ویدا نەسرەدین: هونەری من هەڵقوڵاوی زامە قوڵەكانی هەڵەبجەیە

ویدا نەسرەدین: هونەری من هەڵقوڵاوی زامە قوڵەكانی هەڵەبجەیە

"پەیمانگەو قوتابخانەو ئەكادیمیا ناتوانن مرۆڤ بكەنە هونەرمەند ئەگەر ئەو كەسە خۆی بەهرەی هونەری تێدانەبێت"


دیمانە/ محەمەد ئامۆكەیی_ سلێمانی: خانمە شێوەكار ویدا نەسرەدین، لە دایكبووی هەڵەبجەی شەهیدە و تا تەمەنی 9 ساڵی هەر لەو شارەبووە دواتر بەهۆی كیمیابارانی هەڵەبجە، زۆرێك لە ئەندامانی خێزانەكەی لە دەستدان و لەگەڵ دووبرا و خوشكێكی دا ئاوارەی وڵاتی ئێران دەبن، دوای مانەوەی بۆ ماوەی پێنج ساڵ لە وڵاتی ئێران درێژە بەخوێندندەداو پاش گەڕانەوەشی بۆ زێدەكەی بەگووتەی" خۆی كێشەی خوێندنی بۆ دروست دەبێت هۆكارەكەشی بەهۆی نەمانی ناسنامەی باری شارستانییەوە بوو كە بۆماوەی 10 ساڵ بێناسنامە ماینەوە، هەروەها شەڕی ناوخۆش لە زۆر شت بێبەشی كردین، پاشان دوای هەوڵ و ماندووبونێكی زۆر دووبارە گەڕامەوە بەر خوێندن و پەیمانگای هونەرەجوانەكانم بە پلەی زۆر باشە تەواوكرد، ئێستا لە سلێمانی نیشتەجێم و فەرمانبەرم ژیانی هاوسەریم پێكهێناوەو خاوەنی دووكوڕم، ویدا لە بارەی گرنگی هونەری وێنەكێشان بۆ زاری كرمانجی دەڵێت" هونەری وێنەكێشان بەدرێژایی مێژوو رۆلێكی گەورەی بینیوە لە بەرەو پێشكەوتنی ژیانی مرۆڤدا، هەر لە كۆنەوە وەك زمانی ئاماژەو بەمەبەستی گفتوگۆكردن لەسەر دیواری ئەشكەوتەكان بەكارهاتووە، دواتر وەك تۆماركردن و وێنەكێشانی سەركەوتن و مەترسی سروشتی و دەرەكیەكان و دواتریش لە نەخشاندنی سەركەوتنەكانی مرۆڤ دا رۆلێكی گەورەی هەبووە، لە قۆناغەجیاوازەكانی دیكەشدا وێنەكێشان رۆلێكی گەورەی لە جوانكاری و رازاندنەوەی كۆشكی پادشاو وەزیر و سوڵتانەكاندا بینیوە، لەسەر ئاڵای هێزو نەتەوە و قەبیلەكان وێنەكێشراوەو هێزێكی پێ‌ لە هێزێكیتری جیاكراوەتەوە، لە نەخشاندنی جل و بەرگدا بەكارهاتووە و لە كێشانی نەخشەی وڵاتاندا بەكار هاتووە، لە سەردەمی نوێشدا بۆ نەخشی بەرگی كتێب و كێشانی وێنەی تاوانباران لە دادگاكاندا بەكار هاتووە، لە بواری هونەریدا بۆ تەعبیركردن لە كارەسات و ڕووداوەكان رۆلی گەورەی هەبووە، لە ئێستاشدا سەرچاوەیەكی گرنگی سەرچاوەی داهاتی پەیداكردنی گەشتیارییە و مۆزەخانە بەناوبانگەكانی دونیا سیمای شارستانین بۆ وڵاتەكانیان و هێمای زیندوێتی شارن، بۆیە هونەری شێوەكاری گرنگ و پێویستەو هەمیشەش لەگەڵ پێشكەوتنی شارستانی و زانستدا رۆل و گرنگیەكەی زیاتر دەبێت."
ویدا نەسرەدین، رایدەگێنێت" هونەرەجوانەكان بەشێكبوون لە ژیانی من چونكە كاریگەری ئەو كارەساتە وای لەمن كردبوو بەردەوام ئەو قەتیس بوانەی لە مێشك و هزری مندا بوون ئەمدایە دەس قەڵمێك و لەسەر كاغەزێك بەتابلۆ تراژیدیەكان ئارام دەبووم، هەر لەسەردەمی منداڵیمدا لە خوێندنگاكان لە ئێران بەشداریم لە چەند پێشەنگایەكدا كە بۆ منداڵان لەلایەن شوان كابانەوە سەرپەرشتی دەكرا لەگەڵ تیپی مۆسیقای شنروێ كە لەلایان ئازاد ساڵح سەرپەرشتی دەكرا چەندین چالاكیمان لە بواری سرودو گۆرانی و كاری شانۆی ئەنجامداوەو بەشداربووم تێیاندا، وە چەندین چاوپێكەوتنم لەو سەردەمەدا لەگەڵ سازدراوە لەوانە لەگەڵ عەباسی ڤیدیۆو شانازخان و ئەرسەلان بایز و شێخ جەمالی بێژەرەوە، كە هەموو ئەم چالاكیانە كاریگەریان لەسەر دانابووم تا لە دواتردا وایان لێكردم بچمە پەیمانگای هونەرەجوانەكان."
ئەو خانمە شێوەكارە نایشارێتەوە لە باشوری كوردستان گرنگی بە هونەر نەدراوە و گووتی" لێرە گرنگی بە زۆرشت نەدراوە نەك هەر هونەری شێوەكاری ئەویش هۆكارەكانی دیارن قەیرانە ئابووری و جەنگە ناوخۆییەكان لە هۆكارە سەرەكییەكانن، ئەو هەوڵانەش لە ئێستادا هەن دابەشبوون بەسەر دوو ئاستدا كە یەكێكیان حكومییەو ئەویتریشیان تاكە كەسی و رێكخراوە ئێنجی ئۆ و سەربەخۆكانن، بۆنمەنە لەسەر ئاستی حكومی ژمارەی پەیمانگا هونەریەكان لەم سالانەی دوایدا زیاد كراون و لە زۆرێك لە شار و شارۆچكەكان پەیمانگای هونەرەجوانەكانكراوەتەوە كە بێگومان رۆلیان دەبێت لە پەروەردەكردنی هونەرمەندی داهاتوودا، وە لە وەزارەتی رۆشنبیریدا بەڕێوبەرایەتی شێوەكاری تایبەت هەیەو لەناو رێكخراوەی هونەرمەنداندا شێوەكاران رۆلیان هەیە، بەڵام رۆلەگرنگەكە لەسەر ئاستی تاك زیاترەو شێوەكاران بۆ خۆیان سەرقاڵی كاری تاكەكەسی خۆیانن، لە كردنەوەی پێشانگای شێوەكاری و بەرەوپێشبردنی، بەداخەوە دەكرا زۆر لە ئێستا باشتر گرنگی بەم هونەرەبدرایە كە نەدراوە."
ئاماژەی بەوەشكرد" لە راستیدا مەسەلەی هونەر پەیوەندی بە حەزێكی گەورەو قوڵەوە هەیە كە مرۆڤ دەبێت لە ناخیدا هەبێت، هەرگیز هیچ پەیمانگاو قوتابخانەو ئەكادیمیایەك ناتوانن مرۆڤ بكەنە هونەرمەند ئەگەر ئەو مرۆڤە خۆی بەهرە و حەزی گەورەی هونەری تێدانەبێت، بەداخەوە زۆرێك لە پەیمانگاو زانكۆكانی ئێمەش وەرگرتنی خوێندكار تێیاندا لەسەر بنەمای توانو بەهرە نیەو ناسراوی و وەلائی حزبی رۆلی گەورەیان هەیە، هەر بۆیە زۆرێك لەوانەی كە بۆ هونەر نەهاتوونەتە ئەو زانكۆ و پەیمانگایانە تەنها لەبەر بەدەستهێنانی بڕوانامە هاتوون پاش بەدەستهێنانی دووردەكەونەوە و كاری هونەری ناكەن، چونكە لە ئەساسدا ئەوانە خەمێكی گەورەیان نەبووە تا پاڵنەریانبێت بۆ بەتاڵبوونەوەیان لە رێگای هونەرەوە، بەڵام بۆ من كە نەهامەتی و كارەساتی هەڵبجەو لەدەستدانی خێزانەكەمم دیوە مەحاڵە بتوانم دەستبەرداری بم و هونەر بۆمن بۆتە ئەو دەرەچەیەی كە خەمەكانی خۆمی لێوە بەتاڵبكەمەوە و هەڵڕێژم، بەدیوێكی تریشدا رەنگە وازهێنان و دووكەوتنەوەی هەندێكیان پەیوەندی بە گرنگی نەدان و ئاوڕدانەوەبێت لەم هونەرە لەلایان حكومەت و لایەنی پەیوەندارەوە كە خۆتان دەزانن قەیرانی ئابوری كێشەی گەورەی ئێمەیەو هونەریش پێویستی بەردەوامی بە لایەنی ئابورییە بۆیە رەنگە ئەمە هۆكارەكان بن.

 

 

 

زۆرترین بینراو