وەرزشی شاخەوانی لە كوردستان خەریكە دەبێتە كلتور

وەرزشی شاخەوانی لە كوردستان خەریكە دەبێتە كلتور

وەرزش بەگشت شێوازەكانییەوە ئەو بابەتە گرنگەیە كە لەتەواوی جیهان بایەخی زۆری پێدەدرێت، زۆرن ئەوانەی لەسەرئاستی تاكەكەس و وڵاتانەوە لە رێگای وەرزشەوە ناو دەنگێكی زۆریان پەیداكردوە و ناسراون، وەرزشی سەركەوتن بەسەر شاخ و هەڵكشان بەرەو لووتكەی شاخەكان بەم ساڵانەی دوایی خەریكە لەكوردستان دەبێتە كلتورو رۆژ بەرۆژ ئارەزوومەندانەی ئەو وەرزشە بەرەو زیاد بوونن.

دیمانە : محەممەد مەحموود

بۆلە نزیكەوە ئاگاداربوون لە كارو چاڵاكیەكان و ئامانجی دامەزراندیان زاری كرمانجی كۆمەڵەی شاخەوانی كوردستانی هێنایە دووان ، ئەنوەر پێنجوێنی سەرۆكی كۆمەڵەی شاخەوانی كوردستان بۆزاری كرمانجی دەربارەی مێژووی دامەزراندن و ژمارەی ئەندامان و ئامانجی كارەكەیان بۆ زاری كرمانجی گووتی" كۆمەڵەی شاخەوانی كوردستان لە 9-9-2017 دامەزراوە، ئەم كۆمەڵەیە لە 150 ئەندامی هەمیشەی پێكهاتووە ، كۆمەڵەكە لە سێ‌ بەش پێكهاتووە، دەستەی دامەزرێنەران ، دەستەی كارگێری و دەستەی سەرپەرشتیاری ، ئەم كۆمەڵەیە خۆبەخشیە و هەموو ئەوانەی بەشدارن لەگەڵمان بەشێوەی خۆبەخشی كاردەكەن ، لە گەڵ ئەوەش چەند پارێزەرێكمان لە گەڵن كە ئەوانیش بەشێوەی خۆبەخشی كاردەكەن ، ئەوانەی دەبنە ئەندامی ئەم كۆمەڵەیە دەبێت سەرەتا فۆرمێكی یاسایی پڕبكەنەوە لە كۆمەڵەكەمان بۆئەوەی لەئەنجامی كاركردنی ئەوكەسانە لەگەڵمان ئەگەرهاتوو تووشی رووداوێك هاتن خۆیان بەرپرسیاردەبن ، چونكە كەس بەزۆر نابێتە ئەندام لەكۆمەڵەكەمان.
هەروەها ناوی كۆمەڵەكەمان دیارە كە شاخەوانییە بۆیە ئەوەی دەیەوێت لەگەڵمان بێت دەبێت بەشداربێت لەو گشتە شاخەوانیانەو زۆرجاریش هەڵخلیسكان و هەڵدێرانیش دەكرێت رووبدات لەم وەرزشە.
ئەنوەر پێنجوێنی گووتیشی" لەم كۆمەڵەیە هەردوو رەگەزی پیاو و ئافرەتی تێدایە بەبێ‌ جیاوازی ،كۆمەڵەكەمان لە سێ‌ لق پێكهاتووە، لقی سەرەكیمان لەشاری سلێمانیە وە لقی باڵەكایەتی و كەركووك و هەولێریشمان هەیە، تاكو ئێستا لە گەشتەكانمان دووچاری هیچ حاڵەتی نەخوازراو نەبووینەتەوە،گەشتەكانیشمان بۆ تەواوی كوردستانە و تەنها پارەی هاتوچوونمان وەك كرێی رێگا بۆخەرجدەكرێت،چونكە كۆمەڵەی شاخەوانـــی كوردستان كۆمەڵەیەكی قازانج نەویستــی خۆبەخشەیە ئامانجمان لەم كارە ئەوەیە ، زیاتر بە كلتــوركردنی وەرزشی شاخەوانی و ناساندنــی شوێنەوار و شاخ و سروشتــە جوانەكەی كوردستانـــە.
سەرۆكی كۆمەڵەی شاخەوانی كوردستان بۆزاری كرمانجی باس لەدواین گەشتی خۆیان دەكەن كە بۆ سنووری باڵەكایەتی ئەنجام یان داوەو دەڵێت" ڕۆژانی 28,27-6- 2019 لەگەشتێكی تایبەتدا كۆمەڵەی شاخەوانی كوردستان هەڵساین بەئەنجام دانی گەشتێكی شاخەوانی و شەومانەوە بۆ چیای حەساری سەكران بەیاوەری لقی كۆمەڵەكەی كەركوك و باڵەكایەتی گروپی شاخەوانی هەڵگورد. سەرەتا لە كاتژمێر 5:00ی بەیانی 27-6-2019
لەشاری سلێمانیەوە بەڕێكەوتین بەرەو قەزای چۆمان دوای پشودانی نیوەڕۆ بەڕێكەوتین دەسپێكی گەشتەكەمان گۆمی فێڵاو بوو، دوای تۆماركردنی چەند وێنەیەكی یادگاری بەڕێكەوتین بۆ
سەیرانگای پڕژە و تێپەڕ بوون بەناویدا پاش ماوەیەك لەڕۆشتن گەیشتین بەتاڤگەی كانیە ڕەش لەدۆڵی بێكۆدیان
پاش تۆماركردنی چەند وێنەیەك و ئارام بونەوەی دەروونمان بەودیمەنە جوانەی تاڤگەكە لەشوێنێكی گونجاودا دەستمان كرد بە كەمپین و خێوەت هەڵدان لەبەرزی 2700مەتر لەئاستی ڕوی دەریا بەمەبەستی پشودان، دواتر لە رۆژی 28-6-2019 كاتژمێر 5:00 ی بەیانی هەڵكشاین و بەڕێكەوتین بەرەو گۆمی بێكۆدیان بە بەرزیەكی سەختدا و بەناو بەفردا بەردەوام بووین تاگەیشتینە گۆمە دڵ ڕفێنەكەی بێكۆدیان سەركەوتنێكی گەورەمان تۆماركرد كەگۆمی بێكۆدیان 3149مەتر لە ئاستی ڕووی دەریاوە بەرزە، پاش وێنە گرتن و پشودان بۆماوەی 1كاتژمێر و نیو گەڕاینەوە بۆلای خێوەتەكە پاشان گەڕاینەوە و كۆتایمان هێنا بەپڕۆگرامی ئەم گەشتە.

 

 

زۆرترین بینراو