هەڵبژاردەی عێراق لە هەولێر رووبەڕووی سوریا دەبێتەوە

هەڵبژاردەی عێراق لە هەولێر رووبەڕووی سوریا دەبێتەوە

زاری كرمانجی- ئاژانسییە هەواڵییە وەرزشییەكان: گوتەبێژی دەستەی كاتی یەكێتی تۆپی پێی عێراق، بە میدیاكانی عێراقی رایگەیاند، هەڵبژاردەی عێراق لە یارییەكی دۆستانەدا لە هەولێر میوانداری هەڵبژاردەی سوریا دەكات.
هیشام محەممەد، گوتەبێژی دەستەی كاتی یەكێتی تۆپی پێی عێراق، بە میدیای عێراقی گووت" رەزامەندی یەكێتی تۆپی پێی سوریایان بەدەستهێناوە بۆ ئەوەی هەڵبژاردەی سوریا یارییەكی دۆستانە لەگەڵ هەڵبژاردەی عێراق ئەنجام بدات، وەك ئامادەكارییەك بۆ پاڵاوتنەكانی ئاسیا بۆ مۆندیالی 2022ی قەتەرو جامی نەتەوەكانی ئاسیای 2023".
هیشام محەممەد، گووتیشی" یەكێتی تۆپی پێی سوریا رازی بووە یارییەكی دۆستانە لەگەڵ هەڵبژاردەی نیشتمانیمان بكات، یارییەكە 8ی ئەیلوول لەسەر یاریگەی فرانسوا هەریری لە هەولێر ئەنجام دەدرێت".
هیشام محەممەد، هەروەها گووتی" هەڵبژاردەكەمان بەر لەو یارییە، لە 3ی ئەیلوول رووبەڕووی هەڵبژاردەی عومان دەبێتەوە، دواتر دەگەڕێتەوە هەولێرو لەوێ كەمپێكی مەشقیی دەكاتەوە، كە چەند رۆژێك دەخایەنێت بەر لەوەی رووبەڕووی هەڵبژاردەی سوریا ببێتەوە".
گوتەبێژی دەستەی كاتی یەكێتی تۆپی پێی عێراق، روونیشیكردەوە" پەیوەندیمان لەگەڵ چەند هەڵبژاردەیەكی دیكە بەردەوامە بۆ ئەوەی سێیەم یاری دۆستانە رێكبخەین، كە ئەویش هەر لە هەولێر ئەنجام دەدرێت، بەر لەوەی لە 13ی تشرینی یەكەم رووبەڕووی هەڵبژاردەی هۆنگ كۆنگ ببینەوە".

زۆرترین بینراو