هەوڵ دەدەم شیعرەكانم لە سیدییەك كۆ بكەمەوە

هەوڵ دەدەم شیعرەكانم لە سیدییەك كۆ بكەمەوە

ئا/ رەمەزان هەرنی: " مەعسومە ساڵح ، ناسراو بە مامز هەركی لە دایكبووی پارێزگای یەزدی ئێرانە، ئێستا دانیشتوی قەزای شەقڵاوەیە سەر بە پارێزگای هەولێر.
خاتوونی شاعیرو هەست نازكی شارە جوانەكەی شەقڵاوە لە دیمانەیەكی تایبەتی زاری كرمانجی دا باسی ئەزموونی نووسینەكانی دەكات و بیرەوەرییەكانی سەرەدەمی ساڵانی پێشوو دەخاتەروو، دەڵێت " مرۆڤێكم پێشبینی ناكرێم هەندێك جار سروشیتم و هەندێك جار دەسكرد".
مامز هەركی، سەرەتای قسەكانی بەوە دەست پێكدر" لە قۆناغی مناڵییەوە شیعر دەنووسم. بەڵام سەرەتا گرنگیم بە نووسینی رۆمان و كۆرتە چیرۆك دەدا و زۆر كەم شیعرم دەنووسی تا تەمەنی 11 ساڵی ، هەوڵم دا پەرە بە هۆنەری شیعریم بدەم ، بەڵام ئەو كات بە زمانی فارسیم دەنووسی تا ساڵی 1997 بۆ باوەشی گەرمی نیشتیمان گەڕاینەوە و هەر بە یەكجاری وازم لە نووسینی فارسی هێنا و دەستم كرد بە نووسینی كۆرتە چیرۆك بە زمانی دایك كە لە گۆڤاری پێشكەوتن بڵاو دەبوونەوە و لە ساڵی 2000 تەنها و تەنها گرنگیم بە بواری شیعری دا لەوە كاتەوە تا ئێستا من و شیعر هەردووكمان یەكتر دەنووسینەوە".
مامز گووتیشی " زۆر كەم ئاوڕم لە منداڵیم داوەتەوە، لە شیعرەكاندا دوونیایەكی پاك و بێگەردە سەردەمانی منداڵی رۆڵ دەبینێت، بەڵام من زۆر بیری لێ ناكەمەوە، چونكە گەڕانەوە تەنها خەیاڵە و حەز ناكەم ئەفسووس بۆ رابردوو بخۆم".
مامزەكەی شەقڵاوە گووتیشی " رێبوارێكم لە نیوەی رێگادام، هەرچەندە ئاسۆیەكی دوورە بەڵام هەوڵ دەدەم بە خوێندن و نووسینی زیاتر بە ئامانج بگەم، كە هەبوونی بەرهەمێكی جوانە چێژ بە خوێنەر ببەخشێت، بەڵام زۆر جار دوای نووسینی شیعرێك مرۆڤ تووشی دڵە راوكێ و گومان دەبێت و قەڵەمەكەی دەستی رادەگرێت. هەرچەندە هەوڵم داوە و هەوڵ دەدەم، تا ئێستا نەمتوانیوە دەقێك بنووسم بە دڵم بێت. بەردەوام هەست دەكەم نووسینەكانم زۆر سەرەتایین".
ئەو زیاتر لە بارەی شیعرەوە گووتی " شیعر ئیلهامە، ئیلهامێك لە كاتی رووداوێكی خۆش و ناخۆش، خوێندنەوەی شیعرێك، لە كاتی سەیر كردنی فیلمێكی تراژیدی یا رۆمانسی، بیستنی گۆرانی...هتد ، كاریگەری دەكاتە سەر هەستەكانی مرۆڤ و دەچێتە دڵ و دەروونییەوە و بە دڵنیاییەوە مێشكیش بە خەیاڵ رۆڵی خۆی دەبینێت، هەموویان بە گشتی پێكەوە دەبنە هۆكاری درووست بوونی كاراكتەرێك كە رۆڵی پاڵەوان بگێرێت و شیعر بخوڵقێت. واتە هەمووی لە خەیاڵێك زیاتر نییە. خەیاڵە، بەڵام بەگشتی نووسینەكانم هەمووی بابەتی گشتین و تایبەت نین".
مامز لە بارەی شیعری گۆرانی گووتی " تا ئێستا ژمارەیەك شیعرم كراونەتە گۆرانی وەك (هەستی نامۆیی ، بێ كەسی ، رێبوارم ، حەلقەی پەنجە ، خەیاڵ ، بولبوڵی بێ خانە و لانە ) و چەند بەرهەمێكی تر كە لەلایەن هەژار صاڵحی برام كراونەتە گۆرانی و، هەستی نامۆیی و بێ كەسی. وەكو كلیپ بەردەستن. وە لە 2013 چەند هۆنراوەیەكم لەگەڵ هۆنراوەی هەشت لاوی شاعیری خوێن گەرمی سنووری قەزای شەقڵاوە لەلایەن سەنتەری رۆشنبیری شەقڵاوە لە نامیلكەیەك بە ناوی (شاتان) بە چاپ گەیشت. تا ئێستا سیدی و كلیپی شیعریم نییە، بەڵام بۆ داهاتوو لە بەرنامەم دا هەیە بەرهەم بێنم".
مامز لە كۆتایدا گووتی " ئێستا تەنها خەریكی كۆ كردنەوەی شیعرەكانمم تا لە داهاتوویەكی نزیك بە چاپیان بگەیینم و كارە سەرەتاییەكانی تەواو بووەو كۆ كراوەی شیعرەكانم تێكەڵاویكێن لە شیعرەكانی كلاسییكی و نوێ و سپیم.

 

زۆرترین بینراو