وێرانكردنی ژینگە نیگەرانی ژینگە پارێزانی سۆرانی لێدەكەوێتەوە

وێرانكردنی ژینگە نیگەرانی ژینگە پارێزانی سۆرانی لێدەكەوێتەوە

راپۆرت-مەریەم ئەحمەد
لەگەڵ نزیكبوونەوەی وەرزی سەرما، بەشێك لە هاووڵاتییانی دەڤەری سۆران، روویان كردۆتە بڕینی دارو درختەكان و چالاكوانانی ژینگە پارێزیش هۆشداری دەدەن و داواكارە لە حكوومەت پەلە بكات بۆ دابەشكردنی نەوت بەسەر دانیشتووانی ناوچە شاخاوییەكان، لایەنە پەیوەندیدارەكانی سنوورەكەش دەڵێن " هەركەس روو لە بڕینی دارو درەختەكان بكات رووبەڕوی سزایی یاسایی توند دەبێتەوە.
هەژار ماهر ئێدلبی بەرپرسی رێكخراوی وار بۆ پاراستنی ژینگە، بە زاری كرمانجی راگەیاند: "بە هۆی درێژ كێشانی ئەم قەیرانانەی بەرووكی هەرێمی كوردستانیان گرتووە و گرانی نرخی نەوت و دابەش نەكردنی سووتەمەنی پێویست بەسەر هاووڵاتیانی گوند و شارو شارۆچكەكانی دەڤەری سۆران، بەشێك لە هاووڵاتییانی ناوچەكە بێویژدانانە روو دەكەنە بڕینی دار و درەخت و تێكدانی ژینگەو سروشتی جوانی كوردستان و پێویستە ئیدارەو هێزە ئەمنییەكانی دەڤەرەكە، هەوڵی زیاتر بدەن بۆ رێگە گرتن لەم دیاردەیە".
گووتیشی " لەم هەفتەی رابردوودا ئێمەی خوبەخشان و چالاكوانانی رێكخراوی وار بۆ پاراستنی ژینگە لە سونگەی هەست كرد بە بەرپرسیاریەتی، لە گردنەبووەنەیكی هێمانە لە بەردەم بەڕێوەبەرایەتی بەرگری شارستانی سۆران، بە ئامادەبوونی دەزگاكانی راگەیاندن، بانگەوازێكی 20 خالیمان ئارستەی حكوومەت و لایەنە پەیوەندارەكان كرد، یەكێك لە خاڵەكان بریتی بوو لەوەی كە پێویستە هەر چی زووە حكوومەتی هەرێمی كوردستان، چ لە رێگای وەزارەتی سامانە سروشتییەكان بێت یان لە رێگای كومپانیاكانی نەوتی كەرتی تایبەت بیر لە رێگا چارەی خێرا بكاتەوە، بۆ دابین كردنی نەوت و بە نرخێكی هەرزان بفرۆشێتەوە بە هاووڵاتییان، بە تایبەت لەناوچە شاخاوییەكان هەرنەبێت هەر خێزانەو دوو بەرمیل نەوتیان بەسەر دابەش بكرێت.
كرمانج عزەت، قائیمقامی قەزای سۆران بە زاری كرمانجی ڕایگەیاند: " ساڵانە لە كاتی نزیكبوونەوەی وەرزی سەرماو زستان، خەڵكانێك روو لە بڕینی دارو درەختەكان دەكەن و زیانی زۆر بەر ژینگەی كوردستان و دەڤەرەكەمان دەگێنن، بۆ رێگری گرتن لەم دیاردەیە هیزە ئەمنییەكانی سنوورەكەمان ئاگاداركردوونەتەوە كە ئەم جۆرە كەسانەی روو لە بڕینی دارو درەختەكان دەكەن و زیان بە ژینگەی دەگێنن، رووبەڕوی سزایی یاسایی بكرێنەوە".
دەربارەی دابەشكردنی بەشە نەوتی هاووڵاتییان، قائیمقامی سۆران دەڵێت: "هیوادارین كۆبوونەوەو دیدارەكانی شاندی هەرێمی كوردستان، لەگەڵ حكوومەتی عێراق ئەرێنی بێت و رێكبكەون، بۆ ئەوەی نەوتی پێویستمان بۆ رەوانە بكرێت و بەسەر دانیشتووانی سنوورەكەمان دابەشی بكەین.
لەلای خۆیەوە ئەحمەد قادرەسۆر، قائیمقامی قەزای رواندوز بەزاری كرمانجی گووت: " هەموو رێگریەكمان كردووە بۆ ئەوەی هاووڵاتییان روونەكەن بڕینی دارو درەختەكان و ژینگەی ناوچەكە نەشێوێنن، تا ئێستاش چەند كەسێك بەم هۆیە دەستگیر كراون و رووبەڕووی یاسا كراونەتەوەو بازگەكان و هێزە ئەمنیەكانیشمان چاودێری زیاتریان خستۆتە سەر ئەوەی كە رێگری لەم دیاردەیە بگیرێت.
جێگەی ئاماژەیە: " دەڤەری سۆران كە سنووری هەرچوار قەزاكانی (سۆران، رواندز، مێرگەسۆر، چۆمان) لەخۆدەگرێت، بە یەكێك لە ساردترین و سەخترین ناوچەی سنووری پارێزگای هەولێر دادەنرێت و ساڵانە بەفرێكی زۆر لە سنوورەكە دەبارێت، بەمەش خەڵكانێك بۆ خۆپاراستنیان لە سەرماو سۆڵەی وەرزی زستان روو لە بڕینی دارو درەختەكان دەكەن و زیانێكی زۆر بە ژینگەی دەڤەرەكە دەگێنن، تەنها بەهۆی پەسەندكردنی یاسایەكی ژینگە پارێزی لە سنووری قەزای مێرگەسۆر، هاووڵاتییان كەمتر روودەكەنە بڕینی دارو درختەكان. باشترین چارەسەریش بۆ رێگە گرتن لەم دیاردەیە دابەشكردنی نەوتی سپییە بەسەر هاووڵاتیانی دەڤەرەكە.

 

بیروڕا

زۆرترین بینراو