامەندی دروست كردنی بۆ دەرچووە، بەڵام بەهۆی نەبوونی زەوی و شوێنی پێویست، پڕۆژەكە ساڵێك دوواكەوت لە ساڵی 2014 لە لایەن كۆمپانیای ئاراسن چووە واری جێبەجێ كردن .
بەڕێوەبەری تەندرووستی سۆران ئاشكراشی كرد" بەڵێندەری پڕۆژەكە لە دەستپێكی كاركردنی بەڵێنی بە ئێمە و یەكەی كارگێڕی سیدەكانیشدا كە تاكو پڕۆژەی دروست كردنی نەخۆشانەكە كۆتای پێنەهێنێت دەست لە كاركردن هەڵناگرێت، بەڵام بەداخەوە دووای دروست كردنی بناغە و چەند دینگەیەكی ژێر زەمینی بینایەكە بەڵێندەر كارەكانی جێهێشت .
دكتۆر مەقسوود روونی دەكاتەوە" دروست كردنی ئەو نەخۆشخانەیە بۆ سیدەكان زۆر گرنگ و پێویستە، چونكە سیدەكان شوێنێكی دوورە دەستە و رێژەیەكی زۆری گوندی هەیە، نەخۆشخانەكەش 25 تەختیە و نەخۆشی لێی دەخەوێندرێت، بەشی سۆنەر و تاقیگەی دەبێت، بەشی لەدایك بوون چەند بەشێكی دیكەی گرنگی هەیە، هەروەها نەشتەرگەریشی لێ ئەنجام دەدرێت، دەبێتە ئاسانكاریەكی زۆر باش بۆ هاووڵاتییان و گوندنشینان و دەڤەری سیدەكان، تا چیتر بۆ نەخۆشیەكی كەم روو لە سۆران نەكەن، ئێمەش وەك بەڕێوەبەرایەتی تەندروستی سۆران بەردەوام دەبین بۆ هەر كارێك كە پێویستی بە ئێمە بێت تا چارەسەری بكەین.
لە لای خۆشیەوە، د . زێدان رەشید برادۆستی ئەندامی پەڕڵەمانی كوردستان بە زاری كرمانجی گووت " سەبارەت بە تەواوكردنی كارەكانی پڕۆژەی نەخۆشخانەی 25 قەریۆلەی سیدەكان لە دەڤەری برادۆست، لەسەر داواكاری بەندە لە بەرواری 25 – 8 – 2019 د . سامان بەرزنجی وەزیری تەندروستی حكومەتی هەرێمی كوردستان رەزامەندی دا لەسەر داواكاریمان بۆ تەواوكردنی نەخۆشخانەی 25 تەختیی سیدەكان لە دەڤەری برادۆست بە نوسراوی فەرمی بە ژمارە 11170 لە 26 - 8 - 2019 ئاڕاستەی ئەنجومەنی وەزیران - سەرۆكایەتی دیوان كراوە و تیایدا داوای رەزامەندی لەسەر دوو ملیار و نۆسەد و چل و هەشت ملیۆن دینار كراوە بۆ تەواو كردنی بینای نەخۆشخانەكە .
شایەنی باسە، ناحیەی سیدەكان لە ساڵی 1932 بووەتە شارەدێ و لە رووی كارگێڕیەوە سەر بە قەزای سۆرانە و بەدووری 34 كم لە سۆران هەڵكەوتووە، سیدەكان خاوەنی زیاتر لە 250 گوندە و زیاتر لە 15 هەزار كەسی لێ نیشتەجێییە، لە سەنتەری ئەو شارەدێییە تا هەنووكە بنكەیەكی تەندرووستی لێ یە و هاووڵاتییان بۆ نەخۆشی قورس و خەواندن و نەشتەرگەریەكی كەم دەبێت بە دووری 35 كم روو لە سۆران و شوێنەكانی دیكە بكەن، ئەمەش كێشە و گرفتێكی ز‌وری بۆ هاووڵاتییانی دەڤەری برادۆست دروست كردوە.
تەواو نەركردنی پڕۆژەی دروست كردنی نەخۆشخانەی سیدەكان لە كاتێكدایە، بەگشتی پڕۆژە خزمەت گوزاریەكانی جكومەت لە ساڵی 2014 تا ئێستەشی لەگەڵ بێت راگیراون، جیا لەو پڕۆژەیەش لە سیدەكان پڕۆژەی دووساید، دروست كردنی بانك، پڕۆژەی رێگای دۆڵی زەرزێ و چەند پڕۆژەیەكی دیكە بەهۆی قەیرانی دارایی راگیراون و كات و ساتی دەستپێكردنەوە و تەواو كردنیشی دیار نییە .
"نەخۆشخانەكە 25 تەختیە و دوو نهۆمە، نەخۆشی لێی دەخەوێندرێت، بەشی سۆنەر و تاقیگەی و بەشی لەدایك بوون چەند بەشێكی دیكەی گرنگی هەیە، هەروەها نەشتەرگەریشی لێ ئەنجام دەدرێت "

زۆرترین بینراو